கேள்வி : தூக்குத் தண்டனைக்கு எதிரான தமிழர்களின் எழுச்சியை, கோமாளி சோவும், தினமலரும் (டவுட் தனபாலு) கேலி செய்துள்ளனரே?
- சா. கு. சின்னதுரை, சாக்காங்குடி
பதில் : பழைய புராணக் கதை உவமை - சொன்னால்தான் டவுட் தனபாலுக்கும் அவுட்திரி அம்மாஞ்சிக்கும் புரியும் என்பதால் சொல்கிறோம். சிவன் கழுத்து பாம்பு - கதைதான். கருடா சவுக்கியமா? என்று கேட்டது; இருக்கிற இடத்தில் இருந்தால் எல்லாம் சவுக்கியம்தான் என்று சொன்னது கருடன் என்ற கதைதான்
கேள்வி : சட்டத்தின் முன் அனைவரும் சமம் என்பதை இன்னமும் பார்ப்பனர் ஏற்க மறுப்பதேன்? - நெய்வேலி க. தியாகராசன், கொரநாட்டுக் கருப்பூர்
பதில் : மனுதர்மம்தான் அவாளின் ஒரே சட்டம். பிறகு, அவாள் சமத்துவத்தை ஆதரிப்பாரோ?
கேள்வி : தவறான தகவல்களை, தொடர்ந்து பத்திரிகைகளில் வெளியிட்டு, (குறிப்பாக வாரம் இருமுறை வெளியாகும் பத்திரிகைகள்) பின் வழக்குரைஞர் நோட்டிஸ் விட்டதும் வருத்தம் தெரிவிக்கும் மஞ்சள் இதழ் ஆசிரியர்களைப் பற்றிய தங்களின் கருத்து என்ன? - ப. தமிழ்முனி, கிழக்குத் தாம்பரம்
 pages-12.jpg)
பதில் : அந்த வாரம் ஒரு சில நூறு, இருநூறு பிரதிகள் கூடுதலாக விற்றால் போதும், காசுக்கு முன்னால் மானமாவது மண்ணாங்கட்டியாவது. அதிலும் பூணூல்களுக்கு அதைவிட மோசமான தொழில் செய்வதிலும்கூட வெட்கம் கிடையாதே! எனவே, நன்றாக மஞ்சள் குளிக்கின்றன அந்த மாபெரும் இன்வெஸ்டிகேடிவ்கள்!
கேள்வி : மத்திய சட்ட மந்தி(ரி) சல்மான் குர்ஷித், மரண தண்டனையை ரத்து செய்யக் கோரும் தமிழக சட்டசபைத் தீர்மானம் யாரையும் கட்டுப்படுத்தாது என்கிறாரே? - எம். கே. கலைச்செல்வன், சிங்கிபுரம்
பதில் : ராஜாவை மிஞ்சும் ராஜவிசுவாசிகள் எங்கும் உண்டு என்பதையே இந்த வாரண்ட் இல்லாத ஆஜராகும் நிலையைக் காட்டுகிறது! படுதோல்வி என்ற நிலைக்குப் பிறகே காங்கிரசுக்குப் புத்திவரக்கூடும்!
கேள்வி : தமிழ்நாடு பெயர் மாற்றத்திற்காக 72 நாட்கள் உண்ணா நோன்பிருந்து உயிர் துறந்த சங்கரலிங்கனாருக்கு இல்லாத விளம்பரம் அன்னா ஹசாரேக்கு மட்டும் ஏன்? - க. ராசன், நெய்வேலி
பதில் : அப்போதிருந்த எதிர்க்கட்சியும் ஊடகங்களும் அந்த ஜீவனை, தியாகியை கண்டுகொள்ளவே இல்லை. இன்றும் பலருக்கு நினைவே வருவதில்லையே!
கேள்வி : இன்றைய கணினி யுகத்திலும், கல்லூரிகளில் முதுகலை பயிலும் மாணாக்கர் கைகளில் கருப்பு, சிவப்புக் கயிறுகள் காட்சியளிக்கின்றன. அவர்கள் கற்கும் கல்வியால் பெற்ற பயன்தான் என்ன?
- விடுதலை வாசகர் வட்டம், ஊற்றங்கரை
பதில் : மூடத்தனத்தின் முடைநாற்றம்; நாங்கள் கோழைகள் என்று நெற்றியில் பச்சை குத்திக் கொள்வது, கையில் கயிறுகளைக் கட்டிக் கொள்வதைவிட பலமடங்கு மேல். பிரச்சாரம் இளைஞர்களுக்கே அவசியம் தேவை! தேவை!
கேள்வி : தமிழக மீனவர்கள் இலங்கைக் கடற்படையினரால் தாக்கப்படும் தொடர்கதைக்கு முடிவே இல்லையா? - சி. சுவாமிநாதன், ஊற்றங்கரை
பதில் : என்ன செய்வது! நமக்கு வந்த சுயராஜ்யத்தின் சுயரூபம் அது! தமிழ்ச்சாதியே! தமிழ்ச்சாதியே என்று ஓலமிட்டு ஒப்பாரி வைத்து மீனவ சகோதரர்களிடம் நாமும் அழுவதைத் தவிர வேறு வழி தெரியவில்லை. முதுகெலும்புள்ள மத்திய சர்க்கார் வந்தால் நிலைமை மாறக்கூடும்.
கேள்வி : சுற்றுச்சூழல் பாதுகாக்க, பருவ நிலை மாறுபடாதிருக்க, புவி வெப்பமாவதைத் தடுக்க, தொழிற்சாலைகளில் இருந்து வெளியேறும் அசுத்தக் காற்று, காற்று மண்டலத்தில் கலக்காதவாறு எல்லா நாடுகளின் தொழிற்சாலைகளின் கதவுகளையும் மூடினால் என்ன?
- எம்.ஆர்.பக்கிரிசாமி, மேலசொட்டால்வண்ணம்
பதில் : கதவுகளை மூடுவதைவிட, அசுத்தக்காற்று (கரியமிலவாயு) வெளியேற்றப்படாமல், பூஜ்யமாகும் வகையில் ஏற்பாடுகளைச் செய்ய சிந்திக்க வேண்டும். ‘Zero Carbon Zone’ என்று நமது தஞ்சை பெரியார்-- மணியம்மை பல்கலைக்கழகம் ஆனதை அப்துல் கலாம் அவர்களே நேரில் பார்த்து வியந்து பாராட்டினார்களே. அதுபோன்ற ஆய்வுகளை இணைத்து புதுவழி காணலாம்; காணவேண்டும்.
கேள்வி : மதக் கலவரத் தடுப்பு மசோதாவுக்கு பா.ஜ.க. எதிர்ப்புத் தெரிவிக்கிறதே. அந்தச் சட்டம் வந்தால் தமது கட்சியைத்தான் பாதிக்கும் என்று கருதுகிறதா?
- ஏ.ஜோதி, சோளிங்கர்
பதில் : சிறுபான்மையினருக்கு அதில் பாதுகாப்பு அம்சம் அதிகம் உள்ளதால், பா.ஜ.க. மற்றும் அதன் சுற்றுக்கிரகமான அ.தி.மு.க. பொதுச் செயலாளர் முதல்வருக்கு அது சங்கடமாகிறது! மாநில உரிமைகளைப் பறிக்கும் பகுதிகளை நீக்கி மாற்றி அமைத்து அதைச் சட்டமாக்கிடலாம்! பொதுமக்கள் விவாதத்திற்கு விடுவது நல்லது.
கேள்வி : சட்டமன்றங்களில் ஒழுங்கீனமாக நடந்து கொள்ளும் உறுப்பினர்கள்மீது நடவடிக்கை எடுக்கும் அதிகாரம் சட்டப்பேரவைத் தலைவருக்கு உள்ளதைப் போல், நாடாளுமன்ற சபாநாயகருக்கு அதிகாரம் இல்லையா? நாடாளுமன்றம் தொடர்ந்து முடக்கப்படுவதற்குத் தீர்வே இல்லையா? - வ.அழகுவேல், அய்யம்பேட்டை
பதில் : நாடாளுமன்றத்தில் உள்ள சபாநாயகி அவர்களும், மாநிலங்கள் அவைத் தலைவரும் எப்போதும் மிகுந்த தாட்சண்யம் காட்டுபவர்களாகவே உள்ளார்கள். இங்கோ அப்படி ஏதும் இல்லாத நேர் எதிர் நிலையே உள்ளது. இரண்டும் இரண்டு முனைகள். (Extremes) நடுவில் இருப்பது நல்லது.
