கூடங்குளம் அணுமின் நிலையத்தை உடனடியாகத் திறக்க நடவடிக்கை எடுக்கப்படும் என தமிழக அமைச்சரவை மார்ச் 19 அன்று தீர்மானம் நிறைவேற்றியது. அன்றே கூடங்குளம் எதிர்ப்புக் குழுவினர் 11 பேர் கைது செய்யப்பட்டனர்.
இலங்கைக்கு எதிராக அய்.நா. மனித உரிமை ஆணையக் கூட்டத்தில் அமெரிக்கா கொண்டுவரும் தீர்மானத்தை இந்தியா ஆதரிக்கும் என பிரதமர் மன்மோகன் சிங் மார்ச் 19 அன்று நாடாளுமன்றத்தில் அறிவித்தார்.
மத்திய ரயில்வே அமைச்சர் தினேஷ் திரிவேதி மார்ச் 18 அன்று பதவி விலகினார். இவர் சார்ந்த திரினமூல் காங்கிரசின் முகுல்ராய் மார்ச் 20 அன்று புதிய ரயில்வே அமைச்சராகப் பொறுப்பேற்றார்.
ஒடிசா மாநிலம் காந்தமால்-_கஞ்சம் மாவட்டத்தில் இத்தாலி சுற்றுலாப் பயணிகள் இருவரை மாவோயிஸ்டுகள் மார்ச் 18 அன்று கடத்திச் சென்றனர். தங்களது 13 அம்ச கோரிக்கையை நிறைவேற்ற வேண்டும் என அரசுக்கு கடிதம் அனுப்பினர்.
கூடங்குளம் அணுமின் நிலையம் மார்ச் 20 அன்று செயல்படத் தொடங்கியது. அப்பகுதி மக்கள் உண்ணாவிரதம், சாலை மறியல் போராட்டங்களில் ஈடுபட்டனர்.
சங்கரன்கோவில் மார்ச் 18இல் நடந்த சட்டமன்ற இடைத்தேர்தலில் மார்ச் 22இல் வாக்குகள் எண்ணப்பட்டு அ.தி.மு.க. வேட்பாளர் முத்துச்செல்வி வெற்றி பெற்றதாக அறிவிக்கப்பட்டது.
கர்நாடகாவில் தேவதாசி முறைக்கு எதிராகப் போராடிவரும் சோபா கெஸ்டி என்ற பெண்ணுக்கு சென்னையில் மார்ச் 21இல் அமெரிக்கத் தூதரகம் விருது வழங்கியது.
கூடங்குளம் அணுஉலை எதிர்ப்புக் குழுவினர் 5 பேர் மார்ச் 21இல் தொடர் உண்ணாவிரதம் மேற்கொண்டனர். 5 ஊர்களுக்கு பால், தண்ணீர், காய்கறிகள், மின்சாரத்தை அரசு தடைசெய்து நெருக்கடி கொடுத்தது.
ஓரினச் சேர்க்கையில் ஈடுபடுவது தவறில்லை; குற்றமாகாது என உச்சநீதிமன்றத்தில் மார்ச் 21இல் மத்திய அரசு தெரிவித்தது.
ரயில்வே நிதிநிலை அறிக்கையில் உயர்த்தப்பட்ட பயணிகள் ரயில் கட்டணம் நீக்கம் செய்யப்படுகிறது என்று புதிய மத்திய ரயில்வே அமைச்சர் முகுல்ராய் மார்ச் 22 அன்று நாடாளுமன்றத்தில் அறிவித்தார்.
