நுழைவாயில்

தாழ்த்தப்பட்ட - மலைவாழ் மக்களுக்குப் பதவி உயர்வில் இடஒதுக்கீடு கூடாது எனும் உச்சநீதிமன்றத் தீர்ப்பு சட்ட விரோதமானது. - ஆசிரியர் கி.வீரமணி ****** கல்வியில் கண்ணிவெடிகள்! எச்சரிக்கை! எச்சரிக்கை! - கவிஞர் கலி.பூங்குன்றன் ****** புது விசாரணை (3) - சிந்தனைச் சித்ரா ****** கடவுளால் ஆகாதது! (சிறுகதை) - தத்துவமேதை டி.கே.சீனிவாசன் ****** “உண்மை’’ பேசும்! உண்மை இதழ்! (கவிதை) - சா.கிள்ளிவளவன் ****** ஜாதியொழிப்பில் காதல் திருமணங்களின் பங்கு! இரண்டாம் பரிசு ரூ.3000/- பெறும் கட்டுரை ****** “இருளர் மக்களின் உயர்வுக்கான நம்பிக்கை ஒளி!’’ (பெண்ணால் முடியும்!) ****** விதி நம்பிக்கையை விலக்கிய அதிநவீன மருத்துவங்கள் (7) - மரு.இரா.கவுதமன் ****** ‘நீட்’டை ஒழிக்க நெடும்பயணம்! - மஞ்சை வசந்தன் ******  செய்திகளை பகிர்ந்து கொள்ள

பெரியார் பேசுகிறார் : சிவராத்திரியின் யோக்கியதை

தந்தை பெரியார் சிவராத்திரி என்பது ஒரு பட்டினித் துக்கநாள் ஆகும். வைஷ்ணவர்கள் சுவர்க்கம் வேண்டி, பட்டினி கிடக்கும் வைகுண்ட ஏகாதசியைப்போல சைவர்கள் என்று கருதக்கூடியவர்கள் சிவன் ராத்திரியும் (கைலாச யாத்திரை, சமாதி) பட்டினி விரத விழா. தை, மாசி போன்ற காலங்களில் குளிர் நிறைந்துள்ள படியால், உடல் அங்கங்கள் இயக்கம் தடுமாறும்; உண்ணும் உணவு போன்றவை சரியானபடி ஜீரணம் ஆகாமல் இருக்கும்; வயிற்று இரைச்சல் போன்ற வயிற்றுக்கோளாறு உண்டாகும். ஆனால், இந்தச் சிவராத்திரி விரத மகிமை பற்றிக் கூறப்படும் புராணக் கதைகளோ அறிவுக்கும், இயற்கைக்கும், மக்கள் நடப்பு-பண்பாடுகளுக்கும் பொருந்தாதவை ஆகும். இந்த விரதம் பற்றிக் கூறப்படும் புராணக் கதையைப் பாருங்கள்! முன்னொரு சமயம் ஊரும் பேரும் இல்லாத ஒரு வேடன் வேட்டைக்குச் சென்றானாம். அவனுக்குக் காலைமுதல் இரவு வரை காட்டில் அலைந்தும் எந்த விலங்கும் அவனுக்குத் தென்படவில்லையாம். இரவு நெருங்கும் நேரமானதால் விலங்குகள் நடமாட்டம் ஆரம்பித்தது. ஒரு புலி இந்த வேடனைக் கண்டுவிட்டது. இவனைப் பின் தொடர்ந்து வந்தபடியால், அவன் உயிர் தப்ப ஓடி, ஒரு பெரிய வில்வமரத்தின் மேல் ஏறிக் கொண்டானாம். அப்போது மழையும் பெய்தது. அந்தப் புலியும் விடாமல் துரத்தி வந்து அவன் ஏறியிருந்த மரத்தின் கீழ் தங்கல் போட்டது. புலியும் அவன் இறங்குகிறானா என்று பார்த்துகொண்டே கீழே படுத்து இருந்தது. வேடன் பசி மயக்கத்தில் அதிகக் களைப்பு அடைந்து, வீடு செல்ல எண்ணியபடியால், அந்தப் புலியை விரட்ட, அந்த வில்வமர இலைகளைக் கொத்துக் கொத்தாய்ப் பறித்து அந்தப் புலியின் மேல் வீசினான். மழையின் காரணத்தால் அந்த இலைகளில் உள்ள ஈரப்பசையால் புலிக்குப் பக்கத்தில் உள்ள குத்துக்கல் மீது அந்த இலைகள் விழுந்தன. அது ஒரு சிவலிங்கமாம்; அன்று இரவு வேட்டை கிடைக்காததால் அந்த வேடன் பகல் முழுதும் பட்டினி. (வேடர்கள் பொதுவாக காலையில் பழைய உணவு சாப்பிட்டு விட்டு வேட்டைக்கு வந்து வேட்டையாடிய விலங்கைக் கொண்டுசென்று, இரவு சமைத்துச் சாப்பிடுவது வாடிக்கையாதலால், பகல் முழுதும் பட்டினி என்பது சாதாரணம்தான்) அவன் மாலை மழையில் நனைந்து குளித்தது போல் ஆயிற்றாம்; அவன் புலியை விரட்ட மரத்திலிருந்து கீழே போட்ட வில்வ இலைகள் மழையின் நீரால் நனைந்து, அவனை அறியாமல், அவன் அறியாத லிங்கத்தின் மீது விழுந்தனவாம். எனவேதான், அன்று சிவராத்திரி, இரவில் லிங்கபூசை செய்தது போல் ஆயிற்றாம். அவன் இவ்விதம் செய்தது சிவனைக் கும்பிடவேண்டும் என்கிற எண்ணமில்லாமல் போனாலும், சந்தர்ப்பவசத்தால் பகல் முழுதும் பட்டினி கிடந்தது, சிவராத்திரி - பகல் உபவாசம் இருந்தது போல் ஆயிற்றாம். புலியை விரட்ட மழைத் தண்ணீரால் நனைந்த வில்வ இலைகள் லிங்கத்தின் மீது தற்செயலாய் விழுந்தபடியால், அதைக் குளிப்பாட்டி, வில்வ இலைகளால் அர்ச்சனை செய்ததுபோல் ஆயிற்றாம். இதனால் அவன் வான் உலகை அடைந்தானாம். அடுத்த கதை - ஒரு பார்ப்பன வாலிபனைப் பற்றியது. இவன் சுத்த அயேக்கியனும் ஒழுக்கக் கேடனும் ஆவானாம். இதனால் ஊரை விட்டுத் துரத்தப்பட்டானாம். காலை முதல் இரவு முடிய உண்ண உணவு இல்லாமல், பசியால் வாடிய அவன் இரவு வந்ததும் ஒரு சிவன் கோயிலை அடைந்தானாம். அப்போது அந்தக் கோயில் அர்ச்சகன் பொங்கல் படையலை அந்த ஈசுவரன் சிலை முன் வைத்து விட்டு வெளியில் சென்று இருந்தான். இந்தப் பார்ப்பன வாலிபன் யாரும் இல்லாத சமயம் அங்கு சென்றபடியால் அவற்றை எடுத்து உண்ண ஆசைப்பட்டு, என்னென்ன பலகாரங்கள் இருக்கின்றன என்பது தெரியாதபடியால், இருண்ட வெளிச்சமாக இருந்ததைக் கருதி, கோயிலில் இருந்த விளக்கின் திரியைத் தூண்டி விட்டானாம். அப்போது திரும்பி வந்த அர்ச்சகன் பார்ப்பன இளைஞன் பலகாரங்களை மூட்டை கட்டுவதைக் கண்டு ஆத்திரத்தில் அவனை அடித்துக் கொன்றான். அன்று மகாசிவராத்திரியாம். ஒழுக்கங்கெட்ட அந்தப் பார்ப்பான், காலை முதல் இரவு வரை பட்டினி இருந்தது மகாசிவராத்திரி பகல் உபவாசம் ஆனதாம். திருட எண்ணி, பிரசாதங்களைப் பார்ப்பதற்கு விளக்கு வெளிச்சத்தைத் தூண்டியது சிவராத்திரியில் ஈசுவரலிங்க சிலைக்கு தீபாராதனை செய்தது போலவும், பிரசாத நிவேதனம் செய்தது போலவும் ஆனதாம். இதனால் பார்ப்பன பூசாரியால் கொல்லப்பட்டதும் நேராக சிவலோகம் சென்றானாம். சிவராத்திரியில் மனிதக்கொலை; அவன் கொலை செய்தது எந்தப் புண்ணியத்தைச் சேர்ந்ததோ? கொலை செய்த அர்ச்சகனுக்கு எந்த லோகம் அளிப்பதோ? என்பது எல்லாம் அதில் கூறப்படவில்லை. மனிதனுக்குப் பிறப்பு அடுத்து இறப்பு வருவது இயற்கைத் தத்துவம் என்பது உண்மை. உலகில் மனிதனாய்ப் பிறந்த ஒவ்வெருவருக்கும் இயல்பாய் தெரிந்த உண்மையாகும். ஆனால், இந்த சிவராத்திரி விரதங்களின் முக்கிய அடிப்படை, பகலை அடுத்து இரவு வருவதுபோல் , மனிதருக்குப் பிறப்பை அடுத்து இறப்பு வருவது என்பதுதானாம். இதைத் தெரிந்து கொள்ள பூசையும் விரதமும் வேண்டுமா? என்றுதான் நாம் கேட்கின்றோம். இந்தப் பாழும் அர்த்தமற்ற, -பொய்யான,  ஒரு காசுக்கும் உதவாத, நமக்கு இழிவையும் அவமானத்தையும் தருவதான _ பண்டிகைகளுக்கும், உற்சவத்திற்கும், பூசைக்கும், சடங்குக்குமாகப் பொருளையும் பணத்தையும் விரயப்படுத்துவது மக்களின் அறியாமையும், சுயநலக்காரர்களின் சூழ்ச்சியும், புரோகிதர்களின் ஆதிக்கமும், தந்திரமுமே ஆகும். இவைகளை உடனடியாக ஒழிக்க வேண்டும்.  செய்திகளை பகிர்ந்து கொள்ள

சிவன் பற்றி பெரியார்

“புலித்தோல் அரைக்கு இசைத்து வெள்ளெருக்கம்பூ சடைக்கு முடிந்து சுடலைப் பொடி பூசி கொன்றைப் பூச்சூடி தும்பை மாலை அணிந்து மண்டை ஓடு கையேந்தி எலும்பு வடம் தாங்கி மான், மழு, ஈட்டி, சூலம் கைபிடித்து கோவண ஆண்டியாய் விடை (மாடு) ஏறி ஒரு காலைத் தூக்கிக்கொண்டு பேயோடு ஆடுகிறவன்.. காட்டுமிராண்டியாய் இல்லாமல் நகரவாசி, நாகரிகக்காரனாக இருக்க முடியுமா? சைவர்களே..! சைவப் புலவர்களே..! அருள்கூர்ந்து கூறுங்கள்.’’ - ஈ.வெ.ரா. (விடுதலை, 18.7.1956) இந்தக் காட்டுமிராண்டிக்கால சிவனுக்குத்தான் மகா சிவராத்திரியாம்..!! இவன் யோக்கியதை என்ன தெரியுமா? தாருகாவனத்து ரிஷி பத்தினிகளின் கற்பைச் சூறையாடியதால், ரிஷிகள் கொடுத்த சாபத்தினால் அவன் சிசுனம் (ஆண் குறி) அறுந்து வீழ, அதனைப் பார்வதி தாங்கிக் கொண்டாளாம்!  அதுதான் சிவலிங்க உருவம் என்பது..!! என்கிறது லிங்கபுராணம். இப்படிப்பட்ட சிவன் ஒரு கடவுளா?செய்திகளை பகிர்ந்து கொள்ள

முகப்புக் கட்டுரை : கல்வியில் கண்ணிவெடியில் எச்சரிக்கை! எச்சரிக்கை!

கவிஞர் கலி.பூங்குன்றன் புதிய கல்விக் கொள்கை: 1991இல் புதிய பொருளாதாரக் கொள்கை அமல்படுத்தப்பட்ட பின் கல்வி, மருத்துவம் ஆகியவை தனியார்க்கு தாரை வார்க்கப்பட்டன. மத்திய அரசு கொண்டு வந்த புதிய கல்விக் கொள்கையும் ஏழைகளுக்கு ஒரு கல்வியும், வசதி படைத்தவர்களுக்கு சிபிஎஸ்இ மெட்ரிக் பள்ளிகளையும் உருவாக்கின. 120 கோடிக்கு மேல் உள்ள இந்திய மக்களில் 40 சதவிகிதம் மக்கள் கல்வியற்றவர்களாக இருக்கிறார்கள். கல்வி உரிமைச் சட்டம் 2009இல் கொண்டு வரப்பட்டு 1.4.2010 முதல் அமலுக்கு வந்தது. ஆனால், தனியார் பள்ளிகளின் கொள்கை மாற்றப்படவில்லை. அதனால் மூன்று கல்விக் கொள்கைகளாலும் தாழ்த்தப்பட்ட, பிற்படுத்தப்பட்ட, மிகவும் பிற்படுத்தப்பட்ட மக்களின் கல்வி நிலை இன்னும் உயரவில்லை. இந்நிலையில் மத்திய பா.ஜ.க அரசு தேசிய கல்விக் கொள்கை வரைவை வெளியிட்டிருக்கிறது. தேசிய கல்விக் கொள்கை 2019 வரைவு அறிக்கை: அனைவருக்கும் உயர்தரக்கல்வி வழங்குவதன் மூலம் நமது தேசத்தை ஒருங்கிணைந்த மற்றும் துடிப்பான அறிவுமிக்க சமுதாயமாக மாற்றுவதற்கு நேரடியாகப் பங்களிக்கும் விதமாக இந்தியை மய்யமாகக் கொண்ட கல்வி முறையாக தேசியக் கல்விக்கொள்கை 2019 (வரைவு) கருதப்படுகிறது. பள்ளிக்கல்வி அமைப்பு முறை: பள்ளிக்கான பாடத்திட்ட வரையறை (கலைத்திட்டம்) 1968இல் (10+2) பள்ளிக்கல்வி 12 ஆண்டுகளாக மாற்றப்பட்டு 1_5 வகுப்பு தொடக்கப்பள்ளி, 6_8 வகுப்பு நடுநிலைப்பள்ளி, 9_10 உயர்நிலைப்பள்ளி, 11_12 வகுப்பு மேல்நிலைப் பள்ளிகள் என உருவாக்கப்பட்டு செயல்பட்டு வருகின்றன. மாநில அரசின் கல்விக் கொள்கைகள் எல்.கே.ஜி., யு.கே.ஜி. 1_5 வகுப்பு வரை நர்சரி பள்ளிகளை உருவாக்கியதால் _ அரசுப் பள்ளிகளில் மாணவர்களின் எண்ணிக்கை குறைந்தது. தேசியக் கல்விக் கொள்கை பாடத்திட்ட வரையறை (கலைத்திட்டம்) (5+3+3+4) 5 வருடம் அடிப்படை நிலை_பிரிகேஜி, எல்கேஜி, யுகேஜி மற்றும் 1, 2 வகுப்புகளும், 3 வருடம் ஆயத்த நிலை _3, 4, 5 வகுப்புகளும், 3 வருடம் நடுநிலை _ 6, 7, 8 வகுப்புகளும், 4 வருடம் உயர்நிலை அல்லது இடைநிலை 9, 10, 11, 12 வகுப்புகளும் உருவாக்கப்பட்டுள்ளன. அரசு பால்வாடிப் பள்ளிகள் தொடக்கப் பள்ளியோடு இணைக்கப்படுவதால் பிரிகேஜி, எல்கேஜி, யுகேஜி மற்றும் 5ஆம் வகுப்பு வரை பாடச்சுமை அதிகரிக்கப்படுகிறது. அவர்களின் உடல்நலம், மனநலம் பாதிக்கக்கூடிய நிலைக்கு குழந்தைகள் தள்ளப்படுகிறார்கள். கோத்தாரி கமிஷன் கல்வி முறையில் அருகமை தொடக்க, நடுநிலைப் பள்ளிகளில் படிக்க வாய்ப்பு உருவாகும். தற்போதைய கல்விக் கொள்கையால் தொடக்க, நடுநிலைப்பள்ளியில் படிக்கும் குழந்தைகளுக்கு கல்வி கிடைக்க வாய்ப்பு இல்லாமல் போய்விடும். தொழிற்கல்வி முறையா? குலக்கல்வி முறையா? வாழ்க்கைத்திறன் மேம்பாட்டுப் பயிற்சி: பல்வேறு தொழில்கள் 3, 4, 5 வகுப்புகளில் குழந்தைகளுக்கு தோட்டக்கலை, மண்பாண்டம் செய்தல், மரவேலை குறித்து அருகில் உள்ள பயிற்றுநர்கள் மாணவர்களுக்குக் கற்றுக் கொடுப்பார்கள். 6ஆம் வகுப்பு முதல் 8ஆம் வகுப்பு வரை ஆண்டு முழுவதும் மரவேலை, மின்துறை சார்ந்த வேலை, தோட்டக்கலை, மண்பாண்ட வேலைகள், விவசாயம் கற்றுக்கொடுப்பது, கல்வி உரிமைச்சட்டம், 18 வயது குழந்தைகள் கல்வி கற்பது. இந்தக் கொள்கை அதை ஒழித்து தொழிற்கல்வி என்கிற பெயரில் வர்ணாசிரமக் கல்வி முறையை மீண்டும் உருவாக்குகிறது. தேர்வுமுறைகள்: 1ஆம் வகுப்பு முதல் 8ஆம் வகுப்பு மாணவர்களுக்கு பள்ளிகளில் நடைபெறும் பொதுத் தேர்வுடன் நிறுத்தாமல் 3, 5, 8 வகுப்புகளுக்கு மாநில அரசுகளால் மாநில அளவில் பொதுத்தேர்வு நடத்தப்படும். கல்வி உரிமைச் சட்டம் வழங்கியுள்ளபடி கல்வி வழங்குவதை உறுதிப்படுத்தாமல் தேர்வுகள் மூலம் மாணவர்களுக்கு மன உளைச்சலை ஏற்படுத்துவதோடு 8ஆம் வகுப்பிற்கு மேல் பள்ளிப் படிப்பை தொடரவிடாமல் செய்வதே இந்த தேசிய கல்விக் கொள்கையின் உள்நோக்கமாகும். தமிழ்நாட்டில் கடும் எதிர்ப்புக் காரணமாக திராவிடர் கழகத்தின் சார்பில் நாகர்கோயில் முதல் சென்னை வரை (20.1.2020 முதல் 30.1.2020 வரை) திராவிடர் கழக தலைவர் மானமிகு ஆசிரியர் கி.வீரமணி அவர்கள் தலைமையில் மேற்கொள்ளப்பட்ட பிரச்சாரப் பெரும் பயணம் காரணமாக நிறுத்தப்பட்டுள்ளது. மற்ற மாநிலங்களில் இந்த நிலை இல்லை. ஆசிரியர்களின் பணி நிலை: இந்தியாவில் 10 இலட்சம் ஆசிரியர் பணி இடங்கள் காலியாக உள்ளன என வரைவு அறிக்கை கூறுகிறது. பயிற்சி பெற்ற ஆசிரியர்களை நியமிக்காமல் டெட்  (TET)   தேர்வு மூலம் பணி நியமனம் கட்டாயமாக்கப்படும். ஆசிரியர்களுக்கு ஊதியம், பதவி உயர்வு, தகுதி மற்றும் திறன் அடிப்படையில் வழங்கப்படாமல் வயது மூப்பு அடிப்படையில் வழங்கப்படுவது, தகுதி, திறன் என்னும் தேர்வு மூலம் ஊதிய உயர்வு, பதவி உயர்வு வழங்கப்படுவது சமூகநீதிக்கும், அரசியல் அமைப்புச் சட்டத்திற்கும் எதிரானதாகும். இடைநிற்றல் மாணவர்கள் நிலை: 2030ஆம் ஆண்டிற்குள் 3 முதல் 18 வயதிற்கு உட்பட்ட அனைத்து குழந்தைகளுக்கும் இலவச கட்டாயக் கல்வி வழங்க வேண்டும். U.DISE மூலம் மாவட்ட வாரியாக ஒருங்கிணைந்த பள்ளிக்கல்வி தரத்தின் அடிப்படையில் 2016_2017ஆம் ஆண்டுக்கான தேர்ச்சி விகிதம் வரைவு அறிக்கை பகுதி 39ஆம் பக்கத்தில் கொடுக்கப்பட்டுள்ளது. அய்ந்தாம் வகுப்பிற்கு பின் மாணவர்களின் இடைநிற்றல் அதிகமாக உள்ளது. 2015ஆம் ஆண்டு தேசிய அளவில் 6.2 கோடி குழந்தைகள் (வயது 6_18) பள்ளியைவிட்டு விலகியுள்ளனர். இடைநிற்றல் என்னும் அபாயம் தமிழ்நாட்டில் 9, 10ஆம் வகுப்பு மாணவர்கள் இடைநிற்றல்  (Drop Outs) 100 விழுக்காடு அதிகரித்துள்ளது. மத்திய மனித வள மேம்பாட்டுத்துறை அமைச்சர் நாடாளுமன்றத்தில் அறிவித்தார். மேல்தட்டுச் சிந்தனையோடு கல்வியில் மேற்கொள்ளப்படும் பல்வேறு அறிவிப்புகளால் இந்த நிலை ஏற்படப் போவது _ ஏற்படப் போகிறது என்று தொடர்ந்து திராவிடர் கழகம் அறிவித்துக் கொண்டே வந்திருப்பது என்பது குறிப்பிடத்தக்கதாகும். இடைநிற்றலுக்கான காரணம் என்ன? ஆனால், தமிழகத்தில் கற்றலின் அவசியத்தை எடுத்துக் கூறும் இடத்திலிருப்பவர்களே குழந்தைகளின் இடைநிறுத்தலுக்குக் காரணமாக இருக்கிறார்கள் என்கிறது ஒரு புள்ளி விவரம். அண்மையில், மத்திய மனிதவள மேம்பாட்டுத் துறை அமைச்சகம் வெளியிட்டுள்ள ஒரு தகவல் அதிர்ச்சியானது. சுமார் 1 லட்சத்து 8,224 மாணவ_மாணவியர் இடைநிலைக் கல்வியிலிருந்து நின்றுள்ளதாக சொல்கிறது அந்தக் குறிப்பு. ‘தமிழகத்தில் 2013_2014 ஆண்டில் 11 லட்சத்து 69 ஆயிரம் 110 பேர் ஒன்பதாம் வகுப்பில் சேர்ந்துள்ளனர். இவர்களில், அடுத்தாண்டு பத்தாம் வகுப்பு பொதுத் தேர்வு எழுதியவர்கள் 10 லட்சத்து 72 ஆயிரத்து 691 பேர் மட்டுமே. மீதி 96 ஆயிரத்து 419 மாணவர்கள் என்ன ஆனார்கள்? எனக் கேள்வி எழுகிறது. இது தவிர தேர்வு எழுத இருந்தவர்களில் 12 ஆயிரம் பேர் தேர்வெழுத வராமல் இருக்கின்றனர். இதனால், ஒரு லட்சம் மாணவர்கள் இடைநிற்றலில் இருப்பது உறுதி செய்யப்பட்டுள்ளது. தேர்ச்சி விகிதத்தை உயர்த்திக் காட்ட சுமாராகப் படிக்கும் மாணவர்களுக்கு ஒன்பதாம் வகுப்பு முடிந்ததும் டி.சி. கொடுக்கப்படும் குற்றச்சாட்டும் உறுதி செய்கிறது. சமீபத்தில் நெல்லையில் சில தனியார் பள்ளிகள் இந்த நடவடிக்கையில் இறங்கியுள்ளன. தமிழகத்தில், சுமார் ஒரு கோடியே 30 லட்சம் மாணவ_மாணவிகள் பள்ளிக் கல்வி பயின்று வருகின்றனர். முன்பு மாணவர்களை தேர்ச்சி பெறாமல் செய்வது சாதாரண நிகழ்வாக இருந்தது. ‘அனைவருக்கும் கல்வி இயக்கம்’ அறிமுகமானபோது, பள்ளிப் படிப்பை முடிக்காமல் இடையிலேயே நிற்கும் மாணவர்களைப் பற்றி ஆய்வு நடத்தப்பட்டது. தேர்ச்சி நிறுத்தம் (பெயில்) ஆக்குவதால்தான் இடைநிற்றல் அதிகரிக்கிறது என்பது இதில் தெரிய வந்தது. இதனால், எட்டாம் வகுப்பு வரை அனைவரையும் தேர்ச்சி செய்வதை உறுதி செய்தனர். பின்னர், இது ஒன்பதாம் வகுப்பு வரை நீடிக்கப்பட்டது. ஆனால், பத்தாம் வகுப்பில் தேர்ச்சி விகிதத்தை உயர்த்திக் காட்ட ஒன்பதாம் வகுப்பிலேயே சுமாராகப் படிக்கும் மாணவர்களுக்கு டி.சி. கொடுக்கப்படுகிறது. இது ஒருபுறம் இருக்க, மாணவர்களின் பொருளாதார நிலை, குடும்பச் சூழல் போன்றவையும் இடைநிற்றலுக்குக் காரணமாக அமைந்தன. அரசு பள்ளிகளில் பயிலும் மாணவர்கள் ஒவ்வொருவருக்கும் சராசரியாக ரூ.30 ஆயிரத்துக்கும் கூடுதலாக செலவழிக்கப்படுகிறது. இது மத்திய அரசின் கேந்திரிய வித்யாலயா பள்ளி மாணவர்களுக்கும் செலவழிக்கப்படும் ரூ.27,150அய்விட பத்து விழுக்காட்டுக்கும் அதிகம் ஆகும். அது மட்டுமின்றி, அரசுப் பள்ளிகளில் பயிலும் ஏழை மாணவர்களுக்கு மடிக்கணினி உள்ளிட்ட 14 வகையான பொருள்கள் இலவசமாக வழங்கப்படுகின்றன. இதற்காக மட்டும் ஆண்டுக்கு ரூ.1967.47 கோடி செலவிடப்படுகிறது. இது தவிர கல்வி உதவித் தொகை ஆயிரக்கணக்கில் வழங்கப்படுகிறது. இவற்றுக்கெல்லாம் மேலாக இடைநிற்றலைத் தடுப்பதற்காக ஜெயலலிதா ஆட்சிக்காலத்தில் பத்தாம் வகுப்பில் ரூ.1500, 11ஆம் வகுப்பில் ரூ.1500, 12ஆம் வகுப்பில் ரூ.2000 என ஒவ்வொரு மாணவருக்கும் மொத்தம் ரூ.5,000 சிறப்பு உதவித் தொகையாக வழங்கப்பட்டது. மேலும் தமிழக அரசு, இடைநிற்றல் தவிர்ப்புத் திட்டத்தைக் கொண்டு வந்தது. இத்திட்டத்தின்படி பத்தாம் வகுப்பு மற்றும் +1 தேர்ச்சி பெற்றால் தலா ரூ.1500ம், பிளஸ் 2 படித்தால் ரூ.2 ஆயிரமும் வங்கி வழங்கும் வட்டியோடு +2 தேர்ச்சி பெற்றதும் அந்த மாணவரின் கணக்கில் வரவு வைக்கப்பட்டது. இது உயர்கல்விக்குப் பயன்படும் வகையில் செயல்படுத்தப்பட்டது. ஆனால், இதன்பிறகும் இடைநிற்றல் நிகழ்கிறது என்கிறார்கள் கல்வியாளர்கள். தமிழக அரசு கடந்த 3 ஆண்டுகளாக பள்ளிகளில் இடைநிற்றலே இல்லை என்றே இதுவரை கணக்குக் காட்டி வந்திருக்கிறது. அதற்கு முரணாக இப்போது மனிதவளத் துறை ஒரு கணக்கீட்டை வெளியிட்டுள்ளது. இது, சாதாரணமாக செய்யப்பட்ட ஆய்வாக இருக்கலாம். இன்னும் ஆழமாக ஒவ்வொரு கல்வி மாவட்ட வாரியாக ஆய்வு செய்தால் இடைநிற்றல் மாணவர்களின் சரியாக புள்ளி விவரம் கிடைக்கும். அது நிச்சயம் இதைவிட அதிக அளவில் இருக்கும். தமிழ்நாட்டில் பள்ளிக்கூடங்களின் நிலை என்ன? அய்யாயிரத்திற்கும் மேற்பட்ட தொடக்கப் பள்ளிகள் ஈராசிரியர் பள்ளிகளாக உள்ளன. 59 மாணவர்கள் உள்ள பள்ளிகளில் 5 வகுப்புகள், 25 பாடங்கள். ஆனால், அங்கு இரு ஆசிரியர்கள் மட்டுமே பாடங்களை நடத்தி வருகின்றனர். இதன் விளைவு கல்வி வளர்ச்சியில் தமிழ்நாடு இந்திய அளவில் ஏழாம் இடத்திற்குத் தள்ளப்பட்டுவிட்டது. இந்த இடைநிற்றலால் சமுதாயத்தில் ஏற்படும் பாதிப்புகள் கவனத்துக்குரியன. குறிப்பாக பெண்கள் பள்ளிகளுக்கு அனுப்பப்பட மாட்டார்கள்; அத்தோடு நின்றுவிடப் போவதில்லை. இளம் வயதிலேயே பெண்களுக்குக் கல்யாணத்தையும் கட்டி வைத்துவிடுவார்கள். ஒன்றில் தொடங்கும் தவறு எதில் போய் முடிகிறது என்பது பற்றியெல்லாம் ஆட்சியாளர்களுக்குக் கவலை இல்லை. மேல்தட்டு மக்கள் வசதி வாய்ப்புள்ளவர்கள் எப்படியும் படித்துவிடுவார்கள். பாதிக்கப்படுவதோ, ‘பஞ்சம’, ‘சூத்திர’ _ கிராமப்புற ஏழை எளிய மக்கள்தானே! ‘நீட்’ ஏன் வேண்டாம்? இந்த வருட முடிவைக் கொண்டே தெரிந்து கொள்ளலாம். மருத்துவக் கவுன்சில்  (Medical Council of Inida (MCI))  கணக்குப்படி இந்தியாவில் மருத்துவக் கல்லூரி இடங்கள் 63835. இந்தியா முழுவதும் கடை விரித்திருக்கும் Aakash Foundations  என்னும் தனியார் கோச்சிங் சென்டரில் மட்டும் பயிற்சி எடுத்து வெற்றி பெற்றவர்களின் எண்ணிக்கை: 61649. அதாவது 63835 மருத்துவக் கல்லூரி இடங்களில் 96% இடங்களை இந்த ஒரு தனியார் நீட் கோச்சிங் சென்டரில் பயின்ற மாணவ மாணவிகள் கைப்பற்றியிருக்கின்றனர். வெற்றி பெற்ற மாணவர்களிடம் நமக்கு எந்தப் பிரச்சினையும் இல்லை. அவர்கள் மீது  எந்த விமர்சனமும் இல்லை. இந்த Aakash Foundations என்னும் தனியார் கோச்சிங் சென்டரில் கட்டணம் என்ன என்பதுதான் முக்கியம். Aakash - One year Regular Course for NEETINR 1,36,526Aakash - Two Years Integrated Course for NEETINR 3,33,350Aakash - Crash Course for NEETINR 32,804 நல்லா கண்ணை விரிய திறந்து பார்த்துக் கொள்ளுங்கள். +2 முடித்துவிட்டு விடுமுறையில் 1 மாதம் நடத்தக்கூடிய  Crash Course Fees மட்டுமே INR 32,804. குறைந்தபட்சம் ரூ.32,804/_ இருந்தால் மட்டுமே நம் குழந்தைகள் ‘நீட்’ தேர்வு பயிற்சிக்கு போய், படிச்சு, ‘நீட்’ தேர்வு எழுதி டாக்டர் ஆக முடியும். இந்த ஆண்டு ‘நீட்’ தேர்வில் தமிழக அளவில் முதலிடமும், இந்திய அளவில் 12ஆம் இடமும் பெற்ற கீர்த்தனா படித்தது சென்னையில் பெரிய பள்ளிகளில் ஒன்றான  PSBB. பெற்றோர் இருவருமே மருத்துவர்கள். CBSE Syllabus தான். ஆனாலும், கீர்த்தனா இந்த ஆண்டு +2 முடித்துவிட்டு நேரடியாக ‘நீட்’ தேர்வு எழுதி இந்த வெற்றியை அடையவில்லை. அவள் +2 முடித்த ஆண்டு 2016. அதாவது சென்னையில் பெரிய பள்ளிகளில் ஒன்றான  PSBBயில்,  CBSE Syllabus-ல் +2 முடித்த ஒருவர் 2 ஆண்டு தனியார் கோச்சிங் சென்டரில் லட்சக்கணக்கான பணம் செலவு செய்து இந்த வெற்றியை அடைந்திருக்கிறார். அவருடைய பேட்டி இணையத்தில் உள்ளது. பேட்டியின்போது அவரை சுற்றி கோச்சிங் சென்டர் ஆசிரியர்கள் குழுமியுள்ளனர். அவர்கள் கழுத்தில் தொங்கும் அடையாள அட்டைகளே அதற்கு சான்று. தமிழ்நாட்டில் உள்ள 23 மருத்துவக் கல்லூரிகள் ஏதேனும் ஒன்றில்கூட எம்பிபிஎஸ் படிக்க ஆண்டுக் கட்டணம் ரூ.32,000 கிடையாது. ஆனால், Aakash Crash Course for NEET  மட்டுமே ரு.32,804/_ அனிதாவும் பிரதீபாவும் இந்த 23 அரசு கல்லூரிகளில் இருந்த மருத்துவக் கல்லூரி இடங்களுக்குத்தான் போட்டியிட்டார்கள். அதற்கான தகுதியும் அவர்கள் இருவருக்கும் இருந்தது. அனிதா _ 1175/1200, பிரதீபா _ 1125/1200 ஆனால், ‘நீட்’ என்கிற ஒரு தடுப்பை வைத்து அவர்களின் உயிரைக் குடித்தாயிற்று. நாங்களும் தமிழ்நாடு அரசுக்குச் சொந்தமான இந்த 23 அரசு மருத்துவக் கல்லூரிகளில் இருக்கும் 2500 இடங்களுக்கு மட்டுமே ‘நீட்’ தேர்வில் இருந்து விலக்கு கேட்கிறோம்.  தனியார் மருத்துவக் கல்லூரிகளுக்கு அல்ல. தமிழ்நாடு அரசு சென்ற ஆண்டு நிறைவேற்றிய ‘நீட்’ விலக்கு சட்டமும் இதை தெளிவாகச் சொல்லியிருக்கிறது. இதைத்தான் தரம் என்று நம் மீது திணித்துக் கொண்டிருக்கிறார்கள். இதனால் பல தமிழக மாணவர்களின் கனவு பலியாக்கப்பட்டு வருகிறது. அவர்கள் நோக்கம் தரத்தைக் கொண்டு வருவதல்ல. மேல் ஜாதிக்காரர்கள் பணக்காரர்களைத் தவிர வேறு யாரும் மருத்துவர் ஆகக்கூடாது என்பதுதான். ஏதோ தமிழ்நாடு மட்டுமே ‘நீட்’ தேர்வை எதிர்ப்பதாக ஒரு பொய்யான பிம்பத்தை காவிப் பக்தர்கள் கூட்டம் கட்டமைக்கிறது. பி.ஜே.பி.யின் பிதாமகர் உத்தமசீலர் மோடியே குஜராத் முதல்வராக இருந்தபோது ‘நீட்’ தேர்வை எதிர்த்தவர்தான். முதல்வராக இருந்த காலத்தில் ஒன்றை எதிர்ப்பதும், பிரதமரான பின் அதை ஆதரிப்பதும் இந்த ‘உத்தமசீலருக்கு’ ஒன்றும் புதிதல்ல. ஆதார் அட்டை ஜிஎஸ்டி நீட் இது மூன்றுமே குஜராத் முதல்வராக இருந்த தாமோதர நரேந்திரதாஸ் மோடி எதிர்த்ததுதான். மனுதர்மத்தைத் தொடர்ந்து, திராவிடர் இயக்கம் தோன்றி, தந்தை பெரியார், காமராசர், திராவிட இயக்க ஆட்சிகளால் கல்வியில் ஒடுக்கப்பட்ட மக்கள் முதல் தலைமுறையாகக் கல்விக் கூடத்தில் நுழைந்த தமிழின மக்கள் தலைநிமிர்ந்து நடைபோடத் துவங்குகிற ஒரு காலகட்டத்தில் பல கண்ணிவெடிகளைப் புதைத்து, நம் மக்களின் எதிர்காலத்தை ஒழித்துக் கட்டும் திட்டங்கள் ஒவ்வொன்றாக அரங்கேறுகின்றன. எச்சரிக்கை! எச்சரிக்கை! ஆச்சாரியார் இருமுறை ஆட்சிக்கு வந்து கல்விக் கதவைச் சாத்தினார். அதில் தோல்வியே கண்டவர்கள் மத்தியிலிருந்து புதிய குலதர்மக் காவியாளர்கள் எழுந்துள்ளார்கள்! எச்சரிக்கை! எச்சரிக்கை!!    செய்திகளை பகிர்ந்து கொள்ள

தலையங்கம் : தாழ்த்தப்பட்ட - மலைவாழ் மக்களுக்குப் பதவி உயர்வில் இடஒதுக்கீடு கூடாது எனும் உச்சநீதிமன்ற தீர்ப்பு சட்ட விரோதமானது!

தாழ்த்தப்பட்டோர் _மலை வாழ் மக்களுக்கு (எஸ்.சி, எஸ்.டி.) பதவி உயர்விலும் இடஒதுக்கீடு உண்டு என்னும் சட்டத் திருத்தமும், 5 நீதிபதிகள் கொண்ட உச்சநீதிமன்ற அமர்வின் தீர்ப்பும் உள்ள நிலையில், இரு நீதிபதிகள் இடஒதுக்கீடு கூடாது என்று தீர்ப்பு அளித்திருப்பது சட்டப்படி தவறானதாகும். மத்திய அரசு தலையிட வேண்டும்; நாடாளுமன்ற உறுப்பினர்கள் கவனம் செலுத்த வேண்டும் என்று திராவிடர் கழகத் தலைவர் ஆசிரியர் கி. வீரமணி அவர்கள் விடுத்துள்ள அறிக்கை வருமாறு: நாடாளுமன்றத்தில் 1995இல் தாழ்த்தப்பட்ட _ மலைவாழ் மக்களுக்கு (எஸ்.சி., எஸ்.டி.) பதவி உயர்வில் இடஒதுக்கீடு அளிக்கும் விதமாக அரசமைப்புச் சட்டத்திருத்தம் (77ஆவது சட்டத் திருத்தம்) நிறை வேற்றப்பட்டது. 1992இல் மண்டல் குழு வழக்கு தொடர்பாக தீர்ப்பளித்த ஒன்பது நீதிபதிகள் கொண்ட உச்சநீதிமன்ற அமர்வு, தாழ்த்தப்பட்ட _ மலைவாழ் மக்களுக்கு (எஸ்.சி., எஸ்.டி.) பதவி உயர்வில் இன்னும் அய்ந்து ஆண்டுகள் மட்டுமே இடஒதுக்கீடு தர முடியும் என தீர்ப்பளித்ததையடுத்து 77ஆவது சட்டத்திருத்தம் நிறைவேற்றப்பட்டது. THE CONSTITUTION (SEVENTY SEVENTH AMENDMENT) ACT, 1995Amendment of article 16 -In article 16 of the Constitution, after clause (4), the following clause shall be inserted, namely:-“(4A) Nothing in this article shall prevent the State from making any provision for reservation in matters of promotion to any class or classes of posts in the services under the State in favour of the Scheduled Castes and the Scheduled Tribes which, in the opinion of the State, are not adequately represented in the services under the State.”. இந்த சட்டத்தின் மீதும், உச்ச நீதிமன்றத்தில் வழக்கு தொடரப்பட்டு (எம்.நாகராஜ் எதிர் மத்திய அரசு), நீதிபதிகள் ஒய்.கே.சபர்வால், கே.ஜி.பாலகிருஷ்ணன், எஸ்.எச்.கபாடியா, சி.கே.தாகூர், பி.கே.பாலசுப்ரமணியன் ஆகியோர் அடங்கிய அய்ந்து நீதிபதிகள் கொண்ட உச்ச நீதிமன்ற அமர்வு, 77ஆவது அரசமைப்புச் சட்டத் திருத்தம் செல்லும் என்று 19.10.2006இல் தீர்ப்பளித்துள்ளது. மீண்டும் 8.1.2016இல் உச்ச நீதிமன்றம் அளித்த தீர்ப்பிலும் (சென்ட்ரல் பாங்க் ஆப் இந்தியா எதிர் சென்ட்ரல் பாங்க் ஆப் இந்தியா  தாழ்த்தப்பட்ட  _ மலைவாழ் இன நலச் சங்கம்) அரசு வங்கிகளில் அதிகாரிகள் பதவி உயர்விலும் இட ஒதுக்கீடு வழங்கலாம் எனத் தீர்ப்பளித்துள்ளது. தற்போது உச்ச நீதிமன்றத்தில் தீர்ப்பளித்துள்ள நீதிபதிகள் எல்.நாகேஷ்வரராவ் மற்றும் ஹேமந்த் குப்தா ஆகியோர் தங்களது தீர்ப்பில் “பதவி உயர்வில் இட ஒதுக்கீடு அளிப்பது கட்டாயம் அல்ல” என்று தீர்ப்பளித்துள்ளதாக பத்திரிகைகளில் செய்தி வந்துள்ளது. தாழ்த்தப்பட்ட _ மலைவாழ் மக்களுக்கு (எஸ்.சி., எஸ்.டி.) உயர் பதவிகளில் போதுமான அளவு இடங்கள் இல்லை என்கிற நிலையில்தான் நாடாளுமன்றம் 1995இல் சட்டத்திருத்தம் நிறைவேற்றியுள்ளது. இதனை மறுதலிக்கின்ற வகையில் தீர்ப்பு இருப்பதாக சந்தேகம் எழுந்துள்ள நிலையில்தான்  மத்திய அரசு தலையிட்டு, 1995இல் நாடாளுமன்றத்தில் ஒருமனதாக நிறைவேற்றப்பட்டது. இப்பொழுது வழங்கப்பட்டுள்ள தீர்ப்பு சட்டப்படி சரியானதல்ல. 5 நீதிபதிகள் கொண்ட உச்சநீதிமன்ற அமர்வு வழங்கிய தீர்ப்பை _ இரு நீதிபதிகள் கொண்ட அமர்வு நிராகரிப்பது சட்டப்படி தவறானதாகும்.மத்திய அரசும், நாடாளுமன்ற உறுப்பினர்களும் இதில் கவனம் செலுத்தட்டும்!  - கி.வீரமணி, தலைவர், திராவிடர் கழகம்.  செய்திகளை பகிர்ந்து கொள்ள

இயக்க வரலாறான தன் வரலாறு(244) : சி.பி.எஸ்.ஈ மதிப்பெண் ஊழல்!

அய்யாவின் அடிச்சுவட்டில் ... கி.வீரமணி  10.7.1992 அன்று திருவாரூர் மாவட்டம் சோழங்கநல்லூரில் நடைபெற்ற அன்னை மணியம்மையார் பெயரிலான மகப்பேறு இல்ல அடிக்கல் நாட்டு விழா நடைபெற்றது. விழாவில் மகப்பேறு மருத்துவமனைக்கு அடிக்கல் நாட்டி உரை நிகழ்த்தினேன். அதே நாளில் எரவாஞ்சேரியில் தந்தை பெரியார் சிலை திறப்பு விழா நிகழ்ச்சி நடைபெற்றது. விழாவில் கலந்துகொண்டு அய்யா சிலையைத் திறந்துவைத்து உரை நிகழ்த்தினேன். அப்போது, “தந்தை பெரியார் அவர்களுடைய முதல் சிலை திறப்பு விழா நிகழ்ச்சி நடைபெறுகின்றது. பல சிலை திறப்பு விழாக்களில் அய்யா அவர்களே இருந்திருக்கின்றார்கள். அந்த முதல் சிலை திறப்பு விழாவிற்கு ஒருவர் வந்தார். அவர் மிக மிக முக்கியமானவர். அவர் அய்யா அவர்களிடத்திலே பேசிக் கொண்டிருந்தார். அப்படி பேசிக் கொண்டிருக்கும்போது அய்யா அவர்களைப் பார்த்துக் கேட்டார், “என்னங்க உங்களுடைய சிலை எனக்குப் பிடிக்கவில்லை அய்யா’’ என்று சொன்னார். அய்யா மிகுந்த அன்போடு கேட்டார், “என்னங்க! இப்படிச் சொல்லுகிறீர்கள்? நீங்கள் இப்படிச் சொல்லுவதற்கு என்ன காரணம்?’’ என்று அய்யா அவர்கள் திருப்பிக் கேட்டார். “அதிலே அய்யா மாதிரி உருவம் இல்லீங்க. கொஞ்சம் உருவம் மாறுதலாக இருக்கிறது. அய்யா சிலை வைத்தால் அய்யா மாதிரியே இருக்க வேண்டாமா?’’ என்று அய்யா அவர்கள் மீதிருந்த பற்றினாலே _ ஆசையினாலே அய்யா அவர்களிடத்திலே சொன்னார். அய்யா அவர்களுக்குப் பக்கத்திலே எங்களைப் போன்றவர்கள் நின்று கொண்டிருந்தோம். உடனே அய்யா அவர்கள் அதற்குப் பதில் சொன்னார், “எனக்கு அது முக்கியமே இல்லீங்க, மன்னிக்கணும். அந்தச் சிலையைவிட எது எனக்கு முக்கியம் என்றால்..... சிலைக்குக் கீழே பீடம் இருக்கிறது பாருங்கள்; அதிலே ‘கடவுள் இல்லை; கடவுள் இல்லவே இல்லை’ என்று என்னுடைய வாசகத்தைத்தானே எழுதப் போகிறான்! அதுதான் எனக்கு முக்கியம்.’’ இப்படி இந்தச் சிலையை வைத்து விட்டு கடவுள் இல்லை; கடவுள் இல்லை; இல்லவே இல்லை; கடவுளைக் கற்பித்தவன் முட்டாள்; கடவுளைப் பரப்பியவன் அயோக்கியன்; கடவுளை வணங்குகிறவன் காட்டுமிராண்டி என எழுதி வைத்தாலே உலகம் பூராவும் இருக்கின்றவன் சொல்லுவான் _ அது என்னுடைய சிலைதான் என்று! எனக்கு உருவம் முக்கியமல்ல; என்னுடைய கொள்கைதான் முக்கியம்’’ என்று சொன்னார்கள். இன்னும் பல்வேறு வரலாற்றுச் சம்பவங்களை அன்றைய கூட்டத்தில் எடுத்துரைத்தேன். ஈழ அகதிகள் பாதுகாப்பு மாநாட்டில் உரையாற்றும் ஆசிரியர் 13.7.1992 அன்று சென்னை பெரியார் திடலில் திராவிடர் கழகத்தின் சார்பில் ஈழ அகதிகள் பாதுகாப்பு மாநாடு நடைபெற்றது. இந்த நிகழ்ச்சிக்கு வந்திருந்த அனைவரையும் திராவிடர் கழகத் தலைமை நிலையச் செயலாளர் கவிஞர் கலி.பூங்குன்றன் அவர்கள் வரவேற்றுப் பேசினார். மாநாட்டை ஈழவேந்தன் திறந்து வைத்தார். மாநாட்டில்  சிறப்புரை ஆற்றினேன். 16.7.1992 அன்று கடிதம் ஒன்று வந்தது. அதில் “சி.பி.எஸ்.ஈ மார்க் ஊழலை வெளிக்கொணர்ந்த சீரிய செயல்’’ என்று எனக்கு டாக்டர் ஆர்.எஸ்.சிறீதர் அவர்கள் கீழ்க்கண்ட கடிதம் எழுதியிருந்தார்கள். சி.பி.எஸ்.ஈ. மார்க் ஊழலை வெளிக்கொணர்ந்த சீரிய செயல் பொதுச்செயலாளருக்கு ஒரு டாக்டரின் கடிதம் Dr.R.S.Sridhar, M.B.B.S.,General Physician and Film Maker,P.42, 6th Avenue, Anna Nagar, Madras - 600 040Telephone: 614409  Date: 9.7.1992 பெருமதிப்பிற்குரிய திரு.வீரமணி அவர்கட்கு, வணக்கம். தங்களுக்கு என்னைத் தெரிந்திருக்க நியாயமில்லை. எனினும் அறிமுகப்படுத்திக் கொள்கிறேன். எனது தாய் வழிப் பாட்டனார் திரு.துரைசாமி (கவுண்டர்) தனது இன்வாழ்வை தந்தை பெரியாரின் கொள்கைகளுக்காக ஈந்தவர். வடஆர்க்காடு பெரியார் நூற்றாண்டு விழா செயற்குழு உறுப்பினராக இருந்தவர். அமெரிக்காவில் சில ஆண்டுகள் இருந்து விட்டுத் திரும்பியுள்ள எனக்கு சி.பி.எஸ்.ஈ. மார்க் ஊழலை வெளிக் கொணருவதில் தாங்கள் செய்துவரும் சிறப்பான பணி, என் மனதை பேருவகை கொள்ளச் செய்தது. தங்களுக்கு ஒரு (முக்கியமான) வேண்டுகோள்: ஜூலை 8 அன்று நடந்த வழக்கு மன்ற விவாதத்தில் சி.பி.எஸ்.ஈ. தேவையின்றி அனைத்து மாணவர்களுக்கும் மதிப்பெண்களை ஏற்றியதாக ஒப்புக் கொள்ளப்பட்டது. ஆனால், சி.பி.எஸ்.ஈ. வழக்குரைஞர்கள் சி.பி.எஸ்.ஈ. மதிப்பெண்களை ஏற்றியதால், கல்லூரி நுழைவுத் தேர்வு மதிப்பெண்கள் அடிப்படையில் மட்டுமே மாணவர்களைச் சேர்த்திட வேண்டும் என்று கூறியது. சி.பி.எஸ்.ஈ.யின் தவறுக்காக, தமிழ்நாடு மாநில கல்வி அமைப்பு மாணவர்களைப் பலிகடா ஆக்கும் செயலாகும் இது. சி.பி.எஸ்.ஈ.யின் தவறுக்கு சி.பி.எஸ்.ஈ. மட்டுமே பொறுப்பேற்றிட வேண்டும்! இதனால் சி.பி.எஸ்.ஈ. மாணவர்கள் பாதிக்கப்பட்டால் அதற்கு பொறுப்பு சி.பி.எஸ்.ஈ. தானே தவிர, தமிழ்நாடு மாணவர்களல்லர். பிளஸ் டூ.வில் தமிழ்நாட்டு அரசு கல்வி அமைப்பு மாணவர்கள் பெற்ற மதிப்பெண்களை அங்கீகரித்து அவர்களை அம்மதிப்பெண்கள் அடிப்படையில் கல்லூரியில் சேர்த்திட வேண்டும்! இதைத் தடுக்க முயலும் சி.பி.எஸ்.ஈ.யின் சூழ்ச்சியினைத் தாங்கள் உறுதியாகத் தடுக்க வேண்டும்! மேலும் ஆந்திராவிலும், கர்நாடகாவிலும் அந்தந்த மாநில மொழியினை இரண்டாம் மொழியாக அனைத்துப் பள்ளிகளும் கற்பிக்க வேண்டும், அனைத்து மாணவர்களும் (சி.பி.எஸ்.ஈ., மெட்ரிகுலேசன் மாணவர்கள் உள்பட) கற்றாக வேண்டும் என்று சட்டம் இருப்பது போன்று தமிழ்நாடு அரசும், தமிழ் மொழியினை அனைத்து மாணவர்களும் தமிழ்நாட்டில் கற்றாக வேண்டும், தமிழ் மொழியினை குறைந்த பட்சம் இரண்டாம் மொழியாகப் பயின்றிருந்தால்தான் தமிழகக் கல்லூரிகளில் அனுமதி தரப்படும் என்று அறிவிக்க வேண்டும். இதை அரசு உடனடியாகச் செய்ய வேண்டும். இதை அரசு செய்யாவிட்டால் இதற்காகத் திராவிடர் கழகம் போராட வேண்டும். ஆந்திரரும், கன்னடரும் ஏற்கெனவே சட்டமாக வைத்திருப்பதை தமிழ்நாடும் பின்பற்றுவதில் தடை என்ன? தங்களது திராவிடப் பணிக்கும், செயல் மேன்மைக்கும் என் வாழ்த்து! அன்பன், ஆர்.எஸ்.சிறீதர்.  18.7.1992 அன்று “சி.பி.எஸ்.ஈ. பள்ளிகளே கூடாது’’ என்கிற கிளர்ச்சி வெடிக்கும்! வெடிக்கும்! என்று முக்கிய அறிக்கை ஒன்று ‘விடுதலை’யில் வெளியிட்டிருந்தோம். அதில், பொய்யான தகவல்களைக் கூறியும், மிரட்டும் பாணியிலும் எழுதிய பார்ப்பன ஏடு, இன்று திடீரென்று ‘மவுண்ட் ரோடு மகாவிஷ்ணு’வான “இந்து’’ ஏட்டில் அண்ணா பல்கலைக்கழகம் நுழைவுத் தேர்வு முடிவுகளைத் தொகுத்து நீதிமன்றத்திற்கு அளித்ததில் ஏதோ மிகப் பெரிய ஊழல் நடைபெற்றுள்ளதாக பெரிய புழுதிப் புரளியை பார்ப்பனர்களுக்கு உரிய மிரட்டல் தன்மையோடு உண்மைக்கு மாறாக அசல் புரட்டு வேலையைச் செய்துள்ளது.  ஓய்வு பெற்ற குடியரசுத் தலைவர் ஆர்.வெங்கட்ராமனுக்கு அரசு பங்களா வழங்குவதை எதிர்த்து நடைபெற்ற கண்டன ஊர்வலத்தில் ஆசிரியர் மற்றும் கைதாகும் கழகத்தினர்  முதலில் கூடுதல் மதிப்பெண்களே போடவில்லை என்று சி.பி.எஸ்.ஈ தரப்பில் கூறப்பட்டது. பிறகு நீதிமன்றத்தில், ஆம்! மதிப்பெண்கள் போடப்பட்டது உண்மைதான் என்பதை ஒப்புக் கொண்டு, அதற்குப் பல பெயர்களும் வியாக்கியானங்களும் அவர்கள் தரப்பில் கூறப்பட்டன. ‘மார்க் மாடரேஷன்’ (Mark Moderation), ‘ஸ்டாண்டர்டிசேஷன்’  (Standardisation) என்றெல்லாம் கூறப்பட்டது. இதுபற்றி விசாரித்து உண்மையைக் கண்டறிய வேண்டும் என்று திராவிடர் கழகத்தின் சார்பில் வழக்கு போடப்பட்டுள்ளது. அவர்களது உள்நோக்கம் வெளிப்பட்டுவிட்டது. இன்னொரு நுழைவுத் தேர்வு வேறு யாரோ தனியார் ஏஜென்சியால் நடத்தப்பட வேண்டுமாம். இப்படி பாதிக்கப்பட்டதாகக் கூறி வழக்குப் போட்ட ஒவ்வொருவரும் கேட்டால் நிலைமை என்னவாகும்? என்று ‘இந்து’ ஏட்டின் செய்தியை சுட்டிக்காட்டி அந்த அறிக்கையில் விளக்கியிருந்தோம். அப்படிப்பட்ட சி.பி.எஸ்.ஈ.தான் இன்று ‘நீட்’ தேர்வு நடத்துகிறது என்பதிலிருந்து ‘நீட்’ தேர்வு எப்படிப்பட்ட மோசடித் தேர்வு என்பதைத் தெரிந்துகொள்ளலாம். பெரியார் அஞ்சல் வழிக் கல்லூரியின் முதல்வர் பெரியார் பேருரையாளர் பேராசிரியர் ந.இராமநாதன் அவர்களின் துணைவியார் 22.7.1992 அன்று சித்திரக்குடியில் (தஞ்சை மாவட்டம்) மறைவுற்றார் என்கிற செய்தியை அறிந்து மனம் வருந்தி அவர்களுக்கு இரங்கல் தந்தி அனுப்பினேன். 24.7.1992 அன்று குடியரசுத் தலைவர் பதவியிலிருந்து ஓய்வு பெற்ற திரு.ஆர்.வெங்கட்ராமன் அவர்களுக்கு அரசு புதிய பங்களா ஒன்று வழங்குவதை எதிர்த்து கழகத்தின் சார்பில் கண்டன ஊர்வலம் நடத்தப்படும் என்று 17.7.1992 அன்று ‘விடுதலை’யில் அறிவித்து இருந்தோம். இதனையொட்டி கழகத் தோழர்கள் தடையை மீறி ஊர்வலத்தை நடத்தியும் கைதானார்கள். ஆர்.வெங்கட்ராமன் பின்பு, கழகத்தின் சார்பில் உயர்நீதிமன்றத்தில் வழக்கு என் சார்பில் தாக்கல் செய்தேன். அந்த மனுவில், “முன்னாள் குடியரசுத் தலைவர் திரு.ஆர்.வெங்கட்ராமன் கடந்த 24.7.1992 அன்று பதவிக்காலம் முடிவடைந்து அவருக்கு சென்னையில் குடியிருக்க தமிழ்நாடு அரசு சார்பில் ஒரு பெரிய பங்களா ஒதுக்கப்பட்டிருக்கிறது. வெங்கட்ராமனுக்கு, குடியரசுத் தலைவர் பதவியிலிருந்து ஓய்வு பெற்றதால், ஓய்வூதியம், சலுகைகள் கிடைக்கின்றன. கோட்டூர்புரத்தில் ஏற்கெனவே அவருக்குச் சொந்தமாக வீடு இக்கிறது. அருகில் மகள் பேரில் இன்னொரு பங்களா இருக்கிறது. தமிழக அரசு நிதி நெருக்கடியைச் சந்தித்துக் கொண்டிருக்கின்ற போது அவருக்கு புதியதாக அவருக்கு குடியிருக்க அரசு பங்களாவை அனுமதிக்கக் கூடாது, பொதுமக்கள் பணத்தில் ஏற்கெனவே அவருக்கு செலவு செய்த பணத்தை திரும்பப் பெற ஆணையிட வேண்டும்’’ என்று என் சார்பில் தாக்கல் செய்யப்பட்ட மனுவில் குறிப்பிட்டிருந்தோம். இந்த மனு மீதான விசாரணை 29.7.1992 அன்று விசாரணைக்கு வந்தது. 25.7.1992 முதல் 29.7.1992 வரை நெதர்லேண்ட்ஸ் நாட்டின் ஆம்ஸ்டர்டாம் நகரில் நடைபெற்ற பன்னாட்டு பகுத்தறிவாளர் மாநாட்டில் (International Humanists Conference)   கலந்துகொள்ள அவர்கள் விடுத்த அழைப்பினை ஏற்று 21.7.1992 அன்று லண்டன் வழியாகப் புறப்பட்டுச் சென்றேன்.  நெதர்லாந்து நாட்டில் நடைபெற்ற பன்னாட்டு பகுத்தறிவாளர் மாநாட்டில் கலந்து கொள்ளச் செல்லும் ஆசிரியரை வாழ்த்தி வழியனுப்பும் கழகத்தினர். வடமேற்கு அய்ரோப்பாவில் வடகடற்கரை ஓரமாக இருக்கும் நெதர்லாந்து நாட்டின் முக்கிய நகரங்களில் ஒன்றான ஆம்ஸ்டர்டாமில் உலக நாத்திகர்கள், பகுத்தறிவாளர்கள் _ மனிதநேய அமைப்புகளின் மாநாடும் பெருமண்டபமான ராய் காங்கிரஸ் சென்டரில் கோலாகலமாகத் துவங்கி நடைபெற்றது. இந்த மாநாட்டில் 48 நாடுகளில் உள்ள 96 அமைப்புகள் கூட்டாகச் சேர்ந்து நடத்திய சிறப்பு வாய்ந்த உலகம் தழுவிய இந்த மாநாட்டோடு சேர்ந்து, அதன் 40ஆம் ஆண்டு விழாவினையும் இணைத்துக் கொண்டாடினர். 26.7.1992 முதல் 30.7.1992 வரை நடைபெற்ற இம்மாநாட்டில் பன்னாட்டு நாத்திகர்கள், பகுத்தறிவாளர்கள் _ மனிதநேய அமைப்புகள், மனித உரிமை அமைப்புகள் இணைந்து பல வகையிலும் விவாதங்கள் நடத்தி ஆய்வுகள் மேற்கொண்டு உலக முக்கியத்துவம் வாய்ந்த முடிவுகள் எடுக்கப்பட்டன. கழகத்தின் சார்பில் நான், நார்வே நாட்டு பகுத்தறிவாளர் லெவி ஃபிராகல் (Levy Fragull) தந்தை பெரியார் தொண்டு பற்றியும், அவருக்குப் பிறகு அது தொடரும் விதம் பற்றியும் கூறி என்னை அறிமுகப்படுத்தி விளக்கினார். பலரும் தனித்தனியே பல்வேறு வினாக்களை என்னிடம் கேட்டனர். அதற்கு சிறப்பான பதில் அளித்தும், அதே நேரத்தில் பகுத்தறிவாளர் இயக்கம் எப்படி பல லட்சக்கணக்கான உறுப்பினர்களைப் பெற்று ஒரு மக்கள் இயக்கமாக (Mass Movement) தமிழ்நாட்டில் இயங்குகிறது என்பதையும் எடுத்துக் கூறினேன். கனடா நாட்டு “ஹியூமனிஸ்ட்’’ ஏட்டின் ஆசிரியர் பேஜ், அமெரிக்கா நாட்டின் பிரபல அமைப்பின் சார்பில் பஃபாலோ (Buffalo) என்ற நகரில் உள்ள அமைப்பிற்கு வருமாறு அழைப்பு விடுத்தார். பெரியார் தொண்டு, சுயமரியாதை இயக்கத்தின் சாதனை, சுயமரியாதைத் திருமணம் கடவுள் மறுப்பு என்பன பற்றியெல்லாம் விளக்கப்பட்டது. தந்தை பெரியாரின் பெண்ணுரிமைத் தத்துவங்கள் பற்றி மகிழ்ந்தனர். ஃபின்லாந்தைச் சார்ந்த தெவோடைக்னன் தந்தை பெரியார் பற்றி ஏற்கெனவே அறிந்தவராகவும் கூறினார். ஹெல்சிங்கி பகுதியைச் சார்ந்தவர் இவர். ‘Free Enquiry’ ஏட்டின் ஆசிரியர் டிமோதி மேடிகன் போன்ற பலரும் இயக்கச் சாதனை பற்றி உரையாடினார்கள். இரண்டாம் நாள் மாநாட்டில் இந்தியாவைச் சார்ந்த பாபு, பம்பாய் திருமதி. இந்துமதி பரீக்கி (ராய்கட்) பேசிய பிறகு நான் உரையாற்றினேன். வீ.அன்புராஜ் அப்போது, கடவுள் மறுப்பு வாசகம், மனிதநேய தத்துவம், தந்தை பெரியார் கூறிய “சுயமரியாதை வாழ்வே சுகவாழ்வு’’ என்பது பற்றி கூறி, இறுதி வரை பதவியேற்காமல் உழைத்தார் என்பதை சுமார் 15 நிமிடங்கள் விளக்கியவுடன் அதை வெகுவாகப் பாராட்டி வரவேற்றனர். கைகுலுக்கி வரவேற்றனர். மாநாட்டில், முக்கியத் தலைவர்களுக்கு தந்தை பெரியார் ஆங்கில நூல்களை அன்பளிப்பாக வழங்கினேன். என்னுடன் வீ.அன்புராஜ், பாரீஸ் சுசீலா, கெடிலீஸ் ஆகியோரும் மாநாட்டில் உடன் பங்கேற்றனர். லெவி ஃபிராகெல், தந்தை பெரியார் பேட்ஜை தனது சட்டைக்கு மேல் அணிந்திருந்தது குறிப்பிடத்தக்க செயலாக காணப்பட்டது. அவர் நமது இயக்கத்தை நன்கு அறிந்தவர். பாட்டாளி மக்கள் கட்சி நடத்திய தமிழர் வாழ்வுரிமை மாநாட்டில் உரையாற்றும் தமிழர் தலைவர் ஆசிரியர்.  இங்கிலாந்து நாட்டு பகுத்தறிவாளர் மேரிஸ் டோப்ஸ் _ ரோவ் 1982இல் சென்னை பகுத்தறிவாளர் கழக மாநாட்டில் கலந்து கொண்டவர். நாம் அளித்த அந்தப் கைப்பெட்டியுடன் மாநாட்டிற்கு வந்திருந்தார். அதை என்னிடத்தில் காட்டி மகிழ்ந்தார். 1994 அல்லது 1995இல் இந்தியாவில்தான் அடுத்த மாநாடு நடைபெறுவதாக உள்ளது என்று அவர்கள் கூறியவுடன், அதனை வரவேற்று சென்னையில் நடத்துமாறு அழைப்பு விடுத்தேன். அதனை அவர்கள் கைதட்டி வரவேற்றனர். மாநாட்டில் திருமதி. நெட்டிக்கிளின் அம்மையாருக்கும் அய்யா பற்றிய ஆங்கில வாழ்க்கை வரலாற்று நூலைத் தந்தேன். அதை அவர்கள் மகிழ்வுடன் பெற்றுக் கொண்டார். 20.8.1992 அன்று அமெரிக்காவின் செயின்ட்பீட்டஸ்பர்க்கிலிருந்து பேக்ஸ்  (Fax) மூலம் தமிழக அரசுக்கு வேண்டுகோள் மற்றும் கண்டனத்தைத் தெரிவித்து இருந்தேன். அந்த அறிக்கையில், கலைஞர் மீது தமிழக அரசு அமைத்துள்ள விசாரணைக் கமிஷனைக் கைவிட வேண்டும்; இது வேண்டாத விளைவுகளை உருவாக்கும் கண்டனத்துக்குரிய செயல் என்றும், கலைஞர் அவர்கள் மீதும் அவர்களது குடும்பத்தினர் மீதும் ஒரு விசாரணைக் கமிஷன் போடப்பட்டுள்ள தாகவும் எனக்கு தெரிவிக்கப்பட்டது. சர்க்காரியா கமிஷன் போட்ட இந்திராகாந்தி மீதே, ஷா கமிஷன் வரவில்லையா? அது விளைவித்த பலன் மீண்டும் அவர் பதவிக்கு வந்ததுதான்! எனவே, இது கலைஞரின் பொதுவாழ்விற்கு இடப்பட்ட உரமாகுமே தவிர, அவரை வீழ்த்தப் பயன்படும் கருவி ஆகாது என்று தெரிவித்து இருந்தேன். 12.9.1992 அன்று பாட்டாளி மக்கள் கட்சி சார்பில் நடத்தப்பட்ட தமிழர் வாழ்வுரிமை மாநாட்டின் இறுதி நாள் நிகழ்ச்சி கடற்கரை சீரணி அரங்கில் நடைபெற்றது. லட்சக்கணக்கான மக்கள் திரண்டிருந்த அந்த மாபெரும் கூட்டத்தில் முன்னாள் பாரதப் பிரதமர் திரு.வி.பி.சிங் அவர்கள் முன்னிலையில் நான் உரையாற்றினேன். அப்போது, இந்த நிகழ்ச்சி வரலாற்றுக் குறிப்பில் இடம் பெறத்தக்க சிறப்பு வாய்ந்ததாகும். மண்டல் பரிந்துரைக்கு செயல்வடிவம் கொடுத்து அதன் காரணமாக ஆட்சியை இழந்து _ ஆட்சியைக் காப்பாற்ற வேண்டும் என்பதற்காக சமூகநீதிக் குரல் வளையை நெறிக்க மாட்டேன் என்று காட்டிய ஒப்பற்ற தலைவர், சமூகநீதிக் காவலர், ஒடுக்கப்பட்ட மக்களின் நெஞ்சில் நீங்கள் இடம் பெற்றுள்ள சரித்திர நாயகர் வி.பி.சிங் அவர்கள் என்று குறிப்பிட்டேன். 18.9.1992 அன்று பாட்டாளி மக்கள் கட்சியின் நிறுவனத் தலைவர் டாக்டர் இராமதாஸ் அவர்கள் தமிழர் வாழ்வுரிமை மாநாட்டில் நிறைவேற்றிய தீர்மானத்திற்காக கைது செய்து சிறையில் அடைக்கப்பட்டிருந்தார். இதனைக் கண்டித்து 19.9.1992 அன்று ‘விடுதலை’யில் பா.ம.க. சட்டவிரோத தீர்மானம் எதையும் போடவில்லை. 356ஆவது பிரிவை ஏவ மத்திய அரசு துடிக்கும் நிலையில், தமிழக அரசு வீண் வம்பை விலைக்கு வாங்குவதா? என்றும், சமூகவிரோதச் செயலோ, சட்ட விரோத முடிவுகளோ எவையும் அவர்கள் நிறைவேற்றிய தீர்மானங்களில் இல்லை என்பது திட்டவட்டமான ஒன்று. மேலோட்டமாக சில ஏடுகளும், சில நபர்களும் போடும் கூப்பாடுகளையெல்லாம் அரசு பொருட்படுத்தினால், அவப்பெயர் அரசுக்குத் தான் வருமே தவிர, அவர்களுக்கு அல்ல என்பதையும் ஆட்சியாளர்கள் உணருவது நல்லது என்று அந்த அறிக்கையில் குறிப்பிட்டிருந்தோம். (நினைவுகள் நீளும்...)  செய்திகளை பகிர்ந்து கொள்ள

நாடகம் : புது விசாரணை(3)

(ஒரு நாடகக் தொடர்) இந்த நீதிமன்றம் எத்தனையோ வழக்குகளை சந்தித்திருக்கிறது. ஆனால், இந்த வழக்கு புது விசாரணைக்காக இந்த நீதிமன்றத்தால் ஏற்கப்பட்டு குறுக்கு விசாரணை எல்லாம் நடைபெறுகிறது. பழைய புராண பாத்திரங்களின் தன்மை - மனுநீதி அடிப்படையில் அப்போது சாஸ்திர, புராண, இதிகாசங்களில் அளிக்கப்பட்ட தீர்ப்புகளுக்கான மறு விசாரணைக்கான மனு, வழக்குரைஞர் புத்தியானந்தாவினால் தாக்கல் செய்யப்பட்டு, மாண்பமை நீதிபதி நெடுஞ்செழிய பாண்டியன் அவர்களால் விசாரிக்கப்படுகிறது. ஏற்கெனவே இந்த நீதிமன்றத்தில் இப்படிப்பட்ட பழைய அநீதிகளுக்குப் புதிய நீதி வழங்க வேண்டி போடப்பட்டு, அனுமதிக்கப்பட்டு விசாரிக்கப்படும் வழக்குகள் ஏராளம் குவிந்திருக்கின்றன; காரணம், தந்தை பெரியார் என்னும் புரட்சியாளரின் அறிவுப் புரட்சியினால், புத்தாக்க சிந்தனைகளுக்கு ஆளான பல, பழைய (மனு) அநீதிகள் - சட்டக் கொடுங்கோன்மைகள் மீது ஒரு புதிய வெளிச்சத்தைப் பாய்ச்சியாக வேண்டும் என்கிற உத்வேகம் பலரை மக்கள் மன்றத்திலிருந்து மனிதநேய நீதிமன்றத்திற்கு அழைத்து வந்துள்ளது; அவர்களுக்குப் புதிய நம்பிக்கை பிறந்துள்ளதால், பிறந்தன பல புதிய மனு விசாரணை வழக்குகள்: அதற்காகத் தான் திறந்தன நீதிமன்றக் கதவுகள். காட்சி 3 - நீதிமன்றம் நீதிமன்றத்தில் அனைவரும் அமர்ந்திருக்கின்றனர். நீதிபதி நெடுஞ்செழிய பாண்டியன் வருகிறார். உதவியாளர்: அமைதி! அமைதி! நீதிபதி கும்பிட்டுவிட்டு தனது இருக்கையில் அமர்ந்து வழக்கை விசாரிக்க ஆயத்தமாக, “மண்டல், மண்டல்’’ என்று அழைக்கப்படுகிறார். B.P. மண்டல் வந்து தனது இருக்கையிலிருந்து எழுந்து கூண்டுக்குள் ஏறிட முயலும்போது, நீதிபதி: முன்பே தங்களிடம் நான் சொன்னபடி, இருக்கையில் அமர்ந்தவாறே இந்த நீதிமன்றத்தில் நீங்கள்-இரு தரப்பினரின் கேள்விகளுக்கும் எனது அய்யங்களுக்கும் பதில் அளியுங்கள். பழைய முறை நிற்க வைப்பது; அது மனித தர்மத்திற்கு எதிரானதல்லவா? அதனால்தான்! மண்டல்: என்றாலும் இந்த நீதிமன்றத்தை நாங்கள் வெகுவாக மதிக்கிறோம். எனவே,  தங்களுக்குரிய மரியாதையைக் கனிவுடன் தர, கண்ணியம் காக்க நான் நின்றவாறே பதில் அளிப்பதே சரி என்று எனக்குத் தோன்றுகிறது! நீதிபதி காட்டிய அன்பினை மறுக்கவில்லை. என்றாலும் நின்றுகொண்டே பதில் அளிக்க விரும்புகிறேன். வழக்குரைஞர் புத்தியானந்தர்: இராமாயணம், மஹாபாரதம் போன்ற இதிகாசங்களில் ஏகலைவன், சம்பூகன் இருவரும் வெகுவாக பாதிக்கப்பட்டதோடு, வர்ணாஸ்ரம தர்மம் காரணமாக வாழ்நாள் முழுவதும் அநீதி என்ற நெருப்புக் குண்டத்தில் தள்ளப்பட்டு வெந்து நொந்தவர்கள்! வழக்குரைஞர் குல்லூகபட்டர்: எனது கற்றறிந்த நண்பர் புத்தியானந்தர் ஜோடனைகளை எல்லாம் கூறி இந்த நீதிமன்றத்தினை தன்வயப்படுத்த முயலுகிறார். புத்தியானந்தர்: ஏனோ பதறுகிறார் எனது கற்றறிந்த நண்பர் குல்லூகபட்டர்! விஷயத்திற்கே இன்னும் வரவில்லை. அதற்கு முன்னரே ஏன் இப்படி? நீதிபதி: சரி, நீங்கள் உங்கள் வாதங்களை எடுத்து வையுங்கள். “Please Proceed.” மஹாபாரதத்தில் இது நடந்ததாக எழுதப்பட்டுள்ளது. அதை முதலில், அதாவது, பஞ்ச பாண்டவர்களை சூதாட்டத்தில் தோற்றதால் 14 ஆண்டுகள் வனவாசம் தண்டனை தந்து அனுப்பிய நிலையில், ஒரு நாள் காட்டில் -அர்ச்சுனன் மற்றவர்களுடன் குரு துரோணாச்சாரியார் உணவுக்காக காய்கனிகளைப் பறிக்கவும், விலங்குகளை வேட்டையாடவும் நடந்து சென்றனர். அப்போது ஒரு நாய்க்குட்டி குரைத்தது. அடுத்த சில மணித்துளிகளில் ஓர் அம்பு அதன் வாயைத் துளைத்துக் கொன்றது. குறி தப்பாமல் சென்று நாய்க்குட்டியைக் கொன்ற அந்த அம்பு துரோணருக்கு  அதிர்ச்சியைத் தந்தது. “யார் அம்பை ஏவியது?’’ உரக்க கேட்டார் துரோணாச்சாரியார்! கட்டுமஸ்தான தேகம் படைத்த ஒரு வாலிப வேடன் ஓடோடி வந்து துரோணரின் காலில் விழுந்து ‘அடியேன்தான் குருதேவ்’ அம்பு எய்தவன். “உன் பெயர் என்ன?’’ என்று துரோணர் கேட்க, “ஏகலைவன்’’ என்றான் வேடன். “நீ என்ன குலம்?’’ வேட்டுவ குலமா? “ஆம் ஸ்வாமி!’’ அதிர்ச்சியுடன் கண்களைச் சுழற்றி - (விழி பிதுங்கியபடி) - “அப்படியா? உன் வித்தைக்கு யார் குரு? - யாரிடம் நீ இந்த வில் வித்தையைக் கற்றாய்?’’ - துரோணர் கேட்கிறார். “அடியேன் கற்றது தங்களிடம்தான் குருதேவா’’ என்கிறான் ஏகலைவன். “என்ன! என்ன! என்னிடமா நான் உன்னைப் பார்ப்பதே இதுதான் முதல் தடவை. பின் எப்படி என்னிடம் கற்றிருக்க முடியும்? ஏன் இப்படி கதை விடுகிறாய்?’’ சுட்டெரிக்கும் பார்வையுடன் கேட்டார் துரோணர். சாந்தமுடன் ஓர் அடிமையின் ஈனக்குரலில்  ஏகலைவன், “குருதேவா நீங்கள் ஒருவேளை மறந்திருக்கக் கூடும். நான் தங்களை ஒரு நாள் சரண் அடைந்து வில் வித்தை பயிற்சியில் சேர விருப்பம் தெரிவித்தேன். தாங்கள் நீ என்ன ஜாதி - வர்ணம் என்று கேட்டீர்கள். நான் - வேட்டுவகுலம், வர்ணம் - சூத்திரன்’’ என்றேன். “அப்படியா? சூத்திரர்களுக்கு ‘தனுர்வித்யா’ சொல்லிக் கொடுக்க வர்ணதர்மம் இடந்தராது. இந்த இடத்தைவிட்டு ஓடிப்போ! அந்த நினைப்பை உன் மனதிலிருந்து அழித்துவிடு’’ என்று கோபாக்கினியோடு கூறினீர்கள். நான் தங்கள் காலைப் பிடித்துக் கொண்டு கதறிக் கதறிக் கெஞ்சி அழுதேன். சட்டென்று உதறிவிட்டு திரும்பி நடந்து போய்விட்டீர்கள்! என்றாலும், தங்களை நான் என் மானசீக குருவாக - இஷ்ட குரு தெய்வமாக - வரித்துக் கொண்டேன்; தங்கள் உருவத்தை ஒரு சிலை செய்து, அதனை அனுதினமும் வணங்கி, அதன்முன் வில்வித்தையைப் பயின்றேன். இப்படித்தான் எனது விற்கலை வளர்ந்தது குருதேவ்’’ என்றான். துரோணருக்கு உள்ளூர வஞ்சக நெருப்பு கொழுந்துவிட்டு எரிந்தும்கூட, அதை காட்டிக் கொள்ளாமல் ஒரு சூழ்ச்சித் திட்டத்தை உருவாக்கினார். நீதிபதி நெடுஞ்செழிய பாண்டியன்: என்ன? என்ன? மிகவும் அதிர்ச்சி தரும் கொடுமையாக இருக்கிறதே! வேடுவர்கள்தானே வில்வித்தையில்  வல்லவர்கள். வில்வித்தையைக் கற்றுக் கொள்வதில் அவர்கள்தானே முன்னுரிமை உடையவர்கள்? அப்படியிருக்க, அவர்களுக்கு இப்படி ஒரு தடையா? அதுவும் வர்ண தர்மத்தாலா? வழக்குரைஞர் குல்லூகபட்டர்: கனம் நீதிபதி அவர்களே! கர்மானுஷ்டானம், தர்மானுஷ்டானம் இவை இரண்டும் நம் சாஸ்திர சம்பிரதாயப்படி நடக்க அந்தப் பிரமனே அவாஅவா தலையில் எழுதிவிட்டானே அதை எப்படி மாற்ற முடியும்? துரோணன் மீற முடியுமோ! - அதனால்தான்! வழக்குரைஞர் புத்தியானந்தர்: எனது கற்றறிந்த எதிர் அணி வழக்குரைஞர் நண்பரின் கர்மானுஷ்டானம் - தர்மானுஷ்டானம் எல்லாம் மஹபாரதக் கதைப்படி மேலும் எப்படி நடந்துள்ளது என்பது அடுத்த கட்டம். அது ரொம்ப சுவாரஸ்யமானது. சற்று விளக்கமாகக் கூற கோர்ட்டாரின் நேரத்தை சற்று கூடுதலாக எடுத்துக்கொள்ள வேண்டியிருக்கும்!  தொடரலாமா?... நீதிபதி: அப்படியா? மற்ற வழக்காடிகளும் தொலைதூரத்திலிருந்து வந்து காத்திருக்கிறார்கள். அவர்களை ஏமாற்றம் அடையச் செய்ய விரும்பவில்லை. அடுத்த 15 நாள் தள்ளி வைக்கிறேன். மற்ற வழக்கு விசாரணை தொடர்கிறது... (தொடரும்...) - சிந்தனைச் சித்ராசெய்திகளை பகிர்ந்து கொள்ள