கல்விக் கண் திறந்த பெருந்தலைவர் காமராசர்

காமராஜருக்குப் பெரியார் கொடுத்த தந்தி! ‘கேபிளான் என்று கூறப்பட்ட காமராசர் திட்டப்படி காங்கிரசில் மூத்த தலைவர்கள் ஆட்சிப் பதவியை விட்டு விலகி கட்சிப் பணிக்குச் செல்லுவது என்று முடிவு எடுக்கப்பட்டது. அதன்படி தமிழ்நாடு முதல் அமைச்சராக இருந்த கு.காமராசர் பதவி விலகி அகில இந்திய அரசியலுக்குச் சென்றார். காங்கிரசின் அகில இந்தியத் தலைவராகவும் ஆனார். காமராசர் தமிழ்நாட்டு முதலமைச்சர் பதவியை விட்டுச் சென்றது தந்தை பெரியாருக்குப் பிடிக்கவில்லை. காமராசர் அவர்களுக்குத் தந்தி ஒன்றும் கொடுத்தார் -_ வாசகங்கள் வருமாறு: “Either or your own Accord or on the Advice of others, your Resignation of Chief Ministership will be sucidal to Tamilians, Tamilnadu and Yourself.” “தாங்களாகவோ அல்லது பிறரது ஆலோசனை காரணமாகவோ தமிழ்நாட்டு முதல் அமைச்சர் பதவியிலிருந்த தாங்கள் விலகியதானது - தமிழர்களுக்கும், தமிழ் நாட்டிற்கும், தங்களுக்கும் தற்கொலைக்கு ஒப்பானதாகும்’’ என்பதுதான் அந்தத் தந்தி. தந்தை பெரியாரின் இந்தக் கணிப்பு சொல்லுக்குச் சொல், வரிக்கு வரி அப்படியே பொருந்தியது என்பதை நாடே கண்டது.  செய்திகளை பகிர்ந்து கொள்ள

ஆசிரியர் பதில்கள் : ஆசைக் குதிரை பறக்காது!

கே:       அனைத்து ஜாதியினரும் அர்ச்சகர் தொடர் கட்டுரை மேலும் வரும் என்று எதிர்பார்க்கிறோம்! நிறைவேறுமா?                - ரமேஷ், வேலூர்     ப:       வாசகர் விருப்பம், எங்களுக்கு ஆணை; நிச்சயம் தொடரும். கே:       பெரியார் உலகத்தை ஓரிரு ஆண்டுகளில் கட்டி முடிக்க முடியாதா? நிதிதான் தடையென்றால் தமிழர்களிடம் உலக அளவில் திரட்டக் கூடாதா?                - அருள்குமார், மயிலை     ப:       நிதியே கையில் இருந்தால்கூட அத்தனை கட்டடங்களைக் கொண்ட ஒரு புது உலகத்தை எப்படி ஓரிரு ஆண்டுகளில் முடிக்க முடியும்? குறைப் பிரசவம் ஆரோக்கியமாகாதே! நிச்சயம் விரைந்து முடிக்கலாம். ஆனால், உரிய காலம் ஒவ்வொரு பகுதிக்கும் தேவை அல்லவா? உங்கள் ஆர்வத்திற்கு நன்றி! கே:       ‘நீட்’டை எதிர்க்கும் மாநிலங்களை ஒருங்கிணைத்தால் விரைவில் தீர்வு கிடைக்குமே! செய்தால் என்ன?                - புகழ், செஞ்சி     ப:       காலம் கனிந்து வருகிறது. மேற்கு வங்கம், கருநாடகம், மகாராட்டிரம் வரிசையில் வருகின்றன. நிச்சயம் மற்றவர்களும் உணருவார்கள். கே:       உரசினாலே உதிரும் வலுவற்ற கட்டடங்கள் கட்டிய அ.தி.மு.க., உள்ளாட்சித் தேர்தலை எந்தத் துணிவில் சந்திக்கிறது? அவர்களின் நிருவாகச் சீர்கேட்டை முன்னிலைப்படுத்திப் பிரச்சாரம் செய்தால் என்ன?                - பெரியார் பித்தன், காரைக்குடி     ப:       நல்ல யோசனை. இதை தி.மு.க. கூட்டணிக் கட்சி வேட்பாளர்கள் கவனிக்க; செயல்படுத்துக. கே:       ஆழி செந்தில்நாதன் திராவிட இயக்கக் கோட்பாடுகளை முன்னிறுத்தி, தமிழ் தேசியப் போலிகளைத் தோலுரிக்கும் ஆற்றல் பற்றி என்ன நினைக்கிறீர்கள்?                - சீனிவாசன், தாம்பரம் ப:       அருமையான பணி செய்யும் சிறந்த கருத்தாளர். தொண்டு தொடர வாழ்த்துகள்! கே:       எழுச்சித் தமிழர் திருமாவுக்கு கண்ணி வைக்கும் கயவர்கள் எந்த நம்பிக்கையில் அணுகுகிறார்கள்? திருமா மூன்றாவது குழல் அல்லவா?                - லட்சுமி, கோவை ப:       எழுச்சித் தமிழருக்கு மட்டுமல்ல; இந்த மதச்சார்பற்ற ஜனநாயக முற்போக்குக் கூட்டணி தி.மு.க. தலைமையில் உள்ளதே, அதில் உள்ள எவருக்குக் கண்ணி வெடி வைத்தாலும் அதைக் கண்டறிந்து அகற்றும் பணி நம் அனைவரின் பணியாக என்றும் இருக்கும்; இருக்க வேண்டும். கே:       ஆளுநரை வைத்து அரசியல் நடத்த முற்பட்டால் நடக்குமா?                - சங்கர், திருச்சி     ப:       ஆசைகளைக் குதிரைகளாக்கினாலும் பறக்க முடியாது. கே:       கல்வி ஒத்திசைவுப் பட்டியலில் இருக்கும்போது, ஒன்றிய அரசு தன்னிச்சையாக முடிவு மேற்கொள்வதை உச்சநீதிமன்றம் எப்படி அனுமதிக்கிறது?      - அசோக், பெரம்பலூர்     ப:       மில்லியன் டாலர் கேள்வி இது! பதில் அளிக்க இயலாத நெற்றியடி! கே:       ‘விடுதலை’, ‘முரசொலி’ ஏடுகளின் பக்கங்களை நான்காகக் குறைத்து, நறுக்காக செய்திகளைச் சுருக்கி, மலிவாக மக்கள் மத்தியில் அதிக அளவில் கொண்டு சென்றால் அதிகப் பயன் கிடைக்குமல்லவா?                - தமிழோவியன், சிதம்பரம்     ப:       நறுக்குகளும் கட்டுரைகளும் உரைகளும் முக்கியம் இல்லையா? 4 பக்கங்களில் முடியுமா? ஒரு டீயின் விலையைவிடக் குறைவுதானே? இதைவிட பேப்பர் விலையோ அதிகம். மலிவாக்க முடியாது.    செய்திகளை பகிர்ந்து கொள்ள

தலையங்கம் : பெண்களுக்கு 50 சதவிகித இடஒதுக்கீடு: பெரியார் 80 ஆண்டுகளுக்கு முன் கோரியதை உச்சநீதிமன்றத் தலைமை நீதிபதி வலியுறுத்தல்! விரைந்து நிறைவேற்றிடுக!

உச்சநீதிமன்றத்தின் தலைமை நீதிபதி மாண்புமிகு ஜஸ்டிஸ் ஆர்.வி.ரமணா அவர்களும், அவரது சக நீதிபதிகளான ஜஸ்டிஸ் ஒய்.வி.சந்திரசூட் போன்ற நீதிபதிகளும் நாளும் சிறப்புமிக்க தீர்ப்புகளை வழங்கி வருகிறார்கள். அரசமைப்புச் சட்டத்தின் அடிப்படை நோக்கம் நிறைவேறும் வகையில் தங்களது நடவடிக்கைகளை அமைத்துக்கொள்வது நாட்டின் ஜனநாயகத்திற்கு வலிமை சேர்ப்பதாக உள்ளது. சமூகநீதிக்கு முற்றிலும் விரோதமானது ராணுவ அகாடமியில் பெண்களைச் சேர்க்காமலேயே இதுவரை ஒதுக்கி வைத்து, வாய்ப்பு மறுக்கப்பட்டது. பாதுகாப்புத் துறையின் இந்த நிலைப்பாடு _ அரசமைப்புச் சட்டத்தின் அனைவருக்கும் சம வாய்ப்பு, சமத்துவம், பாலியல் நீதி கலந்த சமூகநீதிக்கு முற்றிலும் விரோதமானது என்பது வெளிப்படை. அதனைக் களைந்து, ராணுவ தேசிய அகாடமியில் பெண்களைச் சேர்ப்பது அவசியம் என்று வலியறுத்தி தீர்ப்பு வழங்கியதோடு, அடுத்தாண்டு என்று காத்திருக்க வேண்டியதில்லை. இவ்வாண்டு முதலே மகளிரைச் சேர்ப்பது தொடங்க வேண்டும் என்று முற்போக்குச் சிந்தனையுடன் வற்புறுத்தி செயல்பட வைத்தது வரலாறு படைக்கும் நிகழ்ச்சியாகும்! மக்களில் சரி பகுதி பெண்கள்; அவர் களை, மனுதர்மவழிச் சமூகம் எதற்கும் உரிமையற்ற அடிமைகளாகவே, கூலி பெறாத வேலைக்காரிகளாகவும், பிள்ளை பெறும் இயந்திரங்களாகவும்தான் ஆக்கி வைத்தது. காலங்காலமாக _படிப்பு வாய்ப்பு மறுக்கப்பட்டது; அதனால் வேலை வாய்ப்பும் பெற முடியாத சோகமான சூழல்; வாழ் நாள்  முழுவதிலும் தங்களின் எஜமானர்களாக ஆண்களையே நத்தி வாழ்ந்து தீரவேண்டிய கட்டாயம் ஏற்பட்டது; அவர்களுக்குத் தகப்பன் சொத்தில் எந்த உரிமையும் இல்லாத நிலை _ 2006 வரை ஒன்றிய (மத்திய) அரசில். ‘மகளிர் உரிமை காத்த ஆட்சி மாண்பாளர்’ விருது (தமிழ்நாட்டில் கலைஞர் தமது ஆட்சிக் காலத்தில் (1989_1990) தகப்பன் சொத்து மகளுக்கும் உண்டு என்று தனியே சட்டம் இயற்றினார்) அதனால் அவருக்குத் தாய்க் கழகமான திராவிடர் கழகம் ‘மகளிர் உரிமை காத்த ஆட்சி மாண்பாளர்’ விருதினையும் அளித்து மகிழ்ந்தது! புரட்சியாளர் டாக்டர் அம்பேத்கர் தனது சட்ட அமைச்சகத்தின் வாயிலாக, பெண் களுக்குச் சொத்துரிமைச் சட்டத்தை _ இந்து சட்டத் திருத்தத்தை (Hindu Code Bill) நிறை வேற்ற விடாமல், ஆரியமும், வைதிகமும், சனாதனமும், சங்கராச்சாரியார்களும் கடுமையாகத் தடுத்த சூழ்ச்சிச் செயல்களால், வெறுப்பும், விரக்தியும் கொண்ட நிலையில், ஒன்றிய அமைச்சர் பதவியையே ராஜினாமா செய்து வெளியேறினார். தந்தை பெரியார், டாக்டர் அம்பேத்கர் எண்ணங்களைச் செயல் வடிவமாக்கினர் ஆனால், 2005 இல் தி.மு.க. இணைந்த அய்க்கிய முற்போக்குக் கூட்டணியின் பிரதமர் மன்மோகன் சிங் ஆட்சியில் _ காங்கிரஸ் தலைமையிலான ஆட்சியில்_ தகப்பன் சொத்தில் மகனைப் போலவே, மகளுக்கும் சொத்துரிமை தரப்படவேண்டும் என்ற சட்டத் திருத்தம் நிறைவேறி, தந்தை பெரியார், டாக்டர் அம்பேத்கர் எண்ணங்களைச் செயல் வடிவமாக்கினர். உச்சநீதிமன்றத் தலைமை நீதிபதியின் முழக்கம்! உச்சநீதிமன்றத் தலைமை நீதிபதி ஜஸ்டிஸ் ஆர்.வி.ரமணா அவர்கள் பெண் நீதிபதிகளுக்குத் தந்த வரவேற்பு நிகழ்ச்சியில் பேசுகையில், “பெண்களுக்குப் போதிய அளவில் உச்சநீதிமன்ற, உயர்நீதிமன்ற நீதிபதி நியமனங்களில் வாய்ப்புகள் இல்லை. தற்போது முறையே  11.5 சதவிகிதம், 9.8 சதவிகிதம்தான் பெண்கள் நீதிபதிகளாக நியமனம் பெற்று இயங்கி வருகிறார்கள். பெண்களுக்கு 50 விழுக்காடு தர வேண்டியது அவசியம்’’ என்று அழுத்தந்திருத்தமாகக் கூறியதோடு _ ‘உரக்க உரிமைக் குரல் எழுப்புங்கள்’ என்றும் உற்சாகப்படுத்தியுள்ளார்! இது பாராட்டத்தக்கது. இந்திய பார்கவுன்சிலில் நிருவாகக் குழுவில் ஒரு பெண்கூட தேர்வு பெறாத வேதனையான சூழ்நிலையையும் நன்கு சுட்டிக்காட்டியுள்ளார்! இதனை வரவேற்கிறோம்! இது விரைந்து செயல்படுத்தப்பட வேண்டியது அவசிய மாகும். 80 ஆண்டுகளுக்கு முன்பே தந்தை பெரியார், பெண்களுக்கு 50 விழுக்காடு இடஒதுக்கீடு தரவேண்டும் என்று முழங்கினார். அது இன்று உச்சநீதிமன்றத்தில் ஒலிக்கிறது _ தலைமை நீதிபதிமூலம்! ஒடுக்கப்பட்ட சமூகப் பெண்களுக்கு முன்னுரிமை தருவது  இட ஒதுக்கீட்டில் முக்கியம்! தமிழ்நாட்டில் தி.மு.க. அரசும், அதன் ஒப்பற்ற முதலமைச்சருமான மு.க.ஸ்டாலின்,  பெண்களுக்கு அரசு வேலை வாய்ப்பில் இட ஒதுக்கீடு 30 சதவிகிதமாக இருந்ததை, 40 சதவிகிதமாக உயர்த்துவோம் என்று அறிவித்திருப்பது மிகுந்த மகிழ்ச்சிக்குரியது. சமூகநீதி, பாலியல் நீதிக் கொடி பறக்கத் தொடங்கிவிட்டது. பாலியல் நீதியில் ஒடுக்கப்பட்ட சமூகப் பெண்களுக்கு இட ஒதுக்கீட்டில் முன்னுரிமை தருவது முக்கியம் _ அவசரம் ஆகும்! - கி.வீரமணி, ஆசிரியர்செய்திகளை பகிர்ந்து கொள்ள

காமராசர் பற்றி தந்தை பெரியாரின் கணிப்பு!

  “தோழர்களே! எனக்கோ வயது 82 ஆகின்றது. நான் எந்த நேரத்திலும் இறந்துவிடலாம். ஆயினும் நீங்கள் இருப்பீர்கள். உங்களைவிட முதிர்ந்த நான், மரண வாக்குமூலம் போன்று ஒன்றைக் கூறுகிறேன். மரண வாக்குமூலம் கூற வேண்டிய நிலையில் உள்ளவன் பொய் சொல்ல வேண்டிய அவசியமில்லை. இன்றைய காமராசர் ஆட்சியில் நமது நாடு அடைந்துள்ள முன்னேற்றம் இரண்டாயிரம், மூவாயிரம் ஆண்டுகளில் என்றுமே நடந்ததில்லை. நமது மூவேந்தர்கள் ஆட்சிக் காலத்தில் ஆகட்டும்; அடுத்து நாயக்க மன்னர்கள், மராட்டிய மன்னர்கள், முஸ்லிம்கள், வெள்ளைக்காரர்கள் _இவர்கள் ஆட்சியில் எல்லாம் நமது கல்விக்கு வகை செய்யப்படவில்லை. தோழர்களே! நீங்கள் என் சொல்லை நம்புங்கள். இந்த நாடு உருப்பட வேண்டுமானால் இன்னும் 10 ஆண்டுகளுக்காவது காமராசரை விட்டுவிடாமல் பிடித்துக் கொள்ளுங்கள். அவரது ஆட்சி மூலம் சுகமடையுங்கள். காமராசரைப் பயன்படுத்திக் கொள்ள நாம் தவறிவிட்டால், தமிழர்களுக்கு வாழ்வளிக்க வேறு ஆளே சிக்காது.’’ (இராமநாதபுரம் மாவட்ட திராவிடர் கழகத்தின் நான்காவது மாநாடு தேவகோட்டையில் 9.7.1961இல் நடைபெற்றபோது தந்தை பெரியார் அவர்கள் பேசியது - ‘விடுதலை’ 18.7.1961) காமராஜருக்கு வாழ்த்துக் கூற வேண்டும்! கல்வி சம்பந்தப்பட்ட வரையில் எந்த நிகழ்ச்சி ஆரம்பித்தாலும் கடவுள் வாழ்த்து சொல்லுவதை நிறுத்திவிட்டு, காமராசருக்கு வாழ்த்துக் கூறவேண்டும். அவரது முயற்சியால்தான் இத்தனை பேரும் படிக்கக் கூடிய வாய்ப்புக் கிடைத்தது. அவர் காலத்தில்தான் பள்ளிகள் நாடெங்கும் திறக்கப்பட்டன. பட்டி தொட்டிகளிலெல்லாம் பள்ளிக் கூடங்கள் ஏற்படுத்தப்பட்டன. 5 மைலுக்கு ஓர் உயர்தரப் பள்ளி, 3 மைலுக்கு ஓர் உயர்தரப்பள்ளி என்று பள்ளிக்கூடங்களை ஆரம்பித்ததோடு கல்லூரி வரை இலவசக் கல்வி என்றாக்கி இதுவரை நம் மக்களின் கல்விக்கு இருந்து வந்த தடையை உடைத்தெறிந்ததன் பயன்தான் நம் மக்கள் இன்று 9 பேரிலிருந்து 50 பேர்கள் வரை படித்தவர்களாகும் வாய்ப்புக் கிடைத்தது. அதற்கு நன்றி தெரிவிக்கவே இக்காரியத்தைச் செய்த காமராசருக்கு முதலில் வாழ்த்துத் தெரிவிக்க வேண்டுமென்கிறேன். (5.7.1968 சேலம் நகராட்சி உயர்நிலைப்பள்ளியில் மாணவர் இலக்கிய மன்ற விழாவில் தந்தை பெரியார் ‘விடுதலை’ 5.8.1968)செய்திகளை பகிர்ந்து கொள்ள

பெரியார் பேசுகிறார் : கர்ப்பக்கிருகத்திற்க்குள் மட்டும் பேதம் எதற்க்காக ?

தந்தை பெரியார் இப்போது நாம் எடுத்துக் கொண்டிருக்கிற முயற்சி, கோயிலில் கர்ப்பக்கிருகம் இருக்கிற இடத்திலே நீ சூத்திரன்,- இழிஜாதிக்காரன், நீ உள்ளே நுழையக்கூடாது என்று பார்ப்பான் நம்மை இழிவுபடுத்தி வைத்திருக்கின்றதை மாற்ற வேண்டும் என்று போராட இருக்கிறோம். இதற்கு முன் தெருவிலே மனிதனை நடக்கக் கூடாது புனிதம் கெட்டுவிடும் என்று சொன்னான்; குளத்தில் தண்ணீர் எடுக்கக்கூடாது என்று வைத்திருந்தான்; ஒவ்வொரு ஊரில் ஒவ்வொரு ஜாதியார் கோயிலுக்கும் போகக்கூடாது என்று வைத்திருந்தான்; அதுபோல, சாப்பிடும் பொது இடங்களில் பார்ப்பனருக்கு வேறு இடம், நமக்கு வேறு இடம் என்று வைத்திருந்தான். இதையெல்லாம் மாற்றி விட்டோம். அதனால் ஒன்றும் புனிதம் கெட்டுவிடவில்லை. எந்த மனிதனின் மனமும் புண்படவில்லை. மதம், சம்பிரதாயம் அழிந்து பாழாகி விடவில்லை. மிகப் பெரிய புண்ணிய ஸ்தலங்களாகக் கருதப்படும் காசி, ஜெகந்நாத், பண்டரிபுரம் ஆகிய இடங்களிலிருக்கிற கோயில்களில் உள்ள சாமி சிலைகளை யார் வேண்டுமானாலும் தொட்டு வணங்கலாம் என்றிருக்கிறது. அதுபோல இங்கேயும் கர்ப்பக்கிரகத்திற்கு வெளியே இருக்கிற உருபரிவாரங்களை யார் வேண்டுமானாலும் தொடலாம். அதே சிலை கர்ப்பக்கிரகத்தில் இல்லாமல் வெளியே இருந்தால் நாய்கூட நக்கிவிட்டுச் செல்லலாம். அதனால் அந்தச் சிலையின் புனிதம் ஒன்றும் கெட்டு விடுவதில்லை. கர்ப்பக்கிரகத்திற்குள் இருப்பதைத் தொட்டால் மட்டும் எப்படிப் புனிதம் கெட்டுவிடும்? வெளியே இருக்கிற சிலைக்கு இல்லாத புனிதம் அதற்கு மட்டும் எப்படி வந்தது என்று கேட்கின்றேன்? பார்ப்பான் ஆக்கிய சோற்றை நம் கண்ணால் பார்த்தால் அதைக் கீழே கொட்டிவிடுவான். இன்று நம்முடன் வந்து உட்கார்ந்தே சாப்பிடுகின்றான்,- நாம் சமைப்பதைச் சாப்பிடுகின்றான். இப்படி உண்பதில்- பழகுவதில் எல்லாம் ஒன்றான பின் எல்லோருக்கும் பொதுவான கர்ப்பக்கிருகத்திற்குள் மட்டும் இந்தப் பேதம் எதற்காக என்று கேட்கின்றேன்? ஜாதி இழிவை, சூத்திரத் தன்மையை நிலைநிறுத்த அல்லாமல் வேறு எதற்காக? வேறு என்ன அவசியத்திற்காக இங்கு மட்டும் நாம்  போகக் கூடாது என்பது? என்று நம் மக்கள் நன்கு சிந்திக்க வேண்டும். சிலர் நகை இருக்கிறது, அதனால்தான் எல்லோரும் வரக்கூடாது என்று சமாதானம் சொல்கிறார்கள். உன் சாமிக்கு  நகை போட்டிருக்கிறாய் என்பதற்காக நான் சூத்திரன் என்பதை ஒப்புக் கொள்வதா? இடம் சிறிதாக இருக்கிறது, அதிகம் பேர் உள்ளே போக முடியாது என்றால், ஒவ்வொருவராகச் சென்று தொட்டுக் கும்பிட்டு வருகிறார்கள். நகை இருக்கிறது என்றால் இரண்டு போலீசைப் போட்டுப் பாதுகாத்துக் கொள். இவற்றிற்காக நாங்கள் எங்கள் மானத்தை இழக்கத் தயாராக இல்லை. மொழிக்காகப் போராட்டம் என்கின்றார்கள். இன்றைக்கும் அநேகக் கோயிலில் பார்ப்பான் சமஸ்கிருதம் சொல்லிக்கொண்டு பூசை செய்கிறான். எதற்காகத் தமிழ்நாட்டில் இப்படி நடக்க வேண்டும்? என்று இதுவரை எவனுமே கேட்க வில்லை. இந்த அரசாங்கம்- நம் அரசாங்கம். சும்மா விட்டுவிடும் என்று கருதவில்லை. அவர்கள் கடமையை அவர்கள் செய்வார்கள். அதுபற்றி நாம் அரசாங்கத்தைக் குறை கூறப் போவதில்லை. காந்தி தாழ்த்தப்பட்ட மக்களுக்காகத் தனிக் கிணறு, தனிக்கோயில், தனிப் பள்ளிக்கூடம், தனிக் குளம் வெட்டுவது என்று அதற்காக ஒரு இலட்சத்திற்கும் மேல் பணம் ஒதுக்கி அந்தப் பணத்தை என்னிடம் கொடுத்தார்கள். நான் ஆதிதிராவிடர் மக்களுக்குத் தனியாகப்  பள்ளிக்கூடம் கிணறு கட்டுவதை விரும்பவில்லை. அதை அப்படியே திருப்பிக் கொடுத்து விட்டேன். நாம் கர்ப்பக்கிருகத்திற்குள் போக வேண்டுமென்பது கடவுள் நம்பிக்கைக்காக, பக்திக்காக, புண்ணியம் சேர்ப்பதற்காகப் போக வில்லை. அதில் உள்ள அவமானத்தை நீக்க வேண்டும் என்பதற்காகப் போகிறோம். திறந்து விட்டுவிட்டால் அதனால் என்ன பலன் என்று கேட்பீர்கள். சாமிக்கு இருக்கிற யோக்கியதையே போய் விடும். பார்ப்பானுக்கிருக்கிற உயர்ஜாதித் தன்மையும் போய் விடும். பார்ப்பானே வெளியே வந்து அங்குக் கடவுள் இல்லை, கல்தான் இருக்கிறது என்று சொல்வான். உனக்குத்தான் சாமி இல்லையே,- நீ ஏன் அங்குப் போகிறாய் என்று கேட்கிறான். மானம் இருப்பதால் போகிறேன். மானம் இல்லாத தால், அறிவு இல்லாததால், இழிவைப்பற்றிச் சிந்திக்காததால் நீ வெளியே நிற்கிறாய்-  என்று சொல்வேன். நாம் போவதற்கு உரிமை வந்துவிட்டால், பிறகு பூசை செய்கிற உரிமை நமக்குத் தானாகவே வந்து விடும். மொழிக்காகச் சத்தம் போடுகிறாய்; கோயிலிலே சமஸ்கிருதத்திலே மந்திரம் சொல்கின்றான். அதுபற்றி எவனுமே சிந்திப்பது கிடையாது. தமிழில் சொல்லக் கூடாது என்கின்ற ஏற்பாடு பார்ப்பானாகச் செய்து கொண்டதே தவிர, சாஸ்திரத்தில் கிடையாது. இதெல்லாம் வளர்ந்தால் மனிதனுக்கு இருக்கிற மூடநம்பிக்கை போய்விடும்; பூச்சாண்டி போய்விடும். சமுதாயத் துறைக்காக இந்த நாட்டிலே என்னைத் தவிர எவனய்யா பாடுபட்டான்? பந்தயம் கட்டிக் கேட்கிறேன், எவன் பாடுபட்டான்? நீங்களெல்லாம் மதம் போச்சு, கடவுள் போச்சு என்று பயப்படாதீர்கள். கடவுள் உண்மையில் இருந்தால் அதை ஒழிக்க யாராலும் முடியாது. அது போன்றுதான் இந்து மதம் என்பதும், இல்லாத ஒரு கற்பனையாகும். என்று தெளிவாக எடுத்துவிளக்கி இழிவு நீக்கக் கிளர்ச்சியில் எல்லா மக்களும் பங்கேற்க முன்வர வேண்டும். (26.10.1969 அன்று வேலாயுதம்பாளையம் நாகம்மையார் திடலில் ஈ.வெ.ரா.பெரியார் அவர்கள் ஆற்றிய சொற்பொழிவு) - ‘விடுதலை’, 7.11.1969செய்திகளை பகிர்ந்து கொள்ள

எத்தர்களை முறியடிக்கும் எதிர்வினை (85)

ஆங்கில ஆட்சியை ஆதரித்த பாரதி! நேயன் 1920டிசம்பர் 1 ஆம் தேதியன்று பாரதியார் ‘சுதேசமித்திரன்’ ஏட்டில் ‘திராவிடக் கக்ஷி’ என்ற தலைப்பிலே ஒரு கட்டுரை எழுதியிருந்தார். அதில் ஆரியர் _ திராவிடர் என்பதெல்லாம் பொய் என்றும், கிறித்துவப் பாதிரிகள் இந்து மதத்தை அழிக்க இக்கதைகளைக் கட்டி விட்டதாகவும் கூறுகிறார். அன்று பாரதி கூறிய இந்தக் கருத்தைத்தான் இன்றைய ஆர். எஸ். எஸ். காரர்களும் வேதவாக்காகக் கொண்டுள்ளனர். பாரதி தன் ஜாதிக்கு உயர்வு வேண்டும் என்கிற போது மூச்சுக்கு முந்நூறு தரம் ஆரியர் வீரத்தைப் பற்றிப் பேசுகிறார். அதற்கு எதிர்ப்பாகத் திராவிடர்கள் கட்சியைத் தொடங்கியவுடன் ஆரியர் _ திராவிடர் போராட்டம் பொய்க்கதை என்றும் கிறித்துவப் பாதிரிகளின் தூண்டுதல் என்றும் கதை அளக்கிறார். பாரதிக்குத் திராவிடர் இயக்கத்தின் மீது எவ்வளவு வெறுப்பு இருந்தது என்பதை, அவர் நண்பர் ஆர்.சீனிவாசவரதன் கூறுவதன் மூலம் அறிய முடிகிறது. அவர் 1920இல் திருநெல்வேலியில் நடைபெற்ற தமிழ்நாடு மாகாண காங்கிரசு மாநாட்டுக்குச் சென்று விட்டுத் திரும்புகையில் கடயத்தில் பாரதியைச் சந்தித்த போது நடந்த சம்பவம் இது. “பாரதியிடம் அவ்வூர் அன்பர்கள் சிலர் வந்தனர். நடந்த சம்பாஷணையிலிருந்து அவர்கள் ஜஸ்டிஸ் கட்சியைச் சேர்ந்தவர்கள் போலத் தோன்றிற்று. அன்பர்களே! ஆரியர்களுக்கு முன்னால் திராவிடர்கள்; அவர்களுக்கு முன்னால் ஆதித் திராவிடர்கள்; அதற்கு முன் இருந்தது மிருகங்கள்; ஜீவராசிகள். அவை வாழ்ந்த இடத்தை வெட்டித் திருத்தி வீடு கட்டிப் பயிர் செய்து நாம் வாழ்கின்றோம். அவை உரிமை கொண்டாடினால் அனைவரும் அவைகளிடம் விட்டு விட்டுப் போக வேண்டியதுதான்’’ என்று பாரதி கூறினார் என்கிறார். தமிழர்கள் இந்தியாவின் பூர்வீக குடிகள்; ஆரியர்கள் வந்தேறிகள் என்ற அப்பட்டமான உண்மையை ஏற்க மனமின்றி, இப்படிப்பட்ட பித்தலாட்ட வாதம் செய்கிறார் பாரதி. டாக்டர் டி. எம். நாயர் ‘ஜஸ்டிஸ்’ இதழில் திராவிடருக்குத் தனிநாடு கொடுக்க வேண்டும் என்று எழுதியிருந்தார். அதைக் கிண்டலடித்துப் பாரதி கூறியது இது. இப்படிப்பட்ட பாரதியைத்தான் நம்மில் பலர் போற்றுகிறார்கள் என்பது வேதனையாக உள்ளது. திராவிட இயக்கத்தின் தலைவர்களைத் தேச விரோதிகள் என்கிறார் பாரதியார். “டாக்டர் நாயரைத் தலைமையாகக் கொண்ட திராவிடக் கக்ஷியார் என்ற போலிப்பெயர் புனைந்த தேச விரோதிகளுக்கு நான் சார்பாகி ஆர்ய பாஷா விரதம் பூண்டு பேசுகிறேன் என்று நினைத்து விடலாகாது’’ என்று கூறுகிறார் பாரதியார். டாக்டர் நாயர், தியாகராய செட்டியார் போன்றவர்களெல்லாம் 1916 வரையில் காங்கிரசில் இருந்தவர்கள்தான். அதில் பார்ப்பனர்களின் ஆதிக்கத்தைத் கண்டு சகிக்க முடியாமல் தான் 1916இல் திராவிடர் இயக்கத்தைத் தொடங்க வேண்டிய நிலைக்கு ஆளானார்கள். டாக்டர் நாயர் சுயநலமே இல்லாதவர் என்பதைப் பாரதியே 1906இல் எழுதியுள்ளார். 1906ஆம் ஆண்டு சென்னை நகராட்சி உறுப்பினர்களில் இருந்து ஒருவரைச் சட்டசபைக்கு அனுப்ப வேண்டும். அன்று 32 உறுப்பினர்கள் வந்திருந்தனர். அவர்களில் நால்வர் போட்டியிட்டனர். முதல் முறை ஓட்டு வாங்கிய விவரம்: டாக்டர் டி.எம்.நாயர் -_ 10 பி.எம்.சிவஞான முதலியார் _ 10 ஸர் வி.ஸி. தேஸிகாச்சாரி _ 6 சர்.பிட்டி தியாகராய செட்டியார் _ 5 கூடுதல் _ 31 16 ஓட்டுக்குமேல் வாங்கினால்தான் ஒருவராவது சட்டமன்றத்திற்குச் செல்ல முடியும். எனவே தியாகராய செட்டியார் தாமாகவே போட்டியிலிருந்து விலகிக் கொண்டார். இரண்டாம் முறை ஓட்டுகள் பெற்ற விவரம்: டாக்டர் டி எம். நாயர் _ 14 பி.எம். சிவஞான முதலியார் _ 11 ஸர். வி.ஸி. தேஸிகாச்சாரி _ 7 கூடுதல் _ 32 சபைத் தலைவர், குறைவாக ஓட்டு வாங்கிய தேசிகாச்சாரியாரை விலகிக் கொள்கிறாரா என்றார். அவர் விலக மறுத்துவிட்டார். இதேநிலை நீடித்தால் மாநகராட்சியின் சார்பாக ஒருவரும் சட்டமன்றம் செல்ல முடியாது. எனவே, டாக்டர் டி. எம். நாயர் அதிக வாக்குகள் பெற்றும், தான் போட்டியிலிருந்து விலகிவிட்டார். அந்த நேரத்தில் பாரதி எழுதியதாவது: “தக்க சமயத்தில் டாக்டர் நாயர் விலகிக் கொள்ளாவிட்டால் சரியான மெஜாரிட்டி (16 வோட்டு) எவருக்கும் கிடைக்காமல் கார்ப்பரேஷன் மெம்பர் சட்டசபையில் இருப்பதற்கே இடமில்லாமல் போயிருக்கும். அதனால் கார்ப்பரேஷனுக்குப் பெருத்த அவமானம் ஏற்பட்டிருக்கும். அந்த அவமானம் ஏற்படாமல் தடுத்த பெருமை டாக்டர் நாயருக்கே உரித்தாகும். என்ற போதிலும் மிகவும் தகுதி பெற்றவரும் அதிக வோட்டுகள் பெற்றவருமாகிய டாக்டர் நாயர் விலகிக் கொண்டமை மிகுந்த வருத்த முண்டாக்குகிறது.’’ இப்படி 1906இல் டாக்டர் நாயரைப் பற்றிப் பெருமையாக எழுதிய பாரதி 1917இல் டாக்டர் நாயரைத் தேசவிரோதி என்று எழுதுகிறார் என்றால் என்ன காரணம்? திராவிடர்கள் தனி இயக்கம் தொடங்கி விட்டார்களே என்ற ஆத்திரம்தானே! வேறு என்ன காரணம் இருக்க முடியும்? 1916 காலக் கட்டத்தில் பாரதி பெரிய ஏகாதிபத்திய எதிர்ப்பு வீரரா என்ன? இல்லையே! நீதிக்கட்சி தொடங்கப்பட்ட காலக்கட்டத்தில் 1916 டிசம்பர் 26இல் பாரதி, ‘சுதேசமித்திரன்’ ஏட்டில் ஆங்கிலேயர் வெளியேற வேண்டாம் என்றுதானே எழுதியுள்ளார்! “எல்லா ஜாதியாரும் சீட்டுப் போட்டுப் பிரதிநிதிகள் குறிக்க வேண்டும். அந்தப் பிரதிநிதிகள் சேர்ந்ததொரு மஹாசபை வேண்டும். ராஜ்யத்தில் வரவு- _ செலவு உள்பட எல்லா விவகாரங்களும் மேற்படி மஹாசபையார் இஷ்டப்படி நடக்க வேண்டும். அவ்வளவுதான், மற்றபடி, ஆங்கிலேயர் சாம்ராஜ்யத்தை விட்டு விலக வேண்டுமென்ற யோசனை எங்களுக்கில்லை’’ என்கிறார் பாரதி. 1916ஆம் ஆண்டிலேயே ஆங்கிலேயர் வெளியேற வேண்டிய அவசியம் இல்லை என்று சொன்ன பாரதி நீதிக்கட்சித் தலைவர்களைத் தேசவிரோதிகள் என்று கூறுவது பார்ப்பனச் ஜாதிவெறி ஒன்றைத் தவிர வேறென்ன? நீதிக்கட்சி அமைச்சரவை அமைந்த போது அதையும் கிண்டலாகவும், குத்தலாகவும் எழுதுகிறார் பாரதி. “புதிய யுகம் வரப்போகிறது; மாண்டேகு ஸ்வராஜ்யக் குட்டி போடப் போகிறார் என்று சத்தம் போட்டதெல்லாம் கடைசியாக வெங்கட்ட ரெட்டி, ஸுப்பராயலு ரெட்டி, ராமராயனிங்கார் என்ற மூவரும் நம்முடைய மாகாணத்துக்கு மந்திரிகளாக வந்திருக்கிறார்கள் இஃதென்ன விநோதம்’’ என்கிறார் பாரதியார். பாரதியார் டிராம் வண்டியில் செல்வது போலவும் எதிரிலே இரண்டு பேர் உரையாடுவது போலவும் ஒரு கற்பனைச் சித்திரம் வரைந்துள்ளார். அதிலே ஒரு முதலியார் கூறுவதாகப் பாரதி எழுதுகிறார்: “பிராமணர்கள் வந்தால் அதிகமாக ஆங்கிலேய உத்தியோகஸ்தருக்கு அடிமைப்பட மாட்டார்கள். எனவே, ஜனங்களுக்குக் கொஞ்சம் நியாயம் கிடைக்கும். மற்றக் கூட்டத்தார் இன்னும் சரியாகப் படிக்கவில்லை.’’ கலாசாலை மாணாக்கராகிய ஒரு அய்யர் கூறுவதாகப் பாரதி எழுதுவதாவது: “பிராமணரைத் தவிர வேறு ஜாதியாரை நியமிப்பதில் பிராமண துவேஷம் ஒன்றையே பெருங்கடமையாகவும் பரம தர்மமாகவும், ஜன்ம லக்ஷ்யமாகவும் நினைக்கிறவர்களை விட்டு, இதர ஜாதியாரிலும் பிராமண துவேஷ மில்லாதவர்களையே லார்ட் வில்லிங்டன் நியமித்திருக்க வேண்டும்’’ என்றார். (தொடரும்...)செய்திகளை பகிர்ந்து கொள்ள

முகப்புக் கட்டுரை : சமூக நீதி நாள் மாட்சியும் காட்சியும்

மஞ்சை வசந்தன் தந்தை பெரியார் பிறந்த நாளான செப்டம்பர் 17ஆம் நாளை ஆண்டுதோறும் ‘சமூகநீதி நாள்’ ஆகக் கடைப்பிடிப்பது, உறுதிமொழி மேற்கொள்வது என ‘சமூகநீதிக்கான சரித்திர நாயகர்’ முதலமைச்சர் மு.க.ஸ்டாலின் அவர்களால் சட்டமன்றத்தில் அறிவிக்கப்பட்டு, 13.9.2021 அன்று தமிழ்நாடு அரசு ஆணை வெளியிட்டது. அதனையொட்டி சென்னை பெரியார் திடலில் திராவிடர் கழகத் தலைவர் ஆசிரியர் கி.வீரமணி அவர்கள் தலைமையில் காலை 10:00 மணியளவில் வேப்பேரி பெரியார் ஈ.வெ.ரா. நெடுஞ்சாலையில் அமைந்துள்ள அன்னை மணியம்மையார் சிலைக்கு மாலை அணிவித்தும், பின்னர் பெரியார் திடலில் உள்ள 20 அடி உயர முழு உருவ தந்தை பெரியார் சிலைக்கு மாலை அணிவித்தும், தந்தை பெரியார், அன்னை மணியம்மையார், சுயமரியாதைச் சுடரொளிகள் ஆகியோர் நினைவிடங்களில் மலர் வளையம் வைத்தும் மரியாதை செலுத்தப்பட்டது. தந்தை பெரியார் நினைவிடத்தில் மரியாதை தந்தை பெரியார் நினைவிடத்தில் தமிழர் தலைவர் ஆசிரியர் மலர்வளையம் வைத்து மரியாதை செலுத்திய பின், தமிழர் தலைவர் தலைமையில் சமூகநீதி நாள் உறுதிமொழியான:- “பிறப்பொக்கும் எல்லா உயிர்க்கும் என்ற அன்பு நெறியும் - யாதும் ஊரே யாவரும் கேளிர் என்ற பண்பு நெறியும் எனது வாழ்வியல் வழிமுறையாகக் கடைப்பிடிப்பேன்! சுயமரியாதை ஆளுமைத் திறனும்-பகுத்தறிவுக் கூர்மைப் பார்வையும் கொண்டதாக என்னுடைய செயல்பாடுகள் அமையும்! சமத்துவம், சகோதரத்துவம், சமதர்மம் ஆகிய கொள்கைகளுக்காக என்னை நான் ஒப்படைத்துக் கொள்வேன்! மானுடப் பற்றும் மனிதாபிமானமும் ஒன்றே எனது இரத்த ஓட்டமாக அமையும்! சமூகநீதியையே அடித்தளமாகக் கொண்ட சமுதாயம் அமைக்கும் எனது பயணம் தொடர இந்த நாளில் உறுதியேற்கிறேன்!” என கழகத் தலைவர் ஆசிரியர் கி.வீரமணி அவர்கள் சொல்ல கழகத் தோழர்கள் உறுதி மொழி ஏற்றனர். மகளிரணி சார்பில் ச.இன்பக்கனி, அ.அருள்மொழி தலைமையிலும், திராவிடர் கழக வழக்குரைஞரணி சார்பில் த.வீரசேகரன் தலைமையிலும், திராவிடன் நல நிதி சார்பில் அருள்செல்வன் தலைமையிலும், திராவிட தொழிலாளரணி சார்பில் திருச்சி சேகர் தலைமையிலும், மலர் வளையம் வைத்து மரியாதை செலுத்தினர். அதனைத் தொடர்ந்து, மறுமலர்ச்சி திராவிட முன்னேற்றக் கழகம் சார்பில் அதன் பொதுச்செயலாளர் மாநிலங்களவை உறுப்பினர் வைகோ, விடுதலை சிறுத்தைகள் கட்சித் தலைவர், நாடாளுமன்ற உறுப்பினர் எழுச்சித் தமிழர் தொல்.திருமாவளவன், மார்க்சிஸ்ட் கம்யூனிஸ்ட் கட்சியின் சார்பில் அதன் தலைமைக் குழு உறுப்பினர் ஜி.இராமகிருஷ்ணன், இந்திய கம்யூனிஸ்ட் கட்சியின் மாநில செயலாளர் இரா.முத்தரசன், திராவிட இயக்கத் தமிழர் பேரவை பொதுச் செயலாளர் பேராசிரியர் சுப.வீரபாண்டியன் ஆகியோர் மலர் வளையம் வைத்தும் உறுதிமொழி கூறியும் மரியாதை செலுத்தினர். அதன் பின்னரும் பல்வேறு அமைப்பினரும், பெரியார்  பற்றாளர்களும், பொதுமக்களும் என அன்றைய தினம் முழுவதும் பெரியார் திடலுக்கு வந்து தந்தை பெரியாருக்கு மரியாதை செலுத்திய வண்ணமிருந்தனர். நூல் வெளியீடு காலை 11:00 மணியளவில் பெரியார் திடல் நடிகவேள் எம்.ஆர்.இராதா மன்றத்தில், தந்தைபெரியார் வாழ்க்கைக் குறிப்புகள் மற்றும் வைக்கம் போராட்டம் தலைப்பில் ஜப்பானிய மொழியில் இரண்டு புத்தகங்கள் வெளியீட்டு விழா தமிழர் தலைவர் தலைமையில் நடைபெற்றது. தமிழ்நாடு இந்து சமய அறநிலையத்துறை அமைச்சர் பி.கே.சேகர்பாபு நூல்களை வெளியிட்டு உரையாற்றினார். ஜப்பானியத் தூதரக கலாச்சார மற்றும் தகவல் பிரிவு ஆராய்ச்சியாளர், ஆய்வாளர் செல்வி மியூகி இனோஉவே சான் நூல்களைப் பெற்றுக்கொண்டு உரையாற்றினார். அமைச்சர் பி.கே.சேகர்பாபு, மியூகி இனோஉவே சான் ஆகியோருக்கு திராவிடர் கழகத் தலைவர் தமிழர் தலைவர் ஆசிரியர் அவர்கள் பயனாடை அணிவித்து சிறப்பு செய்தார். திராவிடர் கழகத் துணைப் பொதுச் செயலாளர் பொறியாளர் ச.இன்பக்கனி வரவேற்றார். கழகத் துணைத் தலைவர் கவிஞர் கலி.பூங்குன்றன் நோக்கவுரை ஆற்றினார். சமூக நீதி நாள் உறுதி மொழியை கழகத் துணைத் தலைவர் கூற பார்வையாளர்கள் உள்ளிட்ட அனைவரும் எழுந்து நின்று அரங்கம் அதிர உறுதிகூறினர். திராவிடர் கழக தொழில் நுட்பப்பிரிவு வி.சி.வில்வம், ÔவரலாறுÕ இணைய இதழாசிரியர்  ச.கமலக்கண்ணன் ஆகியோரின் உரையைத் தொடர்ந்து ஜப்பானியர் கோரோ ஒசிதா உரையாற்றினர். தமிழர் தலைவர் ஆசிரியர் கி.வீரமணி அவர்கள் எழுதிய ‘கற்போம் பெரியாரியம்‘ நூல் வெளியீடு திராவிட இயக்கத் தமிழர் பேரவைப் பொதுச்செயலாளர் பேராசிரியர் சுப.வீரபாண்டியன் நூலை வெளியிட்டு உரையாற்றினார். உலகத் தமிழாராய்ச்சி நிறுவனத்தின் உதவிப் பேராசிரியர் முனைவர் நா.சுலோசனா நூலைப் பெற்றுக்கொண்டார். தந்தைபெரியார் 143ஆம் ஆண்டு பிறந்த நாள் ‘விடுதலை’ மலர் வெளியீடு கரூர் மக்களவை உறுப்பினர் செ.ஜோதிமணி மலரை வெளியிட்டு உரையாற்றினார். சிறப்புவிருந்தினர்கள் அனைவருக் கும் கழகத் தலைவர் தமிழர் தலைவர் ஆசிரியர் அவர்கள் பயனாடை அணிவித்து சிறப்பு செய்தார். விழாவுக்குத் தலைமை ஏற்ற திராவிடர் கழகத் தலைவர் ஆசிரியர் மானமிகு கி. வீரமணி அவர்கள் அய்ந்து தீர்மானங்கள் என்ற ஓர் அறிவிப்பைத் தந்தார். (1) தந்தை பெரியார் பிறந்த நாளை “சமூகநீதி நாளாக” அறிவித்து அரசுப் பணியாளர்களை உறுதிமொழி எடுக்கச் செய்த தமிழ்நாடு அரசுக்கு _ சிறப்பாக மானமிகு மாண்புமிகு முதல் அமைச்சர் மு.க. ஸ்டாலின் அவர்களுக்குப் பாராட்டுத் தெரிவிப்பதோடு இடஒதுக்கீடு சரிவரப் பின்பற்றப்படுகிறதா என்பதைக் கண்காணித்திட கண்காணிப்புக் குழு அமைக்கப் பட்டதை வரவேற்கிறது. ஒன்றிய அரசும் இது போன்ற கண்காணிப்புக் குழுவை ஏற்படுத்த வேண்டும் என்பதும் அத்தீர்மானத்தின் முக்கிய பகுதியாகும். (2) அடல்பிஹாரி வாஜ்பேயி பிரதமராக இருந்து பொதுத்துறையை விற்பதற்கென்றே (Disinvestment)  ஒரு தனித்துறை உருவாக்கப் பட்டது (அருண்ஷோரி என்பவர் அத்துறைக்கான அமைச்சராகவும் இருந்தார்). வாஜ்பேயி அரசு சொத்துகளை விற்றது என்றால் தற்போதைய நரேந்திர மோடி தலைமையிலான தேசிய ஜனநாயகக் கூட்டணி அரசு (NDA) அரசு சொத்துகளை அடமானம் வைக்கும் வேலையில் ஈடுபட்டுள்ளது. அரசுத்துறை தனியார் கைக்கு மாற்றப்படும்போது இட ஒதுக்கீடு முற்றிலும் ஒழிக்கப்படுகிறது. ஏன் எனில் தனியார் துறையில் இடஒதுக்கீடு இல்லை. இந்நிலையில் தனியார் துறைகளிலும் இடஒதுக்கீடு தேவை என்பதை வற்புறுத்துகிறோம். 3) சமூகநீதி என்று சொல்லும் பொழுது - அது பாலியல் நீதியையும் உள்ளடக்கியதாக இருக்க வேண்டும். 4) நீதித்துறையில் தற்போது மாவட்ட நீதிபதிகள் வரை இட ஒதுக்கீடு நடைமுறையில் உள்ளது. ஆனால் உயர்நீதி மன்றங்களிலும், உச்சநீதிமன்றத்திலும் நீதிபதிகள் நியமனத்தில் இட ஒதுக்கீடு பின்பற்றப்படுவதில்லை. இந்த நிலையில் உயர்நீதிமன்றங்களிலும், உச்சநீதி மன்றத்திலும் நீதிபதிகள் நியமனத்தில் இட ஒதுக்கீடு அவசியம்பின்பற்றப்பட வேண்டும் என்று வலியுறுத்துகிறது. 5) ‘நீட்’ தேர்வு என்பது சமூகநீதிக்கு எதிரானது என்றும், ‘நீட்’ ஒன்றும் தகுதிக்கு அளவுகோல் இல்லை என்றும், ‘நீட்’ கேள்வித்தாள் 34 லட்சம் ரூபாய்க்கு விற்கப்படுவதும் - இது யாருக்குப் பயன்படக்கூடியது என்பதும் விளங்கக் கூடியதாகும். முறைகேடுக்கு அப்பாற்பட்ட முறையே ‘நீட்’ என்பது சுத்தப் புரட்டு என்பதும் அம்பலமாகிவிட்டது. மாணவர்கள் மத்தியில் தற்கொலை எண்ணிக்கையும் அதிகரித்து வருவதைச் சுட்டிக் காட்டி இது தொடர்பாக மக்கள் கருத்தைப் பெரும் அளவில் உருவாக்கிட சமூகநீதியில் ஒத்த கருத்துள்ளவர்களை ஒருங்கிணைத்து முடிவு செய்யும் வகையில் வரும் 21ஆம் தேதி காலை 10:30 மணி அளவில் சென்னையில் பெரியார் திடலில் திராவிடர் கழகத்தின் சார்பில் அனைத்துக் கட்சிக் கூட்டம் ஏற்பாடு செய்யப்பட்டுள்ளது என அய்ந்து முக்கிய தீர்மானங்கள் நிறைவேற்றப்பட்டன. ஜப்பானிலிருந்து கோரா ஒசிதா இந்நிகழ்வில் காணொலி மூலம் ஜப்பானில் இருந்து வாழ்த்துரை வழங்கிய கோரா ஒசிதா தம் உரையில், “நான் நாற்பத்தி நான்கு ஆண்டுகள் டோக்கியோவில் துப்புரவுப் பணியில் இருந்துள்ளேன். இப்போது ஜப்பானில் நிகழும் மனித உரிமைப் பிரச்சினை களுக்கான தீர்வுகளுக்காக இயங்கி வருகிறேன். இந்தியாவிற்கு குறிப்பாக சென்னைக்கு அய்ந்து முறை என் பணி சார்ந்து பயணம் செய்துள்ளேன். சென்னையில் இயங்கும் தாழ்த்தப்பட்டோர் இயக்கங்களுடன் இணைந்து, குழந்தைகளுக்கான கல்வி உதவி பெற்றுத் தருவதில் பணி புரிந்திருக்கிறேன். ‘Sanitation Workers Soceity For Human Rights’ என்கிற அமைப்பின் தலைவராகவும் இருந்து வருகிறேன். இந்தியாவில் ஜாதிய அடக்குமுறைக்கு ஆளான பெரும் சமூகமாக, அதிலும் தாழ்த்தப்பட்ட மக்களிடையிலும்கூட ஒடுக்கப்பட்ட சமூகமாகத் துப்புரவுப் பணி யாளர்கள் இருப்பதையும் நான் பார்த்திருக்கிறேன். ஜப்பானிலுள்ள துப்புரவுப் பணியாளர்களின் உரிமைக்காக பாடுபடும் இயக்கத்தை சார்ந்தவன் என்கிற முறையில், இந்தியாவிலுள்ள சக தோழர்களின் உரிமைகளுக்கு எப்படியெல்லாம் உதவலாம் என்று தொடர்ந்து இயங்கி வருகிறேன். மனித உரிமைக்காக ஜப்பானில் தொடர்ந்து இயங்குவதோடு, உலகின் எந்த மூலையில் இவ்வகைப் பிரச்சினை இல்லாது ஒழிக்கும் வகையில் பாடுபடுவேன் என்று உறுதி கூறுகிறேன்’’ என கோரா ஒசிதா பேசினார். பெரியார் உலகமயம்! தொடர்ந்து வாழ்த்துரை வழங்கிய ஜப்பானியர் ஜூன்இச்சி ஹூக்காவோ, “நான் தஞ்சாவூர் தமிழ்ப் பல்கலைக் கழகத்தில் தமிழ் ஆய்வுப் படிப்புப் படித்தேன். அங்கு இருக்கும் போது பெரியார் குறித்துப் படித் திருக்கிறேன். பெரியார் மற்றும் பொதுவுடைமைத் தோழர்களுடன் நட்பில் இருந்தேன். உலகம் முழுக்க சமநீதி என்பது கண்டிப்பாகத் தேவை! பெரியார் கொள்கைகளை உலகம் முழுவதும் எடுத்துச் செல்ல வேண்டும்’’ என்றார்! ஜப்பான் மொழியில் பெரியார் பெரியார் நூல்களை ஜப்பானிய மொழியில் மொழி பெயர்த்த ஜப்பான் வாழ் தமிழர் ச.கமலக்கண்ணன் பேசும் பொழுது, “சமூகநீதி நன்னாளில் சுயமரியாதைச் சுடரொளியைப் போற்றும் இத்திராவிடத் திருவிழாவிற்குப் பெருமை சேர்த்துக் கொண்டிருக்கும் அவையத்து ஆன்றோர் அனைவரையும் வரலாறு.காம் சார்பில் வணங்கி மகிழ்கிறேன். 2004ஆம் ஆண்டு நண்பர்களுடன் இணைந்து துவங்கிய வரலாறு.காம் மின்னிதழில் சோழர் காலக் கட்டடக்கலை மற்றும் வரலாறு தொடர்பாகப் பல கட்டுரைகளை எழுதியிருந்தாலும், பெரியார் டென்கி மற்றும் வைக்கம் நோ ஹெய்ஷி ஆகிய இந்நூல்கள் தான் என் உழைப்பைத் தாங்கி அச்சில் வரும் முதல் நூல்கள். இதற்கான வாய்ப்பை வழங்கிய திராவிடர் கழகத்திற்கு நன்றி கூறும் இவ்வேளையில், என் சிந்தனைக்கும் எழுத்துக்கும் உரமிட்ட இரு நல்ல உள்ளங்களை நினைவு கூர வேண்டிய கடமையும் எனக்கு உள்ளது. சிறு வயது முதலே எதற்கும் யாருடைய தயவையும் எதிர்பார்த்து இருக்காதே, யாரிடமும் உதவியைப் பெற தன்மானத்தை விட்டுக் கொண்டிருக்காதே எனத் தற்சார்பையும், சுயமரியாதையையும் என்னுள் விதைத்த என் தந்தையார் என் முதல் நூலைக் காண இப்போது இல்லை என்ற வருத்தம் மேலிடுகிறது. இரண்டாமவர் திருச்சிராப்பள்ளி டாக்டர் மா. இராசமாணிக்கனார் வரலாற்றாய்வு மய்ய இயக்குநர் முனைவர் இரா. கலைக்கோவன் அவர்கள். வரலாற்று ஆய்வையும், ஆய்வு நெறிமுறைகளையும் எனக்குக் கற்றுக் கொடுத்தவர். என் எழுத்துகள் மேம்பட உதவிய அவருக்கு இந்நிகழ்ச்சியில் நேரில் கலந்து கொள்ள இயலாத வருத்தத்துடன் நன்றி கூறி என் உழைப்பை இருவருக்கும் சமர்ப்பிக்கிறேன். இந்தியத் துணைக் கண்டத்தில் இருந்தாலும், தமிழ்நாடு தனித்தன்மை யுடையது. வள்ளலார் போன்றோர் இத்தமிழ் மண்ணில் சமநீதியைப் பேசி இருந்தாலும், பெரியாரின் சிந்தனை ஓட்டமும், சமூகநீதிக் கண்ணோட்டமும் முற்றிலும் வேறானது. முற்றிலும் வேறான பின்புலம் கொண்ட மக்களுக்குப் புரிய வைக்க வேண்டும் என்ற பணி மிகப்பெரிய சவாலாக இருந்தது.  உதாரணமாக ஆலய நுழைவு என்பது ஒரே சொல்லில் இன்று தமிழ்நாட்டில் எளிதாகப் புரிந்து கொள்ளப்படக் கூடியது. ஆனால், இப்பிரச்சினை இல்லாத ஜப்பானியர்களுக்கு இதன் பின்புலத்தை விளக்க வேண்டியது அவசியமாகிறது. இம் மூலநூலில் இத்தகைய பின்புல விளக்கங்கள் எளிதான நடையில் எழுதப்பட்டிருந்தது எங்களுக்கு உதவியாக இருந்தது. இதற்கு எதிர்மாறானதும் உண்டு. சுயமரியாதைத் திருமணம் என்பது இயல்பான ஒன்றாக மாற பெரியார் பட்டபாடுகள் தமிழ்நாட்டில் வாழும் இன்றைய தலைமுறைக்கே புரிந்து கொள்ளக் கடினமானது. கடந்த அரை நூற்றாண்டில் இத்தகைய திருமணம் ஜப்பானில் நடைமுறையாகி விட்டது. திருமணம் செய்வதும், குழந்தை பெற்றுக் கொள்வதும் பெண்கள் முடிவெடுக்க வேண்டிய விசயங்கள் எனப் பெரியார் சொன்னது போல இன்றைய ஜப்பானியப் பெண்கள் பொருளாதாரத் தற்சார்பு பெற்று அதே சிந்தனையைக் கொண்டிருக்கிறார்கள். எனவே, அவர்களால் இவற்றை எளிதாகப் புரிந்து கொள்ள முடியும். இந்த வாய்ப்பிற்குத் திராவிடர் கழகத்திற்கும் இம்முயற்சிக்குப் பாலமாகவும், உறுதுணையாகவும் நின்ற திரு. வி.சி.வில்வம் அவர்களுக்கும் நன்றி கூறிக் கொள்கிறேன்!’’ என்றார். மொழிபெயர்ப்பாளர் ரா.செந்தில்குமார் இந்நூல்களை மொழி பெயர்த்த ஜப்பான் வாழ் தமிழர் ரா.செந்தில்குமார் பேசும்போது, பெருமைக்குரிய இந்த அவையில் கூடியிருக்கும் அனைவருக்கும் எனது வணக்கத்தைத் தெரிவித்துக் கொள்கிறேன்.  சமூகநீதி நாளாகக் கொண்டாடப்படும் தந்தை பெரியார் பிறந்த நாளான செப் 17 ஆம் தேதியான இன்று உங்களை எல்லாம் இணையம் வழி சந்திப்பதில் பெருமகிழ்வு கொள்கிறேன். சிறு வயதிலேயே குடும்பத்தின் திராவிடப் பின்னணி காரணமாகப் பெரியார் ஒரு பிம்பமாக உள்ளேறியிருந்தார். பிறகு வாசிக்கும் வழக்கத்தினால், பெரியார் பற்றி படித்தவையெல்லாம் அவரைப் பற்றிய பெரும் வியப்பைத் தான் ஏற்படுத்தியது. 2002 ஆம் ஆண்டு டோக்கியோவிற்கு பணி நிமித்தம் வந்தடைந்தேன். அந்த காலக் கட்டத்தில் ஜப்பானி யர்களிடம் இந்தியா பற்றி பேசும் போதெல்லாம் பெரும்பாலானோருக்கு காந்தியார் அவர்களைத் தெரிந்திருந்தது. அவர்களுடைய பள்ளிப் பாடங்களிலேயே  காந்தியாரைப் பற்றிய ஓர் அறிமுகம் கிடைத்திருக்கிறது என்பதைக் கண்டேன். ஆனால், காந்தியாரை விடுத்து மற்ற தலைவர்கள் குறித்துப் பெரிய அறிமுகம் இல்லை. காந்தியாரைப் போலவே அண்ணல் அம்பேத்கரும், தந்தை பெரியாரும் இந்த மண்ணில் தோன்றிய மிக முக்கியமான வரலாற்று நாயகர்கள். தந்தை பெரியாரும்,  காந்தியாரும் ஒரு நாணயத்தின் இரு பக்கங்கள் என்றே நான் கருதுகிறேன். இவர்கள் இருவரும், ஒருவரை ஒருவர் நிரப்புபவர்கள். ‘விஹ் றீவீயீமீ வீs னீஹ் னீமீssணீரீமீ’ என்று இந்த மண்ணில் முழங்கியவர் காந்தி. அப்படியே வாழ்ந்தவர்தான் பெரியார்! மாபெரும் புரட்சியாளரான பெரியார், எதை முன்னிட்டும் மனிதன் அடிமைப்படவோ, அச்சப் படவோ கூடாது என்கிற மாபெரும் நம்பிக்கையைத் தமிழ் மண்ணில் விதைத்தவர். ஜாதியத்தின் வேரான பிராமணியத்தை எதிர்க்கின்ற மன நிலையை இந்த மண்ணில் எழுப்பியவர்.  எவையெல்லாம் சக மனிதனை இழிவுபடுத்துகிறதோ, அவையெல்லாம் தூக்கி எறியப்பட வேண்டியவை என்கிற கலகக் குரலுக்குச் சொந்தகாரர். அதே சமயத்தில் நான் சொல்கிறேன் என்பதற்காக எதையும் ஏற்க வேண்டியதில்லை, உன்னுடைய அறிவுக்கு உட்படுத்தி அதை பரீசிலனை செய், சரி என்றால் ஏற்றுக் கொள், இல்லையென்றால் நிராகரி என்று சொன்ன மாபெரும் ஜனநாயகவாதி. இன்றைக்குக் “கிச்சன்லெஸ் சொசைட்டி” பற்றி பேசுகிறோம். நூறாண்டுகளுக்கு முன்பே பெரியார் ”பெண்களை அடிமைப்படுத்தும் அடுப்பங்கரைகள் இடித்துத் தள்ளப்பட வேண்டியவை’’ என்றார். தன்னுடைய வீட்டுப் பெண்களை தான் நம்பிய, வழி நடத்திய அனைத்துப் போராட்டங்களிலும் ஈடுபடுத்தியவர். காலங்காலமாக இந்த மண்ணில் வேரூன்றிய ஆணாதிக்கத்தின் சொச்சம், எப்போதெல்லாம் என்னையும் மீறி என்னுள் எழுகிறதோ, அப்போதெல்லாம் அதன் மீது விழும் அடி பெரியாரின் கைத்தடி யினுடையது. அவ்வகையில் பெரியாருக்கு நான் நன்றிக் கடன்பட்டவன். கி.வீரமணி அவர்கள் பெரியார் பற்றிய நூலை ஜப்பானிய மொழியில் கொண்டு வர இயலுமா என்று வினவிய போது மிகுந்த மகிழ்ச்சியடைந்தேன். ஆசிரியர் வினவியது ஜூன் மாத இறுதியில். அதற்குப் பிறகும், சீரான கால இடைவெளியில் அக்கறையுடன் நூலைப் பற்றிக் கேட்டுக் கொண்டே இருந்தார். எங்களுடைய மொழி பெயர்ப்பைச் சரி பார்த்துப் பிழை திருத்திய ஆசிரியர் யுதாகோ நகனோ சான் அவர்களுக்கு எனது மனமார்ந்த நன்றியைத் தெரிவித்துக் கொள்கிறேன். இந்த நூல் ஆக்கத்திற்குக் காரணமாக இருந்த ஆசிரியர் கி.வீரமணி அய்யா அவர்களுக்கு எனது நன்றியைத் தெரிவித்துக் கொள்கிறேன்’’ என்றார். சிறந்த யூ டியூபர் (You Tuber) சமூக ஊடகத்தளமான யூடியூபில் (You Tube) மக்களுக்குத் தேவையான பகுத்தறிவுக் கருத்துகளையும், பெரியார் சிந்தனை களையும், நகைச்சுவை நையாண்டிகளை எளிய வடிவில் புரியும் வகையில் கொண்டு சேர்ப்பதில் சிறந்து விளங்கும் நபருக்கு சிறந்த‘You Tube brochure’ என்னும் இவ்விருது இந்த ஆண்டு முதல், அமெரிக்க பன்னாட்டு பெரியார் அமைப்பின் உதவியுடன் விருதும், ரூ.25,000க்கான பரிசுத் தொகையையும் அறிவித்தது. அதனை முதல் சமூகநீதி நாளான இன்று அறிமுகப்படுத்தி சிறந்த You Tuber ஆக மைனர் வீரமணி தேர்வு செய்யப்பட்டு விருது கொடுக்கப்பட்டது. கலந்து கொண்ட சிறப்பு அழைப்பாளர்களின் உரை மாண்புமிகு அமைச்சர் பி.கே.சேகர் பாபு “தந்தை பெரியாரின் கனவை வெற்றிகரமாக நிறைவேற்றிக் கொடுத்திருக்கிறார் நம்முடைய தமிழ்நாடு முதலமைச்சர் தளபதி மு.க.ஸ்டாலின் அவர்கள். நம்முடைய முதலமைச்சர் அவர்களுக்கு மிகவும் உறுதுணையாக இருப்பவர் தமிழர் தலைவர் ஆசிரியர்தான் என்றும் அமைச்சர் பி.கே.சேகர்பாபு குறிப்பிட்டார். ஆசிரியர் அவர்கள் நல்ல உடல்நலத்துடன் நூறாண்டு கண்டு நலமுடன் வாழ வேண்டும் என்றும் வாழ்த்துகிறேன்’’ என்று தன் உள்ளத்தின் உணர்வை வெளிப்படுத்தினார். பேராசிரியர் சுலோச்சனா “எங்களைப் போன்றவர்கள் படித்து ஒரு ஆராய்ச்சி நிறுவனத்தில் பேராசிரியராக வளர்வதற்குக் காரணம் தந்தை பெரியாரே _- அவர்களின் சமூகநீதிக் கொள்கையே என்று நன்றி உணர்வுடன் வெளிப்படுத்தினார். கொசுவை ஒழிக்க அதன்மூலமான சாக்கடையை ஒழிப்பதுபோல, ஜாதி சமூக அமைப்பை ஒழிக்க அதன் மூலத்தோடு போர் புரிந்தவர் தந்தை பெரியார் என்றும் பெருமைப்படக் கூறினார். பார்ப்பனர் அல்லாதாரைக் குறிக்க திராவிடர் என்பதைத் தந்தை பெரியார் பயன்படுத்தியதன் காரணத்தை  இந்நூலில் ஆசிரியர் விளக்கியுள்ளார். தந்தை பெரியார் ஒரு தொலைநோக்காளர் - சமூக விஞ்ஞானி என்பதற்கு 1938-களில் சோதனைக் குழாய்க் குழந்தை குறித்து தந்தை பெரியார் கூறிய கருத்தும் இந்நூலில் இடம்பெற்றுள்ளது. தந்தை பெரியார் தன்னைப்பற்றி சுய விமர்சனம் செய்து கொள்ளும்போது, “தான் ஓர் எழுத்தாளனோ, பேச்சாளனோ அல்ல;  கருத்தாளன்’’ என்று குறிப்பிட்டதை வியந்து பாராட்டினார் சுலோச்சனா அம்மையார். ஆசிரியர் அவர்களால் எழுதப்பட்ட இந்நூல் பள்ளிகளில் பாட நூலாக வைக்கப்பட வேண்டும் என்ற கருத்தையும் உறுதி படக் கூறினார். ஜோதிமணி எம்.பி. தந்தை பெரியார் 143 ஆம் ஆண்டு பிறந்த நாள் ‘விடுதலை’ மலரை வெளியிட்ட கரூர் தொகுதி மக்களவை உறுப்பினர் ஜோதிமணி அவர்கள் தன் உரையில் முக்கியமாகக் குறிப்பிட்டதாவது: “தந்தை பெரியார் ஒரு கலகக்காரரே தவிர, கலவரக்காரர் அல்ல. பெண்கள் விடுதலை என்று வரும்போது, பெண்களிடத்திலேகூட மனத்தடை உண்டு. அதற்கு மரபணுக்கள் நம்முள் பரம்பரையாக இருந்து வருகின்றன. அந்தத் தடைகளை உடைத்தது தந்தை பெரியாரின் கைத்தடி என்றார். ஒரு சமூகத்தின் வளர்ச்சி என்பதில் கல்வி, வேலைவாய்ப்பு, விவசாயம் இம்மூன்றும் முக்கியமானவை. ஆர்.எஸ்.எஸ். இந்த மூன்றையும் குறி வைத்துத் தாக்கி அழித்து வருகிறது என்ற நுட்பமான கருத்தினை அவர் பதிவு செய்தார். தங்கள் கலாச்சாரத்தைத் தவிர, வேறு கலாச்சாரம் தலைதூக்கக் கூடாது என்பதிலே பாசிச சக்திகள் கவனமாக இருக்கின்றன. கீழடி ஆய்வு தடைபட்டதற்கும், அதன் அதிகாரி அந்த இடத்திலிருந்து வெகுதூரத்திற்கு மாற்றப் பட்டதற்கும் இதுதான் அடிப்படை என்றார். தந்தை பெரியாரின் பகுத்தறிவு, சுயமரியாதை, சமூகநீதி இம்மூன்றும்தான் தமிழ்நாட்டைக் காப்பாற்றி வருகிறது என்று மிகவும் சரியாகக் கணித்துச் சொன்னார். ஆசிரியர் அய்யா அவர்களும், கருஞ்சட்டைத் தோழர்களும் வலிமையுடன் கருத்துகளை விதைத்துக்கொண்டே இருக்க வேண்டும் என்பது கட்டாயமாகிவிட்டது. ஆசிரியர் அவர்கள் எனக்காக தேர்தல் பிரச்சாரம் மேற்கொண்டார்கள். வெற்றிக்குப் பிறகு இப்பொழுதுதான் அவர்களைச் சந்திக்கின்றேன். எனக்கு நான்கு இலட்சத்திற்குமேல் வாக்குகள் கிடைத்ததற்கு ஆசிரியர் அய்யா அவர்களின் பங்கும் உண்டு - அதற்காக எனது நன்றியைத் தெரிவித்துக் கொள்கிறேன் என்று பேசினார். பேராசிரியர் சுப.வீரபாண்டியன் திராவிடர் கழகத் தலைவர் ஆசிரியர் கி.வீரமணி அவர் களால் எழுதப்பட்ட ‘’கற்போம் பெரியாரியம்’’ எனும் நூலை திராவிட இயக்கத் தமிழர் பேரவையின் பொதுச்செயலாளர் பேராசிரியர் சுப.வீரபாண்டியன் வெளியிட்டு உரையாற்றுகையில், “தந்தை பெரியார் அவர்களை வேறு வழியில் குறை சொல்ல முடியாதவர்கள், பெரியாருக்கு இவ்வளவு உயரத்தில் சிலை தேவையா என்று சில குள்ள மனிதர்கள் சொல்லுகிறார்கள். நமது சமுதாயம் நமது தலைவர் ஆசிரியர் அவர்களுக்கு மிகவும் நன்றி கூறக் கடமைப்பட்டுள்ளது. தந்தை பெரியாரின் கருத்துகளை உலகம் முழுவதும் கொண்டு செல்கிறார். நமது ஆசிரியர் அவர்களால் எழுதப்பட்ட ‘’கற்போம் பெரியாரியம்’’ எனும் நூல் ஆய்வு நூல் அல்ல; அறிவு நூல்! ஒவ்வொருவரும் படிக்க வேண்டும். நமக்குப் பாடங்களைக் கற்றுத் தரும் நூல். அவரை ஆசிரியர் என்று சொல்லுவது ஏன் என்பது இப்பொழுது புரிகிறதா? உலகில் மதத்தின் பெயரால் - ஜாதியின் பெயரால் கட்சிகள் உண்டு. சுயமரியாதை என்னும் பெயரில் கட்சி உண்டா _- அமைப்பு உண்டா என்ற ஆழமிகுந்த வினாவை பேராசிரியர் சுப.வீ. அவர்கள் எழுப்பியபோது அரங்கமே அதிர்ந்தது. சிலர் இப்பொழுது கிளம்பி இருக்கிறார்கள். பெங்களூரு அய்யங்கார் பேக்கரி என்றால், பெங்களூரை எடுக்க வேண்டும் என்கிறார்கள் - ஆனால், அய்யங்கார் பேக்கரி அப்படியே இருக்கட்டும் என்கிறார்கள். இதுதான் இவர்களின் பிரச்சினை என்று குழப்ப வாதிகளை அம்பலப்படுத்தினார் பேராசிரியர் சுப.வீ. உலகெங்கும் சமூகநீதி நாள் தமிழ்நாட்டில் அனைத்து ஊர்களிலும், இந்தியாவின் பெரும்பாலான மாநிலங்களிலும் தந்தை பெரியார் பிறந்த நாள் எழுச்சியுடன் சமூகநீதி நாளாகக் கொண்டாடப்பட்டு உறுதிமொழி எடுக்கப்பட்டது. அதேபோல் உலகம் முழுவதும் உள்ள பெரியார் பற்றாளர்கள் மற்றும் திராவிடர் கழகத்தினர், தமிழ் மக்கள் என அனைவரும் தமிழ்நாடு அரசு அறிவித்த சமூகநீதி நாளை முழுமையாக ஏற்று இன உணர்வோடு தந்தை பெரியாரின் பிறந்த நாளை சமூகநீதி நாளாகக் கொண்டாடி உறுதிமொழி ஏற்றுச் சிறப்பித்தனர். (குறிப்பு: ஆசிரியர், சிறப்பு அழைப்பாளர்களின் உரை அடுத்தடுத்த இதழில்)செய்திகளை பகிர்ந்து கொள்ள

பெண்ணால் முடியும்! : அறிவுத் திறனில் முதலிடம் விசாலினி!

  ஒருவரது அறிவுத் திறனை அய்.கியூ (IQ) என்ற குறியீட்டால் குறிப்பிடுவது மரபு. அறிவியல்படி மனிதர்களின் அய்.கியூ 90 முதல் 110 வரை இருக்கும் என்று ஆராய்ச்சிகள் தெரிவிக்கின்றன. உலகப் புகழ்பெற்ற அறிவாளிகளான பில்கேட்ஸ், ஸ்டீபன் ஹாக்கின்ஸ் மற்றும் ஆல்பர்ட் அய்ன்ஸ்டின் ஆகியோரின் அய்.கியூ.160 என்று குறிப்பிடப்படுகிறது. ஆனால், இந்தியாவைச் சேர்ந்த, அதிலும் தமிழ்நாட்டைச் சேர்ந்த மாணவி விசாலினியின் அறிவுத்திறன் குறியீடு 225! இவரது அபாரமான அறிவுத் திறனுக்கு அடையாளமாக இவர் படைத்திருக்கும் சாதனைகள் பலப்பல! திருநெல்வேலியில் வசிக்கும் விசாலினி, தற்போது கலசலிங்கம் பல்கலைக்கழகத்தில் பி.எச்.டி. மாணவி. அவருடைய அம்மா விசாலினியைப் பற்றிக் கூறுகையில், “விசாலினி தொடக்கப் பள்ளியில் பயிலும்போதே, தொடர்ச்சியாக இரண்டு முறை டபுள் ப்ரமோஷன் பெற்றாள். ஒன்பதாம் வகுப்பை, பாதியில் நிறுத்திவிட்டு ஸ்ரீவில்லிபுத்தூரிலுள்ள தனியார் பல்கலைக்கழகத்தில் நேரடியாக பி.டெக். படிப்பில் சேர்ந்தாள். அங்கு கம்ப்யூட்டர் சயின்ஸ் துறையில் தன்னைவிட நான்கைந்து வயது மூத்த மாணவர்களுடன் படித்தாலும் எப்போதும் படிப்பில் முதல் மாணவியாகவே திகழ்ந்தாள். நான்கு ஆண்டுகள் பி.டெக். படிப்பை மூன்றே ஆண்டுகளில் முடித்து 96 சதவிகித மதிப்பெண்களுடன் பல்கலைக்கழகத்தில் முதல் மாணவியாக தங்கப் பதக்கம் பெற்றாள். அடுத்து, எம்.டெக். கம்ப்யூட்டர் சயின்ஸ் படிப்பில் 98.2 சதவிகித மதிப்பெண்களுடன் பல்கலைக்கழகத்தின் முதல் மாணவியாக தங்கப் பதக்கம் பெற்றாள். தற்போது ஆர்டிஃபிசியல் இன்டலிஜென்ஸ் என்ற செயற்கை நுண்ணறிவுப் பிரிவில் பிஎச்.டி. ஆராய்ச்சி மேற்கொண்டு வருகிறாள்.’’ அவருடைய வெற்றிப் பயணத்தைப் பற்றி அவர் கூறுகையில், “இந்திய விண்வெளி ஆராய்ச்சி மய்யமான இஸ்ரோ விஞ்ஞானிகள் மத்தியில் பதினைந்து வயதிலேயே 700க்கும் மேற்பட்ட விஞ்ஞானிகள் மத்தியில் புதிய தகவல் தொழில்நுட்ப நுணுக்கங்கள் குறித்து விரிவாக உரையாற்றினேன். இஸ்ரோ இயக்குநர் மயில்சாமி அண்ணாதுரை உள்பட விஞ்ஞானிகள் அனைவரும் எழுந்து நின்று கைதட்டி கவுரவித்தார்கள். ‘எதிர்காலத்தில், இந்தியத் தகவல் தொழில்நுட்பத் துறையில் விசாலினி முக்கியப் பங்காற்றுவார்’ என்று இஸ்ரோ இயக்குநர் பாராட்டியது என்னை ஊக்கப்படுத்தியது. இஸ்ரோவில் பதினைந்து வயது மாணவி ஒருவர், விஞ்ஞானிகள் மத்தியில் உரையாற்றியது அதுவே முதன்முறை. மேலும், அவர் திறமையை ஊக்குவிக்கும் வகையில் இஸ்ரோ எனக்கு ஓர் ஆராய்ச்சிப் பணியையும் வழங்கியது. இரண்டு ஆண்டுகளில் முடிக்க வேண்டிய அந்தப் பணியை 35 நாள்களில் முடித்து, அவர்களிடம் சமர்ப்பித்தேன். அந்தத் தொழில் நுட்பத்திற்கு என்னுடைய பெயரே சூட்டப்பட்டது தனிச்சிறப்பு.’’ தனது அறிவுத்திறன் தன் தாய்நாட்டுக்காகப் பயன்பட விரும்புகிறார். அவர் ‘விகா இன்னோவேஷன்-ஸ்’ என்ற நிறுவனத்தை உருவாக்கி, அதன்மூலம் நிறைய சாதித்து வருகிறார். இன்று சோஷியல் மீடியா மீதான போதை மிக அதிகமாக இருக்கிறது. குறிப்பாக இளைய சமுதாயத்திடம் வெறும் பொழுதுபோக்குக்காக, கட்டுப்பாடில்லாமல் அவற்றில் நேரம் செலவிடுவது தவறு. அவற்றைப் பயன்படுத்தி, நாம் எப்படி வாழ்க்கையில் முன்னேறலாம் என்று இளைய தலைமுறையினர் யோசிக்க வேண்டும்’’ என்றார் விசாலினி. தகவல் : சந்தோஷ்செய்திகளை பகிர்ந்து கொள்ள

சிந்தனைக் களம் : நீட்டாக ஒழிப்பதுதான் நீட்டா

கவிஞர் கலி.பூங்குன்றன் நுழைவுத் தேர்வு கடந்து வந்த பாதை! ¨ மருத்துவக் கல்லூரி மாணவர்கள் சேர்க்கைக்கு நுழைவுத் தேர்வு (Entrance Test) நடத்தும் யோசனையை எம்.ஜி.ஆர் முதல் அமைச்சராக இருந்தபோது, மக்கள் நல்வாழ்வுத் துறை  அமைச்சர் டாக்டர் எச்.வி.ஹெண்டே சட்டமன்ற மேலவையில் கூறினார். இது விபரீத யோசனை, - கைவிட வேண்டும் என்று அன்றைய திராவிடர் கழகப் பொதுச்செயலாளர் கி.வீரமணி அறிக்கை வெளியிட்டார். (‘விடுதலை’ 23.3.1982) இதன் காரணமாக அப்போது நுழைவுத் தேர்வு திட்டம் கைவிடப்பட்டது. ¨           நுழைவுத் தேர்வை எதிர்த்து அனைத்துக் கட்சிக் கூட்டத்தைத் திராவிடர் கழகம் நடத்தியது. (சென்னை, பெரியார் திடல், 20.3.1984) ¨           இவ்வளவையும் மீறி எம்.ஜி.ஆர். அரசு நுழைவுத் தேர்வைத் திணித்தது. (தமிழ்நாடு செய்தி, சுற்றுலா மற்றும் (தமிழர் பண்பாட்டு செய்தி வெளியீட்டுப் பிரிவு) செய்தி வெளியீடு எண்: 322 நாள்: 30.5.1984)                இதனை எதிர்த்து முதலாவதாகப் போர்ச்சங்கு ஊதியவர் திராவிடர் கழகப் பொதுச்செயலாளர் ஆசிரியர் கி.வீரமணி அவர்கள். (‘விடுதலை’ 8.6.1984)                1982இல் அனைத்துக் கட்சிக் கூட்டத்தை திராவிடர் கழகம் கூட்டி முறியடித்தது. இப்பொழுது மீண்டும் அனைத்துக் கட்சிக் கூட்டத்தினை சென்னை, பெரியார் திடலில் திராவிடர் கழகப் பொதுச்செயலாளர் ஆசிரியர் கி.வீரமணி அவர்கள் கூட்டினார்கள். (25.3.1984) ¨           17.6.1984 அன்று தமிழ்நாட்டின் மாவட்டத் தலைநகரங்களில் திராவிடர் கழகத் தோழர்களால் எம்.ஜி.ஆர் அரசு திணித்த நுழைவுத் தேர்வு ஆணை கொளுத்தப்பட்டது. ¨           எம்.ஜி.ஆர் ஆட்சியில் கொண்டுவரப்பட்ட நுழைவுத் தேர்வு செல்வி ஜெயலலிதா முதல்அமைச்சராக இருந்தபோது ரத்து செய்யப்பட்டது. கல்வி நிறுவனங்கள் குழு அமைத்து அவர்கள் அளித்த கருத்தின் அடிப்படையில் நுழைவுத் தேர்வை ரத்து செய்தால் நீதிமன்றம் ஏற்றுக்கொள்ளும் என்று திராவிடர் கழகப் பொதுச் செயலாளர் ஆசிரியர் கி.வீரமணி அவர்கள் செய்தியாளர்கள் சந்திப்பில் 2.1.2006 அன்று கூறியிருந்தார். அதனை ஏற்று இருந்தால் தீர்ப்பு நமக்குப் பாதகமாக இருந்திருக்காது. ¨           கலைஞர் அவர்கள் முதல் அமைச்சர் ஆன நிலையில் திராவிடர் கழகப் பொதுச் செயலாளர் கூறிய கருத்தின் அடிப்படையில் கல்வியாளர் டாக்டர் எம்.ஆனந்த கிருஷ்ணன் அவர்களின் தலைமையில் குழு அமைக்கப்பட்டது. (7.7.2006)                 அக்குழுவின் பரிந்துரை அடிப்படையில் நுழைவுத் தேர்வை ரத்து செய்தார் மானமிகு மாண்புமிகு முதல் அமைச்சர் கலைஞர். அதனை எதிர்த்து உயர்நீதிமன்றம் சென்றனர்.                கல்வி நிலையங்களில் பரிந்துரை அடிப்படையில் சட்டத் திருத்தம் செய்யப்பட்டதால், அதனை உயர்நீதிமன்றம் ஏற்றுக்கொண்டு நுழைவுத் தேர்வை ரத்து செய்கிறது என்று தீர்ப்புக் கூறியது. (27.4.2007)                பின் உச்சநீதிமன்றம் சென்றனர். உச்சநீதிமன்றமும் அதே தீர்ப்பைக் கூறுகிறது.                இதன் காரணமாக 2007-_2008ஆம் கல்வி ஆண்டு முதல் நுழைவுத் தேர்வு இல்லாநிலையில் +2 மதிப்பெண் அடிப்படையில் 69 விழுக்காடு இடங்கள் நிரப்பப்பட்டன.                இந்த  வழக்கை விசாரித்த சென்னை உயர்நீதிமன்ற நீதிபதிகள் பி.கே.மிஸ்ரா, சம்பத் குமார் ஆகியோர் தெரிவித்த கருத்துகள் இப்பொழுதும் கூடக் கருத்தூன்றிக் கவனிக்கத் தக்கவையாகும்! ¨           “நுழைவுத் தேர்வை நடத்தினாலும், முழு சமநிலை என்பதும், கட்டுக்கதைதான். ஏனென்றால், சரியான விடையைத் தேர்ந்தெடுப்பதைவிட “கோன் பனேகா குரோர்பதி’’ நிகழ்ச்சியில் அனுமானத்தின் அடிப்படையில் விடைகளை ‘டிக்’ செய்யும் வாய்ப்புள்ளது’’ என்று குறிப்பிட்டனர் நீதிபதிகள் என்பது குறிப்பிடத்தக்கதாகும்.                இதே கருத்தை அதற்கு 23 ஆண்டுகளுக்கு முன்பாகவே திராவிடர் கழகப் பொதுச் செயலாளர் ஆசிரியர் கி.வீரமணி அவர்கள் எம்.ஜி.ஆர் நுழைவுத் தேர்வைத் திணித்தபோதே கூறியது இங்கே நினைவூட்டத்தக்கதாகும்! (‘விடுதலை’ 8.6.1984) ¨           இந்த இடத்தில் இன்னொரு புள்ளிவிவரம் முக்கியமானது. கண்மூடித்தன தகுதி _- திறமையாளர்களின் கண்களைத் திறக்கச் செய்வதாகும். நுழைவுத் தேர்வு எம்.ஜி.ஆர் ஆட்சியில் திணித்தபோது குறிப்பாக 2004-_2005இல் நடந்தது என்ன? மருத்துவக் கல்லூரிக்கு விண்ணப்பித்தவர் 5 லட்சம் மாணவர்கள். அதில் கிராமங்களைச் சேர்ந்தவர்கள் 2 லட்சத்து 10 ஆயிரம் பேர். கிராம மாணவர்கள் பெற்ற இடம் வெறும் 227தான். இந்தப் பாதிப்பை உயர்நீதிமன்றம் ஏற்றுக் கொண்டுதான் நுழைவுத் தேர்வை ரத்து செய்தது. எடுத்துக்காட்டாக, நுழைவுத் தேர்வு இல்லாத காலகட்டத்தில் 2009-2010இல் திறந்த போட்டியில் பெற்ற விவரம்: மொத்த இடங்கள்    460 இதில் பிற்படுத்தப்பட்டோர்            300 மிகவும் பிற்படுத்தப்பட்டோர்        72 தாழ்த்தப்பட்டோர்   18 முசுலிம்கள்  16 முன்னேறியோர்      54   200க்கு 200 மதிப்பெண் பெற்றோர்               8 இதில் பிற்படுத்தப்பட்டோர்            7 மிகவும் பிற்படுத்தப்பட்டோர்        1   2012 - 2013ஆம் ஆண்டு நிலவரம் திறந்த போட்டியில் மொத்த இடங்கள்  742 தாழ்த்தப்பட்டோர் பிற்படுத்தப்பட்டோர்              678 200க்கு 200 பெற்றோர்            16 பேர் பிற்படுத்தப்பட்டோர்            10 மிகவும் பிற்படுத்தப்பட்டோர்        1 தாழ்த்தப்பட்டோர்   2 அருந்ததியர் 1 முன்னேறியோர்      2   2016-2017ஆம் ஆண்டு புள்ளி விவரம் திறந்த போட்டி இடங்கள்  884 பிற்படுத்தப்பட்டோர்            599 மிகவும் பிற்படுத்தப்பட்டோர்        159 பிற்படுத்தப்பட்ட முஸ்லிம்கள்   32 தாழ்த்தப்பட்டோர்   23 மலைவாழ் மக்கள் 1 அருந்ததியர் 2 முன்னேறியோர்      68 இந்தப் புள்ளி விவரங்கள் எதைக் காட்டுகின்றன? நுழைவுத் தேர்வு இல்லாமல் +2 மதிப்பெண் அடிப்படையில் தேர்வு செய்தால் அது தாழ்த்தப்பட்ட, பிற்படுத்தப்பட்ட மாணவர்களுக்குப் பயன் உள்ளதாக இருக்கும் என்பதைத்தானே இந்தப் புள்ளி விவரம் தெளிவாக, திட்டவட்டமாகத் தெரிவிக்கிறதே! புதிய ‘நீட்’ பாதிக்கப்பட்ட மாவட்டங்கள் (2017) தருமபுரி          2016இல்           225 (நீட் இல்லை)                2017இல்           82 (நீட்) ஈரோடு             2016இல்           230 (நீட் இல்லை)                2017இல்           100 (நீட்) நாமக்கல்        2016இல்           957 (நீட் இல்லை)                2017இல்           109 (நீட்) கிருட்டினகிரி              2016இல்           338 (நீட் இல்லை)                2017இல்           82 (நீட்) பெரம்பலூர்   2016இல்           81 (நீட் இல்லை)                2017இல்           23 (நீட்) திருச்சி             2016இல்           184 (நீட் இல்லை)                2017இல்           130 (நீட்) தமிழ்நாட்டின் மருத்துவக் கல்லூரியில் சேரத் தகுதி மதிப்பெண்கள் தாழ்த்தப்பட்டோர்   45% மிகவும் பிற்படுத்தப்பட்டோர்        50% பிற்படுத்தப்பட்டோர்            55% முன்னேறியோர்      60% ‘நீட்’ வந்தபின் மாற்றப்பட்ட விவரம் தாழ்த்தப்பட்டோர் _- மலைவாழ்மக்கள்              65% மற்றவர்களுக்கு       75% பிற்படுத்தப்பட்டோரை - முன்னேறிய ஜாதியினரோடு இணைத்து மதிப்பெண் வரையறை செய்யப்படுவதைக் கவனிக்க வேண்டும். நிதி ஒதுக்கீடு (100 சதவிகிதத்தில்) மாநிலங்களின் பங்கு           84.4% மத்திய அரசின் பங்கு           15.6% குறைந்த முதலீடு; கொள்ளை லாபம் என்பார்களே அது இதுதான்! கேள்வி: ‘நீட்’ யாரால் கொண்டுவரப்பட்டது? யாரால் நிலைக்க வைக்கப்பட்டது? 2010ஆம் ஆண்டில் காங்கிரஸ் ஆட்சியில் அகில இந்திய மருத்துவக் கவுன்சில் அகில இந்திய அளவில் மருத்துவக் கல்விக்கு ‘நீட்’ என்ற ஒன்றை அறிமுகப்படுத்தியது (21.12.2010) இதனை எதிர்த்து சென்னை உயர்நீதிமன்றத்தில் தி.மு.க. வழக்குத் தொடுத்தது. நீதிமன்றமும் ‘நீட்’டுக்குத் தடை விதித்தது. (18.7.2013) தீர்ப்பு வழங்கிய நீதிபதி திரு.ஜோதிமணி. 100க்கும் மேற்பட்ட மனுக்கள் உச்சநீதிமன்றத்தில் தாக்கல் செய்யப்பட்டன. எல்லா வழக்கு மனுக்களும் உச்சநீதிமன்றத்தில் விசாரிக்கப்பட்டன. தலைமை நீதிபதி அல்தாமஸ் கபீர், விக்கிரஜித் சென், ஏ.ஆர்.தவே ஆகியோர் அடங்கிய அமர்வு வழக்கை விசாரித்தது. இந்திய அரசமைப்புச் சட்டத்தின் 19, 25, 26, 29, 30 ஆகிய பிரிவுகளின்படி ‘நீட்’ செல்லாது என்று ஏ.ஆர்.தவேவைத் தவிர மற்ற இரு நீதிபதிகளும் தீர்ப்பு அளித்தனர். (18.7.2013) அதற்கு மேல் காங்கிரஸ் அரசு மேல் முறையீடு செய்யவில்லை. எப்பொழுது மேல் முறையீடு செய்யப்பட்டது என்பதுதான் முக்கியமானது. (பெட்டிச் செய்தி காண்க.) ‘நீட்’ எனும் கொடுவாளுக்கு மரணத்தைத் தழுவியவர்கள் (2017 முதல் 2021 செப்டம்பர் வரை 17 ‘நீட்’ மரணங்கள்) 1.            அனிதா, அரியலூர் 2.            பிரதீபா, விழுப்புரம் 3.            சுப-ஸ்ரீ, திருச்சி 4.            ஏஞ்சலின், சென்னை 5.            ஹரிஷ்மா,                புதுக்கோட்டை 6.            மோனிஷா, விழுப்புரம் 7.            வைஸ்யா,                பட்டுக்கோட்டை 8.            ரிதுஸ்ரீ, தேனி 9.            ஜோதி ஸ்ரீ, மதுரை 10.         துர்கா, மதுரை 11.         ஆதித்யா, தருமபுரி 12.         மோதிலால்,                திருச்செங்கோடு 13.         விக்னேஷ், அரியலூர் 14.         சுபஸ்ரீ, கோயம்புத்தூர் 15.         தனுஷ், சேலம் 16.         கனிமொழி, அரியலூர் 17.         சவுந்தர்யா, காட்பாடி 18.         அனுசுயா, செங்கல்பட்டு (16.9.2021) மாலை பலத்த தீக்காயத்துடன் செங்கல்பட்டு அரசு மருத்துவமனையில சிகிச்சை பெற்று வருகிறார். அவரை சென்னை கீழ்ப்பாக்கம் கொண்டுவர முயற்சி நடந்துகொண்டு இருக்கிறது. அரியலூர் அனிதா தாழ்த்தப்பட்ட சமுதாயத்தைச் சேர்ந்த மூட்டை தூக்கும் ஒரு தொழிலாளியின் மகள். +2 தேர்வில் அப்பெண் பெற்ற மதிப்பெண்கள் என்ன தெரியுமா? பவுதிகம்         200க்கு 200 இரசாயனம்  199 உயிரியல்      194 கணிதம்          200 கட் ஆஃப்         196.75 முதல் தலைமுறையாகப் படித்த _ காலம் காலமாகக் காலனியில் வாழ ஒதுக்கப்பட்ட பெண் இதைவிட இன்னும் எத்தனை மதிப்பெண் வாங்க வேண்டும்? +2 தேர்வில் இவ்வளவுப் பெரிய மதிப்பெண் பெற்ற அனிதாவால் ‘நீட்’டில் வெறும் 86 மதிப்பெண்தான் பெற முடிந்தது என்றால், கோளாறு _ குற்றம் எங்கே இருக்கிறது? அனிதாவிடத்திலா? ஆட்சியில் இருக்கும் மனுவாதிகளிடத்திலா? நெஞ்சம் பதைக்கிறதே! _ இந்த நயவஞ்சகர்கள் இந்தப் படுகொலைக்குக் காரணகர்த்தாக்கள் இல்லையா? அனிதாவின் நிலை இது என்றால் செஞ்சியையடுத்த குக்கிராமமான பெருவளூர் கிராமத்தைச் சேர்ந்த தாழ்த்தப்பட்ட சமுதாயத்தைச் சேர்ந்த பிரதிபாவின் கதையும் சோகம்தான். பத்தாம் வகுப்பில் 500க்கு 495, +2 தேர்வில் 1200க்கு 1145. ‘நீட்’டிலே பெற்றது வெறும் 39. ‘நீட்’ கொலைகாரக் கருவியா இல்லையா? திட்டமிட்டு பார்ப்பனீயம் ஏற்பாடு செய்த கொலைகார ஏற்பாடுதானே நீட்? ‘நீட்’டால் யாருக்குப் ப(ல)யன்? 2018ஆம் ஆண்டு ‘நீட்’ தேர்வில் அகில இந்திய அளவில் 691 மதிப்பெண் பெற்று முதலிடத்தைப் பெற்றவர் பிகாரைச் சேர்ந்த கல்பனா குமாரி. பிகாரில் படித்த அந்த மாணவி குறைந்த அளவு வருகைப் பதிவுகூட இல்லாத நிலையில், நீட்டுக்காக டில்லியில் இரண்டாண்டுகள் தங்கிப் படித்துத் தம்மை தயார்படுத்திக் கொண்டுள்ளார். வருகைப் பதிவு பற்றி பிரச்னை எழுந்தபோது பிகார் மாநிலக் கல்வி அமைச்சர் கிருஷ்ணானந்த் என்பவர் என்ன சொன்னார் தெரியுமா? பிகாரைச் சேர்ந்த கல்பனா குமாரி ‘நீட்’ தேர்வில் இந்தியாவிலேயே முதலிடத்தைப் பிடித்து பிகார் மாநிலத்துக்கு பெரிய அளவில் பெருமை சேர்த்துள்ளார். அதைப் பாராட்டுவதற்குப் பதிலாக அவரது வருகைப் பதிவு குறித்த சர்ச்சை எழுப்புவது தேவையில்லாதது என்று சொன்னாரே பார்க்கலாம்! கல்பனாவின் தந்தை பிகார் மாநிலத்தில் பள்ளிக் கல்வித் துறையில் ஆசிரியர்களுக்குச் சிறப்புப் பயிற்சியளிக்கும் பேராசிரியர் குழுவின் தலைவராம். எப்படிப் போகிறது பார்த்தீர்களா? பார்ப்பன குலத்தில் பிறந்த பெண்ணாயிற்றே _ சட்டம் வளைந்து கொடுக்காதா? மற்றவர்களுக்கு இந்த வாய்ப்புக் கிட்டுமா? கிடைக்கத்தான் விடுவார்களா? நீதிபதி ஏ.கே.ராஜன் குழு - ‘நீட்’டினால் பாதிப்பு யாருக்கு - பலன் யாருக்கு? 2019_2020இல் ‘நீட்’ தேர்வில் அகில இந்திய அளவில் முதல் இடம் பெற்ற மாணவி கண்டேல்வால். இவரின் தந்தை, தாய், அண்ணன் மூவரும் டாக்டர்கள். அலைன் ‘நீட்’ பயிற்சி வகுப்பில் படித்தவர். இரண்டாம் இடம் பிடித்தவர் யார்? பாவிக். தந்தை டில்லி மாநிலக் கல்வித் துறையில் பெரிய அதிகாரி. தாயார் இயற்பியல் பேராசிரியர். இம்மாணவி 2019ஆம் ஆண்டு 12ஆம் வகுப்பில் தேர்ச்சி பெற்று பிறகு ஆகாஷ் ‘நீட்’ தனிப் பயிற்சியில் சேர்ந்து ஓராண்டு பயிற்சி பெற்றவர். மூன்றாம் இடத்தைப் பிடித்தவர். சுருதி என்ற மாணவி. பெற்றோர் இருவரும் டாக்டர்களே. இவரும் தனியார் பயிற்சி நிறுவனத்தில் படித்தவர்தான். டாக்டர் ஏ.கே.ராஜன் அவர்களின் ஆணையம் என்ன கூறுகிறது? 71 விழுக்காட்டினர் ஒரு முறைக்கு மேல் ‘நீட்’ தேர்வு எழுதியவர்கள்தாம். ஆகாஷ் என்ற ‘நீட்’ பயிற்சி நிறுவனம் ஆண்டு ஒன்றுக்கு ரூபாய் 8 லட்சம், அலைன் நிறுவனம் ரூ.5 லட்சம் முதல் 7 லட்சம் வரை கட்டணம் வசூலிக்கின்றன. இதன் பொருள் என்ன? பெற்றோர்கள் நன்கு படித்திருக்க வேண்டும் _ லட்சக்கணக்கில் செலவு செய்து பயிற்சி பெறும் வசதி இருக்க வேண்டும். ‘நீட்’டின் விளைவு எங்கே கொண்டு போய்விடும்? நீட்டினால் பட்டியலின மக்களும் பிற்படுத்தப்பட்டோரும் மிகவும் பாதிக்கப்படுகின்றனர். அரசு மருத்துவமனைகளில் ஏற்கனவே மருத்துவர்களாகப் பணியாற்றி வந்தவர்களுக்கு  முதுகலைப் பட்டப் படிப்பில் 50 விழுக்காடு அளிக்கப்பட்டது _ ரத்து செய்யப்பட்டதால், எதிர்காலத்தில் அரசு மருத்துவமனைகளுக்கு, குறிப்பாக பிரைமரி ஹெல்த்சென்டர்களில் (PHC) பணியாற்ற மருத்துவர்கள் கிடைக்க வாய்ப்பு இல்லை. மருத்துவக் கல்லூரிகளில் வகுப்புகள் நடத்த பேராசிரியர்கள் கிடைக்க மாட்டார்கள். அரும்பாடுபட்டு, தமிழ்நாட்டில் உயர்ந்த நிலையில் தமிழ்நாட்டு மக்களின் வரிப்பணத்தில் உருவாக்கப்பட்டு பொதுமக்களுக்குப் பெரிதும் பயன்பட்டு வந்த மருத்துவ உதவி கிடைக்காமல் போய்விடும். தமிழ்நாட்டின் மருத்துவக் கட்டமைப்பு தரைமட்டமாக்கப்பட்டு விடும் என்று நீதிபதி டாக்டர் ஏ.கே.ராஜன் தலைமையிலான குழுவின் கணிப்பு மிகவும் சரியானதே! _ கவலைப்பட வேண்டிய முக்கியக் கருத்தும் ஆகும். வசதியும் வாய்ப்பும் படைத்த பல லட்ச ரூபாய் செலவு செய்ய வசதியுள்ள பணக்கார வீட்டுப் பிள்ளைகள்தாம், ‘நீட்’ பயிற்சியில் சேர்ந்து வெற்றி பெற முடியும். இப்படிப் படித்து டாக்டர் ஆவோர் தமிழ்நாட்டு மக்களுக்குப் பயன்பட மாட்டார்கள். வெளிநாடுகளுக்குப் பறந்து செல்லுவார்கள்; அல்லது உள்நாட்டில் கார்ப்பரேட் நிறுவனங்கள் நடத்தும் பெரிய பெரிய மருத்துவமனைகளில் பணியாற்றச் சென்றுவிடுவார்கள். இலட்சக்கணக்கில் அவர்களுக்கு ஊதியம் கிடைக்கும் அல்லவா? டாக்டர் படிப்பு என்பது ஒரு சிலருக்கு மட்டும் ஏகபோகமாகும் _ எச்சரிக்கை! எச்சரிக்கை!    செய்திகளை பகிர்ந்து கொள்ள

சிறுகதை : சொந்த வீடு

  அரசுப் பணியில் இருந்து ஓய்வு பெற்று விட்டார் முருகுமணி. பணி செய்த காலத்தில் மிகவும் நேர்மையான அலுவலர் என்ற பெயர் எடுத்தவர். தனது பணியைத் தவிர வேறு எந்தச் செயலிலும் ஈடுபட மாட்டார். அவரது துணைவியார் கோமதியுடன் வாடகை வீட்டிலேயே வசித்துவந்தார். அவர்களின் ஒரே மகளும் திருமணமாகி வெளிநாட்டிற்குச் சென்றுவிட்டார். முருகுமணி ஓய்வு பெற்றவுடன் கணிசமான தொகை கையில் கிடைத்தது. அந்தத் தொகையை என்ன செய்யலாம் என அவர் யோசனை செய்தார். அவரது துணைவியார் கோமதிக்கு நீண்ட நாள்களாக ஒரு குறை இருந்தது. அதாவது தங்களுக்குத் திருமணமான நாளிலிருந்து வாடகை வீட்டில்தான் குடியிருந்து வருகிறார்கள். சொந்த வீடு என்பது இல்லை. அதனால் ஓய்வுத் தொகையைக் கொண்டு சொந்தமான வீடு வேண்டுமென விரும்பினார். தனது விருப்பத்தையும் முருகுமணியிடம் தெரிவித்தார். “உங்களுக்கும் சொந்தமாக வீடு இருக்கணும்கிற ஆசை இருக்கும்னு நெனைக்கிறேன்’’ என்று ஒரு நாள் பேச்சைத் தொடங்கினார். “இருக்கு. ஆனாலும், யோசனை செய்ய வேண்டியிருக்கு. வாடகை வீட்டில் நிம்மதியாகத் தானே இருக்கோம்’’ என்றார். “நமக்குன்னு ஒரு சொந்த வீடு வேணாமா? வேலையில் இருக்கும்போதே செய்திருக்கணும். இப்பவாவது செய்யுங்க’’ என்று ஆதங்கத்துடன் கூறினார் கோமதி. “பிளாட் வாங்கி வீடு கட்டறதா அல்லது பழைய வீட்டை வாங்கலாமா?’’ என்று கேட்டார் முருகுமணி. இதைக் கேட்ட கோமதி மிகவும் மகிழ்ந்தார். தனது எண்ணத்தை ஈடேற்ற வேண்டும் என்கிற சிந்தனை அவருக்கு வந்ததே பெரிய செயல் என நினைத்தார். “இடம் வாங்கி நாமே வீடு கட்டினால் நம் விருப்பப்படி சிறப்பாகக் கட்டலாம். வீடு வாங்கினால் நல்ல இடமாகப் பார்த்து வாங்கணும். எதுவும் எனக்குச் சம்மதம்’’ என்றார் கோமதி. முடிவை முருகுமணியிடமே விட்டுவிட்டார் கோமதி. வீடு கட்டுவதைவிட வீடு வாங்குவதே நல்லது என்ற முடிவுக்கு வந்தார் முருகுமணி. காரணம், வீடு கட்டுவதைப் பற்றி அவருக்கு அவ்வளவாக எதுவும் தெரியாது, நிறைய அலைய வேண்டி வரும், வேலை அதிகமாக இருக்கும், தனி ஆளாக இருந்து அனைத்தையும் கவனிக்க முடியாது என்பது அவரது எண்ணம். மேலும், இனிமேல் பிளாட் வாங்கி வீடுகட்ட காலதாமதம் ஆகும் எனவும் நினைத்தார். அந்த நேரத்தில் முருகன் என்ற கட்டிடப் பொறியாளரை அவர் சந்திக்க நேர்ந்தது. நண்பர் ஒருவர் மூலம் அவர் அறிமுகமானார். ஒப்பந்த அடிப்படையில் வீடு கட்டிக் கொடுப்பவர். அவரிடம் தன் எண்ணத்தைச் சொன்னார் முருகுமணி. “அய்யா! பழைய வீடு வாங்காதீங்க. பிளாட் வாங்கி புதிதாக வீடு கட்டறதுதான் நல்லது. வாஸ்து முறைப்படி நாம் விரும்பியபடி கட்டிக்கலாம்’’ என்றார் முருகன். புதிய வீடு கட்டினால் தனக்கு ஒரு பணி கிடைக்கும் என்பது அவரது எண்ணம். புதிய வீடு கட்டுவதில் முருகுமணிக்கு விருப்பம் இல்லையென்றாலும் முருகன் சொன்ன வாஸ்து என்பதற்கு விளக்கம் அவருக்குத் தெரியவில்லை. அது என்ன வாஸ்து எனக் குழம்பியவாறே முருகனைப் பார்த்து, “வாஸ்துன்னு சொன்னீங்களே! அப்படின்னா என்ன? பழைய வீடுகளில் வாஸ்து இருக்காதா?’’ எனக் கேட்டார். “வாஸ்து சாஸ்திரம் பற்றி நீங்களும் தெரிஞ்சிக்கணும். வாஸ்துன்னா வீடு கட்ற நிலம், வாஸ்து சாஸ்திரம் அப்படிங்கிறது கட்டடக் கலை, நகர அமைப்பு சம்பந்தப்பட்ட நம் நாட்டின் பழமையான அறிவுத் துறையாகும் அய்யா. அதாவது வேதம் சார்ந்த அறிவுத் துறைன்னு சொல்லலாம்’’ என பதில் கூறினார் பொறியாளர் முருகன். “அதில் முக்கியமானதைக் கூறுங்களேன்’’ என்று கேட்டார் முருகுமணி. “அதாவது வாசல் எந்தத் திசையில் இருக்க வேண்டும், சமையல் அறை, குளியல் அறை, கழிவறைகள் எங்கெங்கே இருக்க வேண்டும் என்பது போன்ற விஷயங்கள் வாஸ்துவில் இருக்கும். கெட்டும் தெற்கு பார்த்த வீட்டிற்குப் போகாதே என்ற பழமொழிகூட உண்டு அய்யா’’ என்றார் முருகன். அதைக் கேட்டு அதிர்ச்சியடைந்தார் முருகுமணி. காரணம் அவர் பல ஆண்டுகளாகக் குடியிருக்கும் வாடகை வீடு தெற்குப் பார்த்த வீடுதான். “முருகன், நாங்க இப்ப குடியிருக்கிற வீடு தெற்குப் பார்த்த வீடுதானே! நாங்க நல்லாத்தானே இருக்கோம். இந்த வீட்டிற்கு யாரும் வராமல் இல்லையே! வந்தவங்க எல்லாம் நல்லாத்தானே இருக்காங்க. கெட்டுப் போகவில்லையே!’’ முருகுமணியின் இந்தப் பேச்சுக்கு பதில் ஏதும் சொல்லாமல் அந்த இடத்தை விட்டு அகன்றார் முருகன். மறுநாளும் முருகுமணியின் வீட்டிற்கு வந்தார் முருகன். எப்படியாவது அவரை வீடு கட்ட வைத்துவிட வேண்டுமென்று முடிவு செய்தார் முருகன். ஆனால், முருகுமணியோ மீண்டும் வாஸ்து பற்றி விளக்கம் கூறும்படி கேட்டார். “சுருக்கமா சொல்றேன். கேளுங்க’’ என்று கூறிய முருகன் வாஸ்து புராணம் பற்றி சொல்ல ஆரம்பித்தார். “சிவனின் நெற்றி வியர்வையிலிருந்து பிறந்த ஒரு பூதம் பசியால் துடித்து கண்டதைத் தின்றது. அந்தப் பூதம் தவம் செய்து பூமியை தனது கண்காணிப்பில், கட்டுப்பாட்டில் இருக்க வேண்டுமென வரம் கேட்டது. சிவனும் வரம் கொடுத்துவிட்டார். ஆனால், பிரம்மாவும் தேவர்களும் அந்தப் பூதத்தை குப்புறத் தள்ளி அதை எழவிடாமல் மேலே உட்கார்ந்து கொண்டார்கள். பூதத்திற்கு பசித்ததால் பிரம்மா பூதத்திடம் பூமியில் பார்ப்பனர்களின் வைவஸ்தவ ஹோமத்தில் தரும் பொருள்களை சாப்பிடுமாறும், வீடு கட்டுபவர்கள் செய்யும் ஹோமத்தில் உள்ளவற்றை சாப்பிடுமாறும் சொல்லி விட்டார். பிரம்மா அந்தப் பூதத்திற்கு வாஸ்து எனப் பெயரிட்டார். பிறகு வாஸ்து புருஷன் என்று அழைக்கப்பட்ட மனையின் தலைவனான அவன் வருடத்திற்கு எட்டு முறை மட்டுமே தூங்கி எழுவான். எழுந்தவன் ஒன்றரை மணி நேரம் மட்டுமே விழித்திருப்பான். அவன் கண்விழிக்கும் நேரங்களில வீட்டுப் பணியைத் தொடங்கலாம். அதுவே வாஸ்து நாள், வாஸ்து நேரம் எனப்படும். வாஸ்து பார்த்துதான் நாம் எல்லாமே செய்யணும்’’ என்று கூறி முடித்தார் முருகன். “அதெல்லாம் வேண்டாம். விநாயகன் பிறப்பைப் போல கேவலமாக இருக்கு இந்த வாஸ்து புராணம். நம்ம வசதிக்கேற்ப வீடு கட்டவோ, வாங்கவோ செய்ஞ்சா போதும். இனிமே என்கிட்ட வாஸ்து என்கிற சொல்லை சொல்லவே வேண்டாம்’’ என்று முருகனிடம் கேட்டுக் கொண்டார் முருகுமணி. அப்போது அங்கு வந்த கோமதி, “வீடு வாங்கறது நல்லதா, கட்டறது நல்லதா அப்படின்னு பட்டிமன்றமே நடத்துவீங்க போலிருக்கே’’ என்றார். வீடு வாங்குவதே நல்லது என்ற முடிவை மீண்டும் தெரிவித்தார் முருகன். வீடு கட்டினால் தனக்கு நல்லது என நினைத்த முருகன் சற்றே ஏமாற்றமடைந்தார். இருப்பினும் வீடு வாங்கும் பணியாவது கிடைத்ததே என்ற மகிழ்வில் உடனே வீடு தேடும் பணியில் ஈடுபட முடிவு செய்தார். “அம்மா, வீடு எந்த ஏரியாவில் இருக்கணும், எவ்வளவு விலையில் இருக்கணும்?’’ என்று கோமதியிடம் கேட்டார் முருகன். கோமதிக்கு நீண்ட நாள்களாக மற்றொரு குறையும் இருந்தது. அதாவது அவர்கள் குடியிருந்த வீட்டிற்கு அருகில் கோயில் எதுவும் இல்லை. கோயிலுக்குச் செல்ல வேண்டு மென்றால் ஆட்டோ வைத்துக் கொண்டு நீண்ட தூரம் செல்ல வேண்டியிருந்தது. ஆகவே, அவரது ஒரே கோரிக்கை _ வீட்டிற்குப் பக்கத்தில் கோயில் இருக்க வேண்டும் என்பதுதான். ஆனால், முருகுமணிக்கு அதில் கொஞ்சம்கூட நாட்டமில்லை. அவர் தனது வாழ்நாளில் கோயிலுக்கே சென்றதில்லை. ஜாதி, மதம், கோயில் என்று எந்தச் சிந்தனையும் இல்லாமல் தனது பணியிலேயே கண்ணாக இருந்தவர். கடவுள் கொள்கையில் அவருக்கு எப்போதும் நம்பிக்கை இருந்ததில்லை. கடவுள் பெயரால் நடக்கும் சுரண்டல்களை கேள்விப்பட்டு பல நேரங்களில் கோபம் அடைந்திருக்கிறார். ஆனால், கோமதி அவருக்கு நேர்மாறாகவே இருந்தார். தனது கோரிக்கையை முருகனிடம் வெளிப்படுத்தினார் கோமதி. “நல்ல வீடா கோயிலுக்குப் பக்கத்திலேயே பார்த்து முடிச்சுடுறேன்’’ என்று கோமதியிடம் கூறினார் முருகன். சொன்னபடியே காரியத்தில் இறங்கிய முருகன் சில நாட்களிலேயே இரண்டு வீடுகளைப் பார்த்துவிட்டு முருகுமணியைச் சந்திக்க வந்தார். “இரண்டு வீடுகள் பார்த்திருக்கேன். ஒரு வீட்டிற்கு எதிரிலேயே கோயில் இருக்கு. இன்னொரு வீட்டிற்குப் பக்கத்தில் கோயில் எதுவும் இல்லை. ஆனால், வீடு நல்லாயிருக்கும். விலையும் குறைவு. நீங்க ரெண்டு பேரும் வந்து பாருங்க. பிடித்த வீட்டை முடிச்சிக்கலாம்’’ என்றார். “கோயிலுக்கு எதிரே உள்ள வீட்டையே பார்த்து முடிச்சுடலாம். கோயில் இல்லாத தெருவில் ஏன் வீடு பாத்தீங்க?’’ என்று கேட்டார் கோமதி. “பார்த்துட்டேன். தேர்வு செய்ய வேண்டியது உங்க வேலை’’ என்று சொன்ன முருகன் அவர்கள் இருவரையும் அழைத்துச் சென்று இரண்டு வீடுகளையும் காட்டினார். இரண்டு வீடுகளையும் பார்த்தனர். கோயில் அருகில் இல்லாத வீடு நல்ல வசதியாகவும் காற்றோட்டமாகவும் விலை குறைவாகவும் இருந்தது. முருகுமணிக்கு மிகவும் பிடித்தது. ஆனால், கோயிலுக்கு எதிரில் உள்ள வீட்டையே கோமதி வாங்க விரும்பினார். அது அவ்வளவாக நன்றாகவும் இல்லை, காற்றோட்ட வசதியும் இல்லை, விலையும் அதிகமாகக் கூறப்பட்டது. ஆயினும் கோயில் மோகத்தில் இருந்த கோமதி விடாப்பிடியாக அந்த வீட்டையே வாங்க வேண்டும் என்றார். “தூங்கி எழுந்தவுடன் சாமி முகத்தில் விழித்தால் சகல சவுபாக்கியங்களும் உண்டாகும்’’ என வேறு சில புரோக்கர்களும் கோமதியின் கோயில் ஆசைக்குத் தூபம் போட்டனர். வேறு வழியின்றி கோமதியின் ஆசையை நிறைவேற்றினார் முருகுமணி. வாங்கிய வீட்டில் ஒரு நாள் குடியேறவும் செய்தார்கள். நாள்கள் கடந்தன. கோமதி நாள்தோறும் காலையும் மாலையும் கோயிலுக்குச் செல்வதை வழக்கமாகக் கொண்டார். இந்நிலையில் கார்த்திகை மாதம் வந்தது. ஒரு நாள் காலையில் வெளியே வந்து பார்த்தபோது சிலர் கூம்பு வடிவ ஒலி பெருக்கிகளை கம்பங்களில் கட்டிக் கொண்டிருந்தனர். சில ஒலிபெருக்கிகள் நேரிடையாக கோமதி வீட்டை நோக்கியே இருந்தன. அந்தத் தெருவில் நீண்ட தொலைவிற்கு ஒலி பெருக்கிகளைக் கட்டினர். கட்டிமுடித்த சில நேரங்களில் உச்சகட்ட ஓசையுடன் பாடல்கள் போடப்பட்டன. வேலை வெட்டி இல்லாத ஒருவன் ஒலிபெருக்கியை இயக்கி விட்டுச் சென்றுவிட்டான். அன்று நாள் முழுவதும் ஒரே இரைச்சல். கோமதிக்கு தலைவலி எடுத்துவிட்டது. இரவிலும் ஒலிபெருக்கியை இயக்கித் தூங்க விடவில்லை. நாள்தோறும் இது தொடர்ந்தது. இரைச்சலுக்கு இடையில் முருகுமணியிடம் குரலை உயர்த்திப் பேசியதால் கோமதிக்குத் தொண்டை கட்டிக் கொண்டது. தூக்கமின்மையாலும் தலை வலியாலும் அவதிப்பட்ட அவர் மருத்துவமனையில் சேர்க்கப்பட்டார். நெஞ்சு வலியும் அவரை ஆட்கொண்டு விட்டது. முருகுமணிக்கும் இதே நிலைதான். “இன்னும் எத்தனை நாள்களுக்கு இப்படி இரைச்சலில் இருக்க வேண்டும்?’’ என்ற ஒரு நாள் மருத்துவமனையில் முருகுமணியிடம் கேட்டார் கோமதி. “கார்த்திகை, மார்கழி மாதம் முழுவதும் இப்படித்தானாம் பொங்கல் முடிந்துதான் ஒலிபெருக்கிகளைக் கழற்றுவார்களாம்’’ என்றார் முருகுமணி. இதைக் கேட்டு மிகவும் அதிர்ச்சியடைந்தார் கோமதி. “சொந்தக் காசில் சூனியம் வைத்துக் கொண்டோமே’’ என எண்ணி வருந்தினார். “சம்பந்தப்பட்டவங்ககிட்ட போய்க் கேட்டேன். சண்டைக்கு வந்துட்டாங்க. நீதானே கோயிலுக்கு அருகே வீடு கேட்டே! இப்போ புலம்பி என்ன பயன்?’’ என்றார் முருகுமணி. “தப்புதாங்க. ஆனாலும் இதுக்கு தீர்வுதான் என்ன? நமக்குள்ள உணர்வு அந்தத் தெருவில் உள்ள மற்றவர்களுக்கு இல்லையா?’’ எனக் கேட்டார் கோமதி. “இருக்கும். ஆனா பக்தி போதை அவங்க கண்களை மறைக்குது. பலரும் கேள்வி கேட்க துணிச்சல் இல்லாம மனசுக்குள் புழுங்கிக்கிட்டு இருக்காங்க. நாம என்ன பண்றது. பேசாம வீட்டை வித்திடுவோமா?’’ என்று எரிச்சலுடன் கேட்டார் முருகுமணி. இதைக் கேட்ட கோமதி மிகுந்த ஆவேசத்துடன் பேசினார். “கூடாது. கூடவே கூடாது. இந்த அநியாயத்தை நாம் தட்டிக்கேட்டே ஆகணும். தெருவில் உள்ள மற்றவர்களிடமும் எடுத்துச் சொல்வோம். காவல் நிலையத்தில் புகார் கொடுப்போம். பிள்ளைகள் படிக்க முடியவில்லை. வயதானவர்கள் நிம்மதியாகத் தூங்க முடியவில்லை. அரசாங்கத்தின் கவனத்திற்கும் இதைக் கொண்டு செல்வோம். புதிய அரசாங்கமும் அமைஞ்சிருக்கு-. நிச்சயம் நீதி கிடைக்கும்’’ என்று நம்பிக்கையுடன் கூறினார் கோமதி. உடன் தாளை எடுத்து காவல்துறைக்கு விண்ணப்பம் தயார் செய்ய ஆரம்பித்தார் முருகுமணி!     செய்திகளை பகிர்ந்து கொள்ள