கே: ஜாதியின் பேரால் வன்முறையைத் தூண்டும் ஜாதிச் சங்கம் மற்றும் அரசியல் கட்சித் தலைவர்கள் அடங்க வழி என்ன?
- மகேஷ், சிவகாசி
ப: 1. அவர்களை அம்பலப்படுத்தி, பொதுமக்களைத் திரளச் செய்யும் விழிப்புணர்வுப் பிரச்சாரம்.
2. அரசுகள் அத்தகையவர்கள் மீது கடும் நடவடிக்கை, அழுத்தம் பலவகையிலும் தருவது.
கே: தி.மு.க. ஆட்சிக் காலங்களில் மட்டுமே அரசு ஊழியர்களின் உரிமைகள் பாதுகாக்கப்படுவதும் அ.தி.மு.க. அரசு அதைத் தகர்ப்பதும் ஏன்?
- ச.அபிநவ், தூத்துக்குடி
ப: மக்கள் நலன் என்பதில் தி.மு.கவுக்கு அரசு ஊழியர்கள் நலனும் உள்ளடக்கம் என்று தி.மு.க. அரசு உணருவதும், அ.தி.மு.க. அரசு உணராததுமே உண்மைக் காரணங்கள்.
கே: நேர்மையற்ற மோடி - எடப்பாடி ஆட்சியில் தேர்தல் மட்டும் நேர்மையாக நடக்கும் என்று நாம் நம்புவதற்கு இல்லையே... உங்கள் கருத்து அய்யா?
- க.நரசிம்மன், புழல்
ப: உங்கள் வாய்க்குச் சர்க்கரை போட வேண்டும்.
கே: இலங்கையில் கிறிஸ்தவர்களை குறிவைத்து நடத்தப்பட்ட தொடர் குண்டுவெடிப்பு எதைக் காட்டுகிறது?
- த.உமாபதி, ரெட்டேரி
ப: ‘எண்ணிலா மதங்கள் கந்தக் கிடங்கில், கன்னிக் கொள்ளிகள்’ என்ற புரட்சிக்கவிஞர் கருத்து எத்தகைய உண்மை பார்த்தீர்களா? நெறி வெறியாகும் என்பதன் சாட்சி!
கே: மனிதநேயம் கடவுள் மறுப்பாளர்களிடம் உள்ள அளவிற்கு கடவுளை நம்புவோரிடம் இல்லாதது ஏன்?
- அருள்மொழிதேவன், மதுரை
ப: எதிலும் தனது செயல் இல்லை என்ற பக்தர்கள் நம்பிக்கையும், எதற்கும் பொறுப்பேற்க வேண்டும் என்ற பகுத்தறிவாளர்களின் உணர்வும்தான் சரியான காரணங்கள்.
கே: பூணூல் போட்டுக் கொள்பவன் உயர்ந்தவன் என்றால், அந்த நூலை தயாரித்தவன் அவனைவிட உயர்ந்தவனாகத்தானே இருக்க வேண்டும்?
- யாழினி, சைதை
ப: அருமையான நெற்றியடி இது!
கே: உச்சநீதிமன்றத் தலைமை நீதிபதி ரஞ்சன் கோகாய் மீதே பாலியல் குற்றச்சாட்டை புனைந்து பேசப்பட்டிருக்கிறதே! உச்சநீதிமன்றத்திற்கே அச்சுறுத்தல் தரும் பாசிஸ்டுகளின் ஜனநாயகப் படுகொலைதானே இது?
- அ.சி.அஸ்வின், பம்மல்
ப: பெரிய சக்தியின் சதிவலை. அதுவும் பிற்படுத்தப்பட்ட சமூகத்தைச் சார்ந்த ஒரு நேர்மையாளர் மீது பெரும்பழி!
கே: ஜாதி மறுப்புத் திருமணம் செய்ய இயலாத காரணத்தாலேயே ஒருவர் ஜாதி ஒழிப்பு பற்றி பேச தகுதியற்றவராகி விடுவாரா?
- முத்தமிழ்ச்செல்வன், அரியலூர்
ப: பல சூழல்கள் காரணமாக அமையலாம். அதனால் அதை தகுதிக்குறைவாக எண்ண வேண்டாம்.
கே: இந்துமதக் கடவுள்களின் காமவெறியையும், காலித்தனத்தையும் எடுத்துச்சொன்னால் பக்தர் மனம் புண்படுகிறதென்றால் அந்தக் கதைகளைச் சொல்லும் புராண இதிகாசங்களை தடை செய்யாதது ஏன்?
- பிரித்திவிராஜ், மாதவரம்
ப: ஒருதலைப்பட்ச முட்டாள்தனமான பார்வை _ ஆரிய ஆணவம்தான் காரணம் என்க!
